2Ifyeŵo 24 - Amashiwi Aba Lesa

¹ Lomba Joasi walikumene imyaka isanu naiŵili ili ataticile ukwikalika aŵantu; naye waliikalicile imyaka amakumi ane muJelusalemi. Kaŵili isina lyaŵanyina niSiŵiya uwakuBeyasyeba.

² Lomba Joasi walukucite'fyo ifiluŋgeme pamenso aŵaYawe insiku syonse isyakwe Jeoyada umupapatilisi.

³ Peŋka Jeoyada walimuŵulile aŵakasi ŵaŵili; naye nekufyala aŵana aŵalalume neŵanakasi.

⁴ Popele, panuma pali fyefyo, paliŵele ati Joasi walilandakenye ukulunjika iŋanda yaŵaYawe.

⁵ Peŋka aliŵuŋgenye aŵapapatilisi neŵena-Lefai, nekulaŵila kuli ŵo ati: Kamuyeni kumisi iyakuJuda, muloŋgele isyakufuma kuŵaIsilaeli ŵonse indalama isyakuwamya iŋanda yaŵaLesa ŵenu imyaka namyaka; kaŵili kamuleŋgesya ati mwaŋgufve ifyaceŵo. Naŋgawe'fyo aŵena-Lefai taŵaaŋgufisye ifyaceco.

⁶ Popele imfumu yalimwitile Jeoyada umukulu, nekulaŵila kuli ye ati: Mbanindo tamufwaile kuŵena-Lefai ati ŵaulete, ukuufumya kuJuda nakuJelusalemi, umusoŋko wakwe Mose, umupyunjisi waŵaYawe, neweŵumba lyaŵaIsilaeli, uwakucitente cakulayana?

⁷ Pakuti aŵana aŵalalume ŵakwe Ataliya, uyomwanakasi uwakuŵifya, kale ŵatoŵawile iŋanda yaŵaLesa, nekuŵaposela ŵaBala ifintu fyonse ifyakunanda yaŵaYawe ifyaposelwe kuli ŵaLesa.

⁸ Popele imfumu yalifundile, naŵo kaŵacita ibokosi, kaŵaliŵika posonde lyamusiko uwakunanda yaŵaYawe.

⁹ Naŵo kaŵatulisya monse muJuda namuJelusalemi, mukuŵenjisisya ŵa Yawe umusoŋko, uyo Mose umupyunjisi waŵaLesa waŵicile paŵaIsilaeli mumpanta.

¹⁰ Popele ifileme fyonse neŵantu ŵonse kaŵasemba, kaŵenjisya, kaŵaposela-mo namwibokosi, ili tawaŋgasilisya.

¹¹ Popele apo, pampindi iyo paletelwe ibokosi muminwe yaŵena-Lefai mukuŵonwa kumfumu, ili ŵabwene ati pali indalama isinji, peŋka umulembesi wamfumu necilolo camupapatilisi umukulu ŵaliisile, nekuloŋgolola-mo mwibokosi, nekulitwala, nekulibwesesya pantu paliko. Ŵalukucite'fyo insiku nansiku, nekuloŋgela indalama mpaŋgana mpaŋgana.

¹² Popele imfumu naJeoyada nekusipela kuli ŵaŵo aŵalukucite'milimo yaŵupyunjisi ubwakunanda yaŵaYawe; naŵo nekufola aŵakwiŵaka kumabwe naŵakalipentala ati ŵawamye iŋanda yaŵaYawe, naŵaŵo kaŵili aŵalukucite'milimo iyakumfitwe neyakuluŵemba ati ŵalunjike iŋanda yaŵaYawe.

¹³ Fyopele'fyo aŵamilimo ŵalicitile, nayo imilimo nekuwamisiwa icine kuli ŵo; lomba waliimicile iŋanda yaŵaLesa koti mekalilo aiyo, nekwikosya.

¹⁴ Popele, ili ŵasilile, ŵaliletele indalama isyasyele-ko pamenso amfumu neakwe Jeoyada; kuli syo ekwacitilwe ifiŋkoloŋkolo ifyakunanda yaŵaYawe, efiŋkoloŋkolo ifyakupyunjisya-ko, nefyakuposela-ko imilambu, nemasupuni, nefiŋkoloŋkolo fyegolide nefyesilifa. Popele apo ŵalukuposela muŋanda yaŵaYawe imilambu yakoca impindi yonse pansiku syonse isyakwe Jeoyada.

¹⁵ Sombi Jeoyada walicekwile nekukumana nensiku isinji, naye nekufwa. Walikumene imyaka umwanda umo nemakumi atatu, pakufwa ye.

¹⁶ Popele ŵalimusicile mumusi wakwe Dafidi pakati pamfumu, pakuti walicitile ifiweme muIsilaeli, nakuli ŵaLesa nenanda yaŵo.

¹⁷ Popele, pakweŵa ati wafwa Jeoyada, paliisile ifileme ifyakuJuda nekwinamisya kumfumu. Nayo imfumu kaifyumfwa.

¹⁸ Popele apo ŵalilekele iŋanda yaŵaYawe, Lesa waŵawisiŵo, nekupyunjila ŵaAsyela nefiŵumbwaŵumbwa; peŋka uŵukali kaŵuficila Juda na Jelusalemi, pakuti pali weyo-mulandu waŵo.

¹⁹ Naŋgawe'fyo ŵaliŵatumine aŵakusimika mukuŵabwesesya kuli ŵaYawe; naŵo kaŵaŵasimicila; sombi taŵasumine ukukutika.

²⁰ Popele umupasi waŵaLesa walimuwilile Sakaliya, umwana wakwe Jeoyada umupapatilisi; naye waliimakene peulu paŵantu, nekulaŵila kuli ŵo ati: ŴaLesa ŵalukulaŵile'fi ati: Mbanindo mulukusilulwila amafunde aŵaYawe, nekuŵulo'kusyuka? Pakuti mwaŵaleka ŵaYawe, ŵo kaŵili ŵamulekeni.

²¹ Peŋka ŵalimwalicile, nekumupama amabwe, koti kufunda kwamfumu, pacaluŵansa icakunanda yaŵaYawe.

²² Fyopele'fyo Joasi imfumu taalaŋgulucile uluse ulo Jeoyada ŵawisi wamucitile, sombi alimwipeye umwana wakwe. Lomba, pakulukufwa, ye ati: ŴaYawe ŋgawalolepo, ŵafwaile-ko.

²³ Popele apo, pakupelo'mwaka, paliŵele ati iŵumba lyafita fyaŵaSilya lyalimuninine; naŵo ŵalificile kuJuda nakuJelusalemi, nekufyonala ifileme fyaŵantu fyonse ukufifumya pakati paŵantu, nekutuma ifyakutapa ifyakuli fyo kumfumu yakuDamasiko.

²⁴ Pakuti iŵumba lyaŵaSilya aŵaisile lyali kaŵumba lukoso kaŵalalume; popele ŵaYawe ŵaliposele muminwe yakako iŵumba ilikulu ukwakuti, pakuti ŵalilekele ŵaYawe, Lesa waŵawisiŵo. Fyopele'fyo lyaJicitile ifyakusinina pali Joasi.

²⁵ Popele apo, ili lyafumine kuli ye, (pakuti lyalimusile ali nemalwasi akulu), aŵapyunjisi ŵakwe umwine ŵalimwalicile, pakuti pamilopa yaŵana ŵakwe Jeoyada umupapatilisi, nekumwipaya paŵulo bwakwe, naye nekufwa; peŋka ŵalimusicile mumusi wakwe Dafidi; sombi taŵamusicile mufyumbwe fyamfumu.

²⁶ Lomba aŵamwalicile niŵaŵa: Sabadi umwana wakwe Simeyati umwanakasi umuAmono, naJeosabadi umwana wakwe Similiti umwanakasi umuMoabi.

²⁷ Ifyaŵana ŵakwe awalalume, nefyaŵukulu bwafipinto ifyatwicilwe pali ye, nefyakwiŵakulula iŋanda yaŵaLesa, ŵoneni, ifyo fililembelwe mufyakuŵulisisya ifyamwibuku lyamfumu. Popele Amasaya umwana wakwe umwalalume waliikalicile pamupunda wakwe.