2Ifyeŵo 23 - Amashiwi Aba Lesa

¹ Popele apo, pamwaka waŵuisanu naiŵili, Jeoyada walilikosesye, nekulayana nefilolo fyamyanda, Asaliya umwana wakwe Yelokami, na lsimeli umwana wakwe Jeokanini, naAsaliya umwana wakwe Obedi, naMayaseya umwana wakwe Adaya, naElisyafati umwana wakwe Sicili.

² Naŵo lomba ŵalukwenenda muJuda, nekuwuŋganya aŵena-Lefai aŵakufuma mumisi yonse iyakuJuda, nempemba syapamananda aŵawisiŵo aŵakuIsilaeli, naŵo nekwisa kuJelusalemi.

³ Peŋka iŵumba lyonse lyalicitile ukulayana nemfumu muŋanda yaŵaLesa. Naye walilaŵile kuli ŵo ati: Woneni, umwana wamfumu akalukwikalika, koti nifyefyo ifi ŵaYawe ŵalaŵile ifyakuŵana aŵalalume ŵakwe Dafidi.

⁴ Icintu ici mukacita nicici: pali mweŵo, iŵumba limo pali atatu ilyakwinjila pali sabata, ilyaŵapapatilisi neŵena-Lefai, likalukuli niŵakalama awakumilyaŋgo;

⁵ kaŵili iŵumba limbi pali atatu likalukuli kunanda yamfumu; nakaŵili iŵumba limbi nalyo pali atatu likalukuli kumusiko uwakucapansi; kaŵili aŵantu ŵonse ŵakalukuli pafyaluŵansa ifyakunanda yaŵaYawe.

⁶ Sombi ŵonse ŵekenjila muŋanda yaŵaYawe, apakuŵula aŵapapatilisi, neŵena-Lefai aŵo awalukupyuŋga; ŵo ŵakenjila, pakuti ŵaliswetelele; sombi aŵantu ŵonse ŵakalukulama ukuceta kwaŵaYawe.

⁷ Kaŵili aŵena-Lefai ŵakalukwisiŋguluke'cine imfumu, ŵonse umo umo nemata muminwe; popele aŵantu ŵonse uyo ukenjila muŋanda ŋgaakepaiwe; mukalukuli pamo nemfumu pakwinjila yo napakufuma yo.

⁸ Popele aŵena-Lefai neŵaJuda ŵonse ŵalicitile koti nifyefyo fyonse ifi afundile Jeoyada umupapatilisi; naŵo ŵonse ŵaliŵulile aŵantu ŵaŵo, aŵo aŵakwinjila pali sabata, naŵaŵo aŵakufuma pali sabata; pakuti Jeoyada umupapatilisi taapalaŋgenye amakoto.

⁹ Naye Jeoyada umupapatilisi alifipele ifilolo fyapamyanda amafumo neŋgawo sinini nesikulu, isyali syamfumu Dafidi, isyali muŋanda yaŵaLesa.

¹⁰ Peŋka aliŵemicile aŵantu ŵonse, ŵonse lukoso umo umo nemata muminwe, ukutatika paluŵali lwananda ulwakulwine ukufika nakuluŵali lwananda ulwakucipiko, ukusesya iconto nenanda, ukulukusiŋguluka imfumu.

¹¹ Popele apo ŵalifumisye umwana wamfumu, nekumufwika namumutwi wakwe umuntinya wawufumu, nekumupelo'kusimika, nekumwikalika ati nimfumu; peŋka Jeoyada neŵana ŵakwe aŵalalume nekumusufya, nekulaŵila ati: ŴaLesa ŋgawapulusye imfumu.

¹² Popele Ataliya, pakumfwa icipupa caŵantu ili ŵaŵutuka nekulukucindika imfumu, alificile kuŵantu muŋanda yaŵaYawe;

¹³ naye nekuceŵuka, lomba kusaŋga nikumfumu iliimakene apepi palupanda lwaiyo kumulyaŋgo, pamo nefilolo nempeŋga muceni camfumu; lomba neŵantu ŵonse aŵamucalo ŵalukusemba, nekulukulisya nempeŋga; neŵakwimba kaŵili nekulukulisya ifyakulisisya-ko, nekutatula ukwimba kwakucindika. Peŋka'po Ataliya alipandawile ifyakufwala fyakwe, nekulukulaŵila ati: Ŵupondo! ŵupondo!

¹⁴ Popele Jeoyada umupapatilisi walifumisye ifilolo ifyapamyanda, ifyaikalicilwe peŵumba, nekulaŵila kuli fyo ati: Ŋgaende pakati pamiloŋgo, lomba aŵantu ŵonse uwakumulonda ŋgaepaiwe kumpoko; pakuti umupapatilisi ati: Tekumwipaila muŋanda yaŵaYawe.

¹⁵ Fyopele'fyo fyalicitile umwakupitila ye; naye waliile kumwinjililo uwakumusiko waŵakafwalo, uwakunanda yamfumu; nafyo nekumwipaila-ko'ko.

¹⁶ Popele Jeoyada walicitile ukulayana pakati pali ye umwine, neŵantu ŵonse, nemfumu, ati ŋgaŵaŵe ŵantu ŵaŵaYawe.

¹⁷ Peŋka aŵantu ŵonse ŵaliile kunanda yakwe Bala, nekwitoŵala, nekusansala ifyonto fyakwe nefiŵumbwaŵumbwa fyakwe, nekwipaya Matani, umupapatilisi wakwe Bala, pamenso afyonto.

¹⁸ Kaŵili Jeoyada waliikalicile ŵufilolo ubwapananda yaŵaYawe muminwe yaŵapapatilisi aŵena-Lefai, aŵo Dafidi aaŵenye muŋanda yaŵaYawe, mukuposa imilambu yakoca iyaŵaYawe, koti nifyefyo ifilembelwe mwifunde lyakwe Mose, nekusemba nekwimba, koti kufunda kwakwe Dafidi.

¹⁹ Kaŵili aliŵekalicile ŵakalama kumilyaŋgo iyakunanda yaŵaYawe, ati ŵeŋgenjila-mo ŵonse aŵantu aŵali nefiko fyonse lukoso neli umo.

²⁰ Popele alipokele ifilolo fyapamyanda, nefileme, neŵekalicisi ŵaŵantu, neŵantu ŵonse aŵamucalo, nekwiselusya imfumu ukwifumya muŋanda yaŵa Yawe; naŵo ŵalipitile pamusiko uwapeulu mukufika kunanda yamfumu, nekwikalika imfumu peteŵe lyaŵufumu.

²¹ Fyopele'fyo aŵantu aŵamucalo ŵonse ŵalukusemba; umusi nawo nekulukukutumene. Ŵalimwipeye Ataliya kumpoko.