2Ifyeŵo 20 - Amashiwi Aba Lesa

¹ Popele apo panuma pali fyefyo, paliŵele ati aŵana ŵakwe Moabi, neŵana ŵakwe Amono, pamo naŵo ŵambi aŵaAmono, ŵaliisile mukulwa na Ieosafati.

² Popele paliisile ŵambi aŵamuŵulile Jeosafati ati: Palukumwisileni iŵumba ilikulu lyakufuma pesilya lyacisiŵa kucalo caSilya; lomba ŵoneni, ŵali kuYasasoni-tamali (wopele eEnigedi).

³ Peŋka Jeosafati nekutina, nekuliteka ukulukuŵafwaya-fwaya ŵaYawe; naye nekutulisya ukulifina monse muJuda.

⁴ Popele aŵaJuda ŵaliwuŋgene mukuŵafwaisya ŵaYawe; ukufuma kumisi yonse iyakuJuda ŵalifumine-mo mukuŵafwaya-fwaya ŵaYawe.

⁵ Popele Jeosafati waliimakene mwiŵumba lyaŵaJuda neŵakuJelusalemi, muŋanda yaŵaYawe, pamenso acaluŵansa icaŵukumo;

⁶ naye nekulaŵila ati: MweŵaYawe, Lesa waŵawisifwe, kansi tamuli niŵaLesa aŵamwiulu? Kansi tamuli nimweŵekalicisi ŵapaŵufumu ŵonse ubwamisyoŵo yaŵantu? Muminwe yenu muli uŵukulu nemakosa, fyopele'fyo tapali-po neli umo uwisi ukumucicileni.

⁷ MweŵaLesa ŵesu, kansi mweŵo tamwalitamfisye injikale isyapacalo cino pamenso aŵantu ŵenu aŵaIsilaeli, nekucipelelela icalo kuŵana ŵakwe Ablaamu iciŵusa cenu?

⁸ Lomba ŵo kaŵalukwikala-mo, kaŵamwiŵacilenimo'mo umulenda uswetelele pakuti pesina lyenu, nekulaŵila ati:

⁹ Kani fitwisile ifyakuŵifya, impoko neli kusinina, neli mwalo, neli kawumbo, elyo tukemakana pamenso anande'yi napamenso enu mweŵo, (pakuti isina lyenu lili munande' yi,) nekulukumulilileni palupensyo lwesu; telyo muŋgomfwa, muŋgapulusya.

¹⁰ Lomba pano, ŵoneni, aŵana ŵakwe Amono neŵakwe Moabi neŵantu ŵakulupili lwaSeyili, aŵo tamwasumine ati aŵaIsilaeli ŵakomeke icalo caŵo, ili ŵafumine mucalo caIjipiti, sombi ŵalipasucile ukuŵaleka, nekuŵulo'kuŵonala;

¹¹ ŵoneni ifi ŵalukutulambula, ukulukwisa mukututamfya mucenu ico mwatupela ati tucipyane.

¹² MweŵaLesa ŵesu, tamukasololola naŵo? pakuti tatukwete-makosa akulwa neŵumbe'li ilikulu ililukutwisila; kaŵili tatwisi ifi tuŋgacita; sombi amenso esu alilolele kuli mweŵo.

¹³ Lomba aŵaJuda ŵonse, pamo neŵanice ŵaŵo, neŵakasi ŵaŵo, neŵana ŵaŵo, ŵaliimakene pamenso aŵaYawe.

¹⁴ Popele apo, pali Yakasieli, umwana wakwe Sakaliya, umwana wakwe Benaya, umwana wakwe Jeyeli, umwana wakwe Matanya, umwina-Lefai, uwapaŵana ŵakwe Asafi, paliisile umupasi waŵaYawe mukati mwiŵumba;

¹⁵ naye ati: Kutikeni, mweŵaJuda mwense, namweŵo mwenjikale syamujelusalemi, namweŵo mwemfumu Jeosafati; ŵaYawe ŵalukulaŵile'fi kuli mweŵo ati: Mwitina mweŵo, neli kususwa pakuti peŵumbe'li ilikulu; pakuti iŋkondo taili yenu, sombi yaŵaYawe.

¹⁶ Mailo mukaŵaselucile. Ŵoneni, ŵalukunina pakutu ntuka kwakuSisi; lomba mukaŵasaŋgana mumpelo yamukolo, apasiŋkamene nempanta yakuYeluweli.

¹⁷ Tacikafwaikwa kuli mweŵo ukulwa muli yiyi; liŵambeni, mwimakane lukoso, muŵone ukupulusya kwaŵaYawe ukwakuli mweŵo, mweŵaJuda namweŵakuJelusalemi; mwitina neli kususwa; mailo mukaŵafumine; pakuti ŵaYawe ŵali pamo namweŵo.

¹⁸ Peŋka Jeosafati waliinamisye napamenso pakwe pansi; kaŵili aŵaJuda ŵonse nenjikale isyakuJelusalemi nekuwila pansi pamenso aŵaYawe, ukulukuŵacindika ŵaYawe.

¹⁹ Kaŵili aŵena-Lefai, aŵapaŵana ŵaŵena-Koyati neŵapaŵana ŵaŵena-Kola, ŵaliimine mukuŵacindika ŵa Yawe, Lesa wakwe Isilaeli, nesiwi ilikulu ukwakuti.

²⁰ Popele ŵaliŵucile ulucelocelo, nekuya kumpanta iyakuTekoa. Lomba, ili ŵaimine, Jeosafati waliimakene nekulaŵila ati: Ŋumfweni, mweŵaJuda namwenjikale isyakuJelusalemi, mupeme-mo muli ŵaYawe, Lesa wenu; fyopele'fyo muŋgakosiwa; mucetekele aŵakusimika ŵaŵo, fyopele'fyo muŋgasyuka.

²¹ Popele, ili afundene neŵantu, waliikalicile awaŋgawembila ŵaYawe, nekulukucindika uŵulombe bwakuswetelela, pakulukwima ŵo pamenso eŵumba lyafita, nekulaŵila ati: Muŵatote ŵaYawe, pakuti iŋkumbu syaŵo syamuyayaya.

²² Popele, pakutatika ŵo ukwimba nekucindika, ŵaYawe ŵaliŵekalicile aŵakuŵaŵelamina aŵana ŵakwe Amono, neŵakwe Moabi, newakulupili lwaSeyili, aŵaficile mukuŵaŵucila aŵaJuda; naŵo kaŵapamwa.

²³ Pakuti aŵana ŵakwe Amono neŵakwe Moabi ŵalisiimine injikale isyakulupili lwaSeyili, ukulukusiipayala nekusyonala lukoso ono ono. Popele, ili ŵasilisye injikale syakuSeyili, ŵonse ŵalukofwansyanya ukutwalansyanya.

²⁴ Popele aŵaJuda, ili ŵaficile kunande'kosele iyakuceta impanta, ŵalitontomekele peŵumba; lomba kusaŋga nikufitumbi ifiwilile pansi; tapali-po neli umo uwapulucile.

²⁵ Popele Jeosafati neŵantu ŵakwe, ili ŵaficile mukutape' fyaŵo, ŵalibwene pakati pali ŵo ubwinji bwaŵuŵile nebwafitumbi, nemabwe amakweŵo apatali, ayo ŵalisompwele, akucila napamakosa aŵo akupinta; lomba ŵaliposele insiku sitatu ukulukutola ifyakutapa, pakuti finji ukwakuti.

²⁶ Pakasuŵa kaŵusine ŵaliŵuŋgene mumukolo waBelakake; pakuti mopelo'mo ŵalicindicile ŵa Yawe; pakuti pali fyefyo isina lyapapo lyaliilicilwe ati mukolo waBelakake nakukasuŵa kalelo.

²⁷ Popele apo ŵalibwelele, aŵalalume ŵonse aŵakuJuda newakujelusalemi, pamo najeosafati uwali pantanjile pali ŵo, mukuya liŵili kujelusalemi nekusemba; pakuti ŵaYawe kansi ŵaŵaleŋgesya ukusembela patupondo twaŵo.

²⁸ Naŵo kaŵafika kujelusalemi, netuŋkoto nemesela nempeŋga, kunanda yaŵaYawe.

²⁹ Peŋka ukuŵatina ŵaLesa kwali paŵufumu ŵonse bwafyalo, ili ŵaumfwile ati ŵaYawe ŵalilwile netupondo twaŵaIsilaeli.

³⁰ Fyopele'fyo uŵufumu bwakwe Jeosafati bwali sobwe; pakuti ŵaLesa ŵakwe ŵalimupele ukutusya ponse ponse.

³¹ Lomba Jeosafati walukuŵekalika aŵaJuda; walikumene imyaka amakumi I atatu naisanu pakutatika ye ukwikalika; naye nekwikalika aŵantu imyaka amakumi aŵili naisanu kuJelusalemi; lomba isina lyaŵanyina niAsuba, umwana wakwe Silici.

³² Lomba Jeosafati walukwenda pansila yakwe Asa ŵawisi; taapasucile-mo, ili alukucite'fyo ifiluŋgeme pamenso aŵaYawe.

³³ Naŋgawe'fyo apasuntucile tapafumisiwe; kaŵili pampindi iyo aŵantu lomba tawaŋgateke'mitima yaŵo kuli ŵaLesa ŵawisiŵo.

³⁴ Lomba ifyakucita ifyakusyala-po ifyakwe Jeosafati, ifyakutaŋga nefyakupela, ŵoneni, fililembelwe mufyeŵo fyakwe Jiyu umwana wakwe Yanani, ifyalembelwe mwibuku lyamfumu syaŵaIsilaeli.

³⁵ Panuma pali fyefyo, Jeosafati imfumu yakuJuda waliliŵambakenye naEyasaya imfumu yakuIsilaeli; uyo wopele walukucite'fyakuŵifya ukwakuti.

³⁶ Waliliŵambakenye kuli yo mukucita amato akuya kuTasisi; lomba ŵalicitile amato kuEsyoni-gebeli.

³⁷ Popele Elyesa umwana wakwe Dodafa uwakuMalesya walisimicile ukumusinina Jeosafati, ati: Pakuti mwaliŵambakanya naEyasaya, ŵaYawe kansi ŵafyonala ifyakucita fyenu. Peŋka amato alitoŵaicile; taesiŵile ukuya kuTasisi.