2Ifyeŵo 21 - Amashiwi Aba Lesa

¹ Popele apo Jeosafati alilele naŵawisiŵo, nekusikwa pamo naŵawisiŵo mumusi wakwe Dafidi; popele Jeolami, umwana wakwe umwalalume, waliikalicile pamupunda wakwe.

² Lomba uyo wali neŵakwaŵo, aŵana aŵalalume ŵakwe Jeosafati, Asaliya, naJeciyeli, naSakaliya, naAsaliya, naMikayeli, naSyefateya; aŵo ŵonse ewana aŵalalume ŵakwe Jeosafati imfumu yakuIsilaeli.

³ Lomba ŵawisiŵo ŵaliŵapele impese isikulu, isyesilifa nesyegolide nesyafintu ifyamakweŵo apatali, pamo nemisi yamaliŋga muJuda; sombi uŵufumu ŵalimupele Jeolami, pakuti ye muŵele.

⁴ Popele, ili aŵucile Jeolami mukubwikalika uŵufumu bwaŵawisi, nekulukulikosya, aliŵepeye aŵakwaŵo ŵonse kumpoko, pamo nefileme fimbi ifyaku Isilaeli.

⁵ Jeolami walikumene imyaka amakumi atatu naiŵili pakutatika ye ukwikalika; naye walukwikalika muJelusalemi imyaka isa nu naitatu.

⁶ Lomba ye walukwenda pansila yamfumu syakucalo ca Isilaeli, koti nifyefyo ifi yacitile iŋanda yakwe Eyabi; pakuti waliupile umwana umwanakasi wakwe Eyabi, naye nekulukucite'fyo ifiŵipile pamenso aŵaYawe.

⁷ Naŋgawe'fyo ŵaYawe taŵasumine ukonala iŋanda yakwe Dafidi, pakuti pakulayana uko ŵalayene nakwe Dafidi, napakuti kale ŵalayene ukupela inyale kuli ye nakuŵana ŵakwe insiku syonse.

⁸ Pansiku syakwe lomba aŵaEdomi ŵalialucile ukufuma pansi pakuŵoko kwaŵaJuda, nekulicitila imfumu.

⁹ Peŋka Jeolami nekwaŵuka pamo nefilolo fyakwe, neŋgolofwana syakwe syonse pamo nakwe; naye nekwimo'ŵusiku, nekupama aŵaEdomi awamusiŋgulucile, nefilolo ifyapaŋgolofwana.

¹⁰ Fyopele'fyo aŵaEdomi ŵalialucile ukufuma pansi pakuŵoko kwaŵaJuda, ukufika nakukasuŵa kano; kaŵili pampindi yopele'yo aŵaLibina naŵo ŵalialucile ukufuma pansi pakuŵoko kwakwe; pakuti waliŵalekele ŵaYawe Lesa waŵawisi.

¹¹ Nakaŵili alicitile pantu apasuntucile pamapili akuJuda, nekuleŋgesya ati injikale isyamuJelusalemi sicenceme, nekupasusya aŵaJuda.

¹² Popele apo palificile kuli ye icakulemba icakufuma kuli Elaija uwakusimika, ati: ŴaYawe, Lesa waŵaDafidi ŵawisinwe, ŵalukulaŵile'fi ati: Pakuti tamwaendele pansila syaŵaJeosafati ŵawisinwe, neli nipansila syaŵaAsa imfumu yakuJuda;

¹³ sombi mwalukwenda pansila yamfumu syakuIsilaeli, nekuleŋgesya ati aŵaJuda nenjikale isyamujelusalemi sicenceme, koti nifyefyo ifyalukucita aŵakuŋanda yaŵaEyabi; napakuti mwaliipeye aŵakwanu aŵakuŋanda yaŵawisinwe, aŵali ŵaweme aŵakucila napali mweŵo mweŵene;

¹⁴ ŵoneni lomba, ŵaYawe ŵakapama aŵantu ŵenu, neŵana ŵenu, neŵakasi ŵenu, newuwoni bwenu ŵonse, kumwalo ukulu;

¹⁵ kaŵili mweŵene mukaŵa neŵulwasi uŵukulu pakulwala mumala enu, ili taaŋgapona-mo amala enu insiku nansiku, pakuti paŵulwasi bwenu.

¹⁶ Popele apo ŵaYawe ŵaliŵusisye umupasi waŵaFilisiti newaŵaAlabi aŵali muceni caŵaEtiopia mukulwa nakwe Jeolami;

¹⁷ naŵo ŵalininine mukuŵucila Juda, nekupula-mo, nekutwala ifyamaŵoni fyonse ifyabwenwe muŋanda yamfumu, pamo neŵana ŵaiyo aŵalalume, neŵakasi ŵaiyo; fyopele'fyo tapasyele pali yo nemwana umwalalume, apakuŵula Jeyoyakasi, umwana waiyo umwalalume umwanice-ŵantu.

¹⁸ Popele panuma pali fyefyo fyonse, ŵa Yawe ŵalimupamine mumala kuŵulwasi ubwakuŵulo'kuposiwa.

¹⁹ Popele, paku pita impindi, pakusila imyaka iŵili, paliŵele ati amala akwe aliponenemo, pakuti paŵulwasi bwakwe, naye nekufwa kumyalo iyakusomena. Lomba aŵantu ŵakwe taŵamucitile ukoca, koti koca uko ukwaŵawisiŵo.

²⁰ Walikumene imyaka amakumi atatu naiŵili, pakutatika ye ukwikalika; naye walukwikalika mujelusalemi imyaka isanu naitatu. Ye walifumine uwakuŵulo'kufwaiwa. Lomba ŵalimusicile mumusi wakwe Dafidi, sombi taŵamuŵicile mufyumbwe fyamfumu.