2Ifyeŵo 2 - Amashiwi Aba Lesa

¹ Popele Solomoni walilandakenye ukulukuliiŵacila isina lyaŵaYawe iŋanda, nekubwiŵacila uŵufumu bwakwe iŋanda kaŵili.

² Naye Solomoni nekutuma aŵalalume amasausande amakumi asanu naaŵili aŵakupinte'fipinto, nemasausande amakumi asanu naatatu aŵakutema pamapili, naŵambi amasausande atatu neŵantu imyanda isanu naumo aŵakuŵaceta.

³ Popele Solomoni walitumine kuli Kulami imfumu yakuTulo, nekulaŵila ati: Koti nifyefyo ifi mwaŵacitile ŵaDafidi ŵatata, nekuŵatumina ŵayelesi mukuŵeŵacila iŋanda yakwikala-mo, ŋgamuncitile fyopele'fyo.

⁴ Ŵoneni ndukuliiŵacila isina lyaŵaYawe Lesa wanji iŋanda, mukuŵaposela, namukocela pamenso aŵo ifinuncile bwino ifyanse, neyasiŋkwa waŵumboni uwansiku syonse, neyamilambu iyakocela incelo nefiŋgulo, napali ŵasabata, napamyensi yamaseŋgo, napafitenje ifyansicilwe ifyaŵaYawe Lesa wesu. Uko ekusololola kwamuyayaya kuŵaIsilaeli.

⁵ Kaŵili iŋanda iyo ndukwiŵaka ikulu; pakuti ŵaLesa ŵesu ŵakulu ukuŵacila ŵonse ŵalesa ŵambi.

⁶ Sombi mbaninani uwisi ukuŵeŵacila iŋanda, kamuŵona iulu neulu lyamaulu tafikumene ukwikala-mo ŵo? Mbaneŵo ninenani lomba, ati niŋgawewacila iŋanda, lintu ili nimukocela pamenso aŵo ifinuncile bwino?

⁷ Pakuti pali fyefyo lomba, muntumine umwalalume uli naŵumfundi ubwakucite'milimo yakwigolide, nakwisilifa, nakuluŵemba, nakumfitwe, naku nsalu ikasicile panini, neikasicile cee, neifitile koti liulu, uli nemano kaŵili akuŵasa, ati akekale naŵamfundi, aŵo ndi naŵo muJuda namu Jelusalemi, aŵo ŵaDafidi ŵatata ŵatumine.

⁸ Muntumine kaŵili ŵayelesi nemiŵelosi nemyalagumi ukufuma kuLebanoni; pakuti ndiisi ati aŵapyunjisi ŵenu ŵali nemano akutema imiti yamatabwa kuLebanoni; popele, ŵoneni, aŵapyunjisi ŵanji ŵakalukuli pamo neŵapyunjisi ŵenu,

⁹ ati ŵakanansicile amatabwa mpaŋgana mpaŋgana; pakuti iŋanda iyo nakwiŵaka ikalukuli ikulu iyakukaŋkamana lukoso.

¹⁰ Lomba ŵoneni, ŋkawapela aŵapyunjisi ŵenu, aŵakutema aŵakupinika ama tabwa, ifyakwesya fyatiligu ifyakupumwa amasausande amakumi aŵili, nefyakwesya fyamabali amasausande amakumi aŵili, nemabati amfaina amasausande amakumi aŵili, nemabati amafuta amasausande amakumi aŵili.

¹¹ Popele Kulami, imfumu yakuTulo, waliasucile pakulemba, uko atumine kuli Solomoni, ati: Nipakuti ŵaYawe ŵalukuŵatemwa aŵantu ŵaŵo, epo ŵamwikalicileni mweŵo ati nimfumu pali ŵo.

¹² Kaŵili Kulami walilaŵile ati: Ŋgaŵalukucindeme ŵaYawe, Lesa wakwe Isilaeli, awaleŋgele iulu necalo capansi, aŵaŵapele ŵaDafidi imfumu umwana wamano, uwiswile akalaŋgo nemilaŋgwe, uŋgawewacila ŵaYawe iŋanda, nekubwiŵacila neŵufumu bwakwe iŋanda.

¹³ Pano lomba natuma umwalalume wamano, uwiswile imilaŋgwe, uwaŵaKulami ŵatata;

¹⁴ uyu emwana wamwanakasi uwapaŵana aŵanakasi ŵakwe Dani, nawisi kaŵili emwalalume wakuTulo; ali naŵumfundi ubwakucite'milimo kwigolide, nakwisilifa, nakuluŵemba, nakumfitwe, nakumabwe, nakufiti, nakunsalu ikasicile panini, neifitile koti liulu, nakunsalu inacile, neikasicile cee; nebwakuŵasa konse, nebwakwalakanya konse; ati akaansicilwe pakati paŵalalume ŵenu aŵamano, napaŵalalume ŵamano aŵaŵasikulu ŵanji, ŵaDafidi ŵawiso.

¹⁵ Pakuti pali fyefyo, lomba tiligu nemabali nemafuta nemfaina, ifyo ŵaeŵele ŵasikulu ŵanji, ŋgaŵafitume kuŵapyunjisi ŵaŵo;

¹⁶ eli tukatema ifiti kuLebanoni, ifinji koti kufwaya kwenu; popele tukamufisisyeni pafyakutumpucila pacisiŵa kuJopa; eli mukafitwala ukufininicila kuJelusalemi.

¹⁷ Popele Solomoni walipendele aŵensu ŵonse aŵali pacalo caIsilaeli, koti kupenda uko uku ŵaŵapendele ŵaDafidi ŵawisi; popele palibwenekele ati ŵalikumene amasausande umwanda umo nemakumi asanu nemasausande atatu nemyanda isanu naumo.

¹⁸ Popele apo aliŵekalicile aŵapali ŵo amasausande amakumi asanu naaŵili aŵakupinte'fipinto, nemasausande amakumi asanu naatatu aŵakutema pamapili, nemasausande atatu nemyanda isanu naumo aŵakuceta aŵakuŵatuma aŵantu imilimo.