2Ifyeŵo 25 - Amashiwi Aba Lesa

¹ Amasaya walikumene imyaka amakumi aŵili naisanu, pakutatika ye ukwikalika; naye walukwikaliko'ŵufumu imyaka amakumi aŵili naisanu naine mu Jelusalemi; lomba isina lyaŵanyina niJeyoyadani uwakuJelusalemi.

² Kaŵili walukucite'fyo ifyelelwe pamenso aŵaYawe; sombi umutima wakwe tawawaminine, tau.

³ Popele apo lomba, pakwikalikwa uŵufumu too kuli ye, paliŵele ati aliŵepeye aŵantu ŵakwe aŵo aŵaipeye imfumu ŵawisi.

⁴ Sombi taaŵepeye aŵana ŵaŵo; alicitile koti nifyefyo ifilembelwe mwifunde mwibuku lyakwe Mose, koti nifyefyo ifi ŵafundile ŵaYawe ati: Ŵawisiŵo tekuti ŵafwile aŵana, neli ŵana tekuti ŵafwile ŵawisiŵo; sombi aŵantu ŵonse umo umo eukafwa pakuti pakuŵifya kwakwe umwine.

⁵ Kaŵili Amasaya aliwawuŋgenye aŵaJuda, nekuŵaansika koti mananda aŵawisiŵo, pansi pafilolo ifyapamasausande napafilolo ifyapamyanda, eŵena-Juda ŵonse neŵena-Benjamini ŵonse; popele aliŵapendele ubwinji ukutatika paŵakumene imyaka amakumi aŵili neŵakucila-po pali yeyo, nekuŵona ati ŵali ŵalalume aŵasalulwilwe amasausande imyanda itatu, aŵaisiŵile ukutule'ŋkondo nekulwa kwifumo nakuŋgawo,

⁶ Walifolele kaŵili kuIsilaeli aŵalalume aŵamakosa nelupata amasausande umwanda umo, pakulambula amatalanto esilifa umwanda umo.

⁷ Sombi palii sile kuli ye umuntu waŵaLesa, uwalaŵile ati: Mwemfumu, tekusumina ati iŵumba lyafita fyaŵaIsilaeli liende pamo namweŵo; pakuti ŵaYawe taŵali pamo neŵaIsilaeli, eŵana ŵakwe Efilayimi ŵonse.

⁸ Sombi kani mukende, kamucita, muwe nemakosa akuŋkondo; sombi ŵaLesa ŵakamuwisisyeni pamenso atupondo; pakuti ŵaLesa ŵali nemakosa akofwa-ko neakuwisya-ko.

⁹ Peŋka Amasaya kaalaŵila kumuntu waŵaLesa ati: Sombi tuŋgacite'ndo ifyamatalanto ayo umwanda nalipela iŵumba lyafita fyaŵaIsilaeli? Popele umuntu waŵaLesa nekwasuka ati: ŴaYawe ŵaliisi ukumupeleni ifyakucilo'bwinji ukwakuti napali fifi.

¹⁰ Popele apo Amasaya aliŵalekenye, ukufumya iŵumba lyafita ilyaisile kuli ye ukufuma kuEfilayimi, ati libwelele kwaŵo. Pakuti pali fyefyo uŵukali bwaŵo bwaliŵaŵucile ukwakuti aŵaJuda, naŵo nekubwelela kwaŵo neŵukali bwamaŋgalakupena.

¹¹ Popele Amasaya waliŵele nelupata, nekuŵatanjilila aŵantu ŵakwe, nekuya ku Mukolo waMucele, nekuŵapama aŵantu aŵakuSeyili amasausande ikumi.

¹² Naŵambi naŵo amasausande ikumi aŵana ŵakwe Juda ŵaliŵatapile aŵalaŵi, nekuŵafisya peulu lyacibwe, nekuŵawisya kwi ulu lyacibwe, fyopele'fyo ŵonse nekusansaika lukoso.

¹³ Sombi aŵalalume aŵamwiŵumba lyafita, aŵo Amasaya abwesesye, weŋgesa mukuya nakwe kuŋkondo, ŵaliŵucile imisi yakuJuda, ukufuma kuSamalya ukufika nakuBetakolono, nekuŵapama aŵantu aŵakuli yo amasausande atatu, nekupoka ifyakutapa ifinji.

¹⁴ Popele apo, ili abwelele Amasaya kukwipayala aŵaEdomi, paliŵele ati aliletele ŵalesa ŵaŵantu aŵakuSeyili, nekuŵemika ati niŵalesa ŵakwe umwine, nekwinamisya pamenso paŵo, nekuwocela nefinuncile bwino.

¹⁵ Pakuti pali fyefyo uŵukali bwaŵaYawe bwalimuŵucile Amasaya, naŵo nekutuma kuli ye uwakusimika, uwalaŵile kuli ye ati: Mbanindo mwafwaila ŵalesa wawantu, aŵataŵapulwisye aŵantu ŵaŵo aŵene muminwe yenu?

¹⁶ Popele apo, ili alukulaŵila nayo, paliŵele ati imfumu yalilaŵile kuli ye ati: Kani twakucita ati uŵe nikampeŋga wamfumu? Cileke! Mbanindo ŵaŋgakupamina? Peŋka uwakusimika nekucileka, nekulaŵila ati: Ndiisi ati ŵaLesa ŵalandakanya ukumonaleni, pakuti mwacite'fi nekuŵulo'kukutika ukufunda kwanji.

¹⁷ Popele Amasaya imfumu yakuJuda walukufundana, nekutuma kuli Joasi, umwana wakwe Jevoyakasi, umwana wakwe Jiyu, imfumu yakuIsilaeli, nekulaŵila ati: Iseni ŋgatuwonane napamenso.

¹⁸ Lomba Joasi imfumu yaku Isilaeli walitumine kuli Amasaya imfumu yakuJuda ati: Uluŵuto lwafisosolo ulwali kuLebanoni lwalitumine kuli yelesi uwali kuLebanoni, ati, Ufyeni umwana wenu umwanakasi kumwana wanji umwalalume. Popele palipitile icilwani icali kuLebanoni, naco nekunyantala uloluŵuto lwafisosolo.

¹⁹ Mweŵo ati: Ŵoneni-ko, napama Edomi; lomba umutima wenu ulukumusuntuleni ati mulitote. Pano kamwikala kwenu. Mbanindo muŋgapiŋga mukuliŵusisye' mbiko, nekuwa, mweŵo neŵaJuda pamo?

²⁰ Sombi Amasaya walikene ukumfwa; pakuti fyalifumine kuli ŵaLesa, ati ŋgawawapele muminwe yatupondo twaŵo, pakuti ŵalukufwaila kuli ŵalesa aŵakuEdomi.

²¹ Fyopele'fyo Joasi imfumu yakuIsilaeli walininine; popele ye naAmasaya imfumu yakuJuda nekuŵonana napamenso kuBeta-syemesi uwakuJuda,

²² Popele aŵaJuda nekucilwa uŵukali pamenso aŵaIsilaeli; naŵo ŵonse lukoso nekuŵundumuka ukulukuya kumasema aŵo.

²³ Kaŵili Joasi imfumu yakuIsilaeli walimwikete Amasaya imfumu yakuJuda, umwana wakwe Joasi, umwana wakwe Jeyoyakasi, kuBeta-syemesi, nekumufisya kuJelusalemi, nekutoŵala iliŋga ilyakuJelusalemi, ukufuma kumusiko wakwe Efilayimi ukufika kumusiko wakwikoŋko, amakubita imyanda ine.

²⁴ Kaŵili alipokolwele igolide nesilifa lyonse, nefiŋkoloŋkolo fyonse ifyabwenekele muŋanda yaŵaYawe kuli Obededomi, nefyamakweŵo ifyali muŋanda yamfumu, pamo neŋkole; eli abwelele kuSamalya.

²⁵ Popele, pakweŵa ati wafwa Joasi, umwana wakwe Jeyoyakasi imfumu yakuIsilaeli, Amasaya umwana wakwe Joasi imfumu yakuJuda, kaaciikele imyaka ikumi naisanu.

²⁶ Lomba ifyakucita fyakwe Amasaya ifyakusyala-po, ifyakutaŋga nefyakupela-ko, ŵoneni kansi tafililembelwe mwibuku lyamfumu syakuJuda nesyakuIsilaeli?

²⁷ Popele ukufuma kumpindi iyo Amasaya apasucile kukuŵalonda ŵaYawe, aŵantu ŵalimwalicile kuJelusalemi; naye walifyucile ukulukuya kuLacisi; sombi ŵalitumine ukulukumulonda kuLacisi, nekumwipailo'ko.

²⁸ Popele ŵalimubwesesye pali ŵakafwalo, nekumusika pamo naŵawisiŵo mumusi wakuJuda.