2Ifyeŵo 3 - Amashiwi Aba Lesa

¹ Popele apo Solomoni walitaticile ukwiŵaka iŋanda yaŵaYawe muJelusalemi palupili lwaMoliya, apo ŵaYawe ŵabwenekele kuli Dafidi wisi, apo-pantu apaansicile Dafidi, paciŵansa cakwe Olinana umujebusi,

² Walitaticile ukwiŵaka pansiku yaŵusiŵili iyamwensi waŵuiŵili, pamwaka waŵuine uwakwikalika kwakwe.

³ Lomba ifi efyapansi ifyo aŵicile Solomoni ukwiŵaka kwananda yaŵaLesa. Amakubita awutali, koti kwesya kwakale, alikumene amakubita amakumi asanu nalimo, nebwipi naŵo makubita amakumi aŵili.

⁴ Kaŵili insense yapamenso ananda, uŵutali bwaiyo koti bwipi bwananda, bwalikumene amakubita amakumi aŵili, neŵutali ubwapeulu naŵo bwalikumene umwanda umo nemakumi aŵili; kaŵili mukati aliŵicile pali yo igolide iliswetele.

⁵ Kaŵili iŋanda ikulu aliifimbile-po nefiti fyamuŵelosi, ifyo aŵicile-po negolide iliwaminine, nekulembela-po ifiŵale neminyololo.

⁶ Popele alifimbile-po pananda nemabwe amakweŵo apatali ati iŵe neŵulombe; lomba igolide lyali ligolide lyakuPalafaimi.

⁷ Walifimbile-po kaŵili iŋanda, nematabwa, nefibwambilo, nefiŵumba fyakuko, nefiŵi fyakuko, kwigolide; nekulemba ŵakelubi pafiŵumba.

⁸ Popele walicitile iŋanda iswetelele swete; uŵutali bwakuko, koti bwipi bwananda, bwalikumene amakubita amakumi aŵili; nebwipi bwakuko naŵo makubita amakumi aŵili; naye aliŵicile-po ponse igolide iliwaminine, ilyakukumana amatalanto imyanda isanu naumo.

⁹ Kaŵili ukwesya pesikelo imisumali kwalikumene amasyekeli egolide amakumi asanu. Nakaŵili aliŵicile igolide ponse pafipinda ifyapeulu.

¹⁰ Lomba muŋanda iswetelele swete alicitile ŵakelubi ŵaŵili, imilimo yaŵufiŵumbwaŵumbwa; popele ŵaliŵicile igolide ponse pali ŵo.

¹¹ Lomba amapindo aŵakelubi alikumene uŵutali bwamakubita amakumi aŵili; uŵukulu bwepindo lyakwe kelubi umo bwalikumene amakubita asanu, ilyakumene kuciŵumba cananda; kaŵili uŵukulu bwepindo limbi bwalikumene amakubita asanu, nalyo lyalikumene nepindo lyakwe kelubi umbi nave.

¹² Kaŵili uŵukulu bwepindo lyakwe kelubi umbi bwalikumene amakubita asanu, fyopele'fyo lyalikumene neciŵumba cananda; kaŵili uŵukulu bwepindo limbi bwalikumene amakubita asanu, nalyo lyalikumaŋkene nepindo lyakwe kelubi uyo umbi.

¹³ Amapindo aŵakelubi aŵo alitandaŵele ukulukufika amakubita amakumi aŵili; ŵo ŵaliimakene pamakasa aŵo, nemenso aŵo nekulola nakunanda.

¹⁴ Kaŵili aliposele icipembe kunsalu ifitile koti liulu neikasicile panini neikasicile cee nakunsalu inacile, nekuposelapo naŵakelubi.

¹⁵ Kaŵili pamenso ananda alicitile impanda siŵili isyali neŵutali bwapeulu ubwakukumana amakubita amakumi atatu naasanu; nemitwi iyali peulu pali syo syoŵilo nayo yalikumene amakubita asanu.

¹⁶ Kaŵili alicitile iminyololo mwilaŵililo, nekwiŵika peulu pampanda; naye nekucita ŵalimono umwanda umo, nekuŵaŵika paminyololo.

¹⁷ Popele alisiimicile impanda pamenso etempuli, lumo kulwine, lumbi nalo kucipiko; nekwilika isina lyalolo ulwakulwine ati nijacini, nesina lyalolo ulwakucipiko ati niBoasi.