2Ifyeŵo 22 - Amashiwi Aba Lesa

¹ Popele apo injikale syakuJelusalemi syalimwikalicile Eyasaya, umwana wakwe umwalalume umwaniceŵantu, ati nimfumu pamupunda wakwe; pakuti iŵumba lyaŵalalume aŵaficile pamo neŵaAlabi kucisasa lyaliŵepeye aŵana aŵakulu ŵonse. Fyopele'fyo Eyasaya, umwana wakwe Jeolami imfumu yakuJuda, waliikalicile aŵantu.

² Eyasaya walikumene imyaka amakumi ane naiŵili, pakutatika ye ukwikalika aŵantu; lomba walukwikalika mu Jelusalemi umwaka'mo. Kaŵili isina lyaŵanyina niAtaliya, umwana umwanakasi wakwe Omili.

³ Kaŵili walukwenda pansila syananda yakwe Eyabi; pakuti ŵanyina eŵakumufunda ukucite'fyakuŵifya.

⁴ Lomba walukucite'fiŵipile pamenso aŵa Yawe, koti nifyefyo ifi ŵacitile awananda yakwe Eyabi; pakuti ŵo ŵali nimpemba syakwe, pakweŵa ati ŵafwa ŵawisi, ukulukumonala.

⁵ Aliendele kaŵili koti kufunda kwaŵo, nekuya pamo nakwe Jeolami, umwana wakwe Eyabi imfumu yakuIsilaeli, mukulwa nakwe Kasayeli, imfumu yakuSilya, kuLamoti-gilyadi. Popele aŵaSilya ŵalimulasile Jolami.

⁶ Naye walibwelele kuJesileyeli mukuposya ifiŵeŋga ifyo ŵamulasile kuLama, pakulwa ye nakwe Kasayeli, imfumu yakuSilya. Popele Asaliya, umwana wakwe Jeolami, imfumu yakuJuda, waliselucile ukuya mukumuŵona Jeolami, umwana wakwe Eyabi, kuJesileyeli, pakuti walukulwala.

⁷ Lomba ukonalwa kwakwe Eyasaya kwalifumine kuli ŵaLesa, pakuti aliile kuli Jolami; pakuti, pakufika ye, alifumine pamo nakwe Jeolami mukulwa nakwe Jiyu umwana wakwe Nimisi, uyo ŵaYawe ŵasufisye ati apinike iŋanda yakwe Eyabi.

⁸ Popele apo, ili alukucita Jiyu umulandu usoŵolwelwe pananda yakwe Eyabi, paliŵele ati alikumene nefileme ifyakuJuda, neŵana aŵalalume ŵaŵakwaŵo Eyasaya, ili ŵalukumupyunjila Eyasaya, naye aliŵepeye.

⁹ Peŋka alukumufwaya-fwaya Eyasaya; lomba kaŵamwikata, (kansi alifiseme muSamalya,) kaŵamuleta kuli Jiyu, kaŵamwipaya; peŋka kaŵamusika, pakuti ŵo ati: Ye mwana wakwe Jeosafati, uwalukuŵafwaisya ŵaYawe nemutima wakwe wonse. Lomba iŋanda yakwe Eyasaya tayakwete-makosa akwikatisya uŵufumu.

¹⁰ Pakweŵa ati Ataliya, ŵanyinaEyasaya, waŵona ati umwana wanji wafwa, waliimine nekonala aŵena-mfumu ŵonse awapananda yakwe Juda.

¹¹ Sombi Jeosyabeata, umwana umwanakasi wamfumu, walimuŵulile Joasi, umwana umwalalume wakwe Eyasaya, nekumwiŵa pakati paŵana ŵamfumu aŵalalume aŵaipailwe, nekumuŵika pamo nemulelesi wakwe mucipinda cakulala-mo. Fyopele'fyo Jeosyabeata, umwana umwanakasi wamfumu Jeolami, umukasi wakwe Jeoyada umupapatilisi, (pakuti ye kansi niŋkasi yakwe Eyasaya,) walimufisile pamenso akwe Ataliya, eŋgesa kumwi paya.

¹² Popele aliikele pamo naŵo ili afiswa muŋanda yaŵaLesa imyaka isanu naumo; lomba Ataliya ye walukwikalika icalo.