2Ifyeŵo 19 - Amashiwi Aba Lesa

¹ Popele apo Jeosafati, imfumu yakuJuda, walibwelele neŵutende kunanda yakwe kuJelusalemi,

² Peŋka Jivu, umwana wakwe Yanani uwakuŵona, walifumine mukumucinsya, nekulaŵila kumfumu Jeosafati, ati: Kansi muŋgasyofwa-ko imbifi, nekuŵatemwa aŵalukuŵafitilwa ŵaYawe? Pakuti pali cici uŵukali ubwakufuma pamenso aŵaYawe ŵuli pali mweŵo.

³ Naŋgawa nifyefyo mulibwenwe muli mweŵo ifintu ifiweme, pakuti mwalifumisye mucalo ŵaAsyela, nekuteko'mutima wenu ukulukufwaya-fwaya ŵaLesa.

⁴ Popele apo Jeosafati walukwikala kuJelusalemi; naye nekuya mukulukwenda-enda pakati paŵantu ukutatika kuBeyasyeba ukufika nakucalo camapili icakuEfilayimi, nekuŵabwesesya kuli ŵaYawe, Lesa waŵawisiŵo.

⁵ Kaŵili waJiŵekalicile aŵasololwesi mucalo monse mumisi yamaliŋga iyakuJuda, imisi namisi,

⁶ nekulaŵila kuwasololwesi, ati: Kamwalakanya bwino ifi mulukucita; pakuti tamulukuŵasololwela aŵantu, mulukuŵasololwela ŵaYawe; ŵo ŵali pamo namweŵo pakusololola.

⁷ Pakuti pali fyefyo pano, ukuŵatonda ŵa Yawe ŋgakuwe pali mweŵo; cenjeleni, muficite; pakuti kuli ŵaYawe Lesa wesu takuli ukusendama, neli musalululo wapaŵantu, neli kupoke'mpese.

⁸ Kaŵili muJelusalemi Jeosafati waJiŵekalicile awena-Lefai neŵapapatilisi nempemba syapamananda aŵawisiŵo muIsilaeli, pakuti pakusololola kwaŵaYawe, napakuti pafyakupicisya, Naŵo ŵalibwelele kuJelusalemi.

⁹ Naye waliŵafundile makosa ati: Mukalukucite'fyo mukuŵatonda ŵaYawe, ukulukutekanya, nemutima uwaminine.

¹⁰ Popele impindi syonse pakufika kuli mweŵo ukupicisya ukwakufuma kuŵakwaŵenu aŵalukwikala mwaŵo mumisi, ukwamilopa nemilopa, nekwefunde necakufundwa, nekwakufunda nekusololola, eli mukaŵacenjesye ati ŵo ŵekaŵa nemulandu kuli ŵaYawe, naŵo uŵukali nekwisa pali mweŵo napaŵakwaŵenu; kamucite'fyo, peŋka tamukalukuli nemulandu.

¹¹ Kaŵili ŵoneni, Amaliya, umupapatilisi umukulu, euli peulu pali mweŵo pafyeŵo fyonse ifyakuli ŵaYawe; naye Sebadya, umwana wakwe lsimeli, impemba yapananda yakwe Juda, ali peulu pali mweŵo pafyeŵo fyonse ifyakumfumu; kaŵili aŵena-Lefai ŵakalukuli filolo pamenso enu. Kamucita nelupata; naŵo ŵaYawe ŋgawekale neŵaweme.