2Ifyeŵo 18 - Amashiwi Aba Lesa

¹ Lomba Jeosafati wali neŵuŵile neŵuleme ubwakuti makosa; naye waliikatene uŵulunda nakwe Eyabi.

² Popele pakupita imyaka imbi waliseucile ukuya kuli Eyabi kuSamalya. Peŋka Eyabi walimwipaile imbelele neŋombe mpaŋgana mpaŋgana, nekuŵepaila neŵantu aŵo ali naŵo, nekumukumbasya ati anine pamo nakwe ukuya kuLamoti-gilyadi.

³ Popele Eyabi, imfumu yakuIsilaeli, walilaŵile kuli Jeosafati, imfumu yakuJuda, ati: Kani mukaya naneŵo mukulwa kuLamoti-gilyadi? Naye nekumwasuka ati: Neŵo ndi koti nimweŵo, aŵantu ŵanji ŵali koti ŵantu ŵenu; tukalukuli nenu muŋkondo.

⁴ Kaŵili Jeosafati walilaŵile kumfumu yakuIsilaeli ati: Ndukumukombeteleni ati mwipusye lelo kwisiwi lyaŵaYawe.

⁵ Popele imfumu yakuIsilaeli yaliwuŋgenye aŵakusimika, aŵalalume imyanda ine, nekulaŵila kuli ŵo ati: Twimine umusi waLamoti-gilyadi mukulwa, kani ncileke? Naŵo ati: Nineni, pakuti ŵaLesa ŵakaupela muminwe yamfumu.

⁶ Sombi Jeosafati ati: Kani tapali pano neŵakusilnika waŵa Yawe, ati twipusye kuli ye?

⁷ Popele imfumu yakuIsilaeli yalilaŵile kuli Jeosafati, ati: Palisyele umuntu umo uyo tuŋgawepusya ŵaYawe kuli ye; sombi ndukumufitilwa, pakuti ye taasimika-po ifiweme ifyakuli neŵo, sombi ifiŵipile impindi yonse. Uyo wopele eMikaya, umwana wakwe lmila. Kumfwa Jeosafati ati: Tekuti imfumu ilaŵile'fyo!

⁸ Peŋka imfumu yakuIsilaeli yaliitile icilolo, nekulaŵila ati: Leta bwaŋgu Mikaya, umwana wakwe lmila.

⁹ Lomba imfumu yakuIsilaeli najeosafati imfumu yakuJuda, ŵoŵilo ŵaliikele pamateŵe aŵo, ŵalifwite ŵakaminsa ŵaŵo ŵamataŋgalo, naŵo ŵaliikele paluŵansa apaswetele apakwinjilila pacilyaŋgwa icakuSamalya; naŵo aŵakusimika ŵonse ŵalukusimika pamenso aŵo.

¹⁰ Popele Sedeciya, umwana wakwe Cenayana, walilicitile amaseŋgo amfitwe, nekulaŵila ati: ŴaYawe ŵalukulaŵile'fi ati: Mukaŵasindika aŵaSilya kuli aya ili tawaŋgasililila.

¹¹ Kaŵili aŵakusimika ŵonse ŵalukusimika koti nifyopele'fyo, ati: Nineni kuLamoti-gilyadi, mukasyuke; pakuti ŵaYawe ŵakaupela umusi muminwe yamfumu.

¹² Popele iŋkalambe'yo, iyaile mukumwita Mikaya, yalilaŵile kuli ye ati: Ŵoneni-ko, amasiwi aŵakusimika alukutulisya ifiweme kumfumu nekanwa kamo; pakuti pali fyefyo ndukumukombeteleni ati isiwi lyenu liŵe koti lyaŵo; kamulaŵile'fiweme.

¹³ Kumfwa Mikaya ati: Koti nifyefyo ifi ŵali nemweo ŵaYawe, ifyo ifi ŵaŋgalaŵila ŵaLesa ŵanji, fveŋke'fyo nakulaŵila.

¹⁴ Popele, ili aficile kumfumu, imfumu yalilaŵile kuli ye ati: Mikaya, tuye kuLamoti-gilyadi mukulwa, kani ncileke? Naye ati: Nineni, musyuke; lomba ŵakapelwa namuminwe yenu.

¹⁵ Lomba imfumu yalilaŵile kuli ye ati: Mbempindi siŋga nakulukukufunda ati ulaŵile kuli neŵo ŵucine bweŋka mwisina lyaŵaYawe?

¹⁶ Kumfwa naye ati: Naŵona aŵaIsilaeli ŵonse walipalaŋganisiwe pama pili, koti nimbelele isitasikwete-mwembesi; peŋka ŵaYawe ati, Aŵa taŵakwete-wisikuluŵo; ŋgawabwelele ŵonse umo umo kumananda aŵo neŵutende.

¹⁷ Popele imfumu yakuIsilaeli yalilaŵile kuli Jeosafati ati: Kansi nsilimuŵulileni ati uyu tekuti asimike ifiweme ifyakuli neŵo sombi ifiŵipile?

¹⁸ Kaŵili Mikaya ati: Pakuti pali fyefyo, umfweni isiwi lyaŵaYawe; Nalibwene ŵaYawe ŵaliikele peteŵe lyaŵo, neŵumba lyonse ilyaŵakwiulu ili ŵemakene kulwine lwaŵo nakucipiko.

¹⁹ Popele ŵaYawe ati: Mbaninani ukamoŋgola Eyabi imfumu yakuIsilaeli, ati anine awile kuLamotigilyadi? Popele umbi kaalaŵile'fi, naumbi naye kaalaŵile'fyo.

²⁰ Popele apo palifumine umbi umupasi, nekwimakana pamenso aŵaYawe, nekulaŵila ati: Neŵo ŋkamoŋgola. Kumfwa ŵaYawe ŵalaŵilakuli wo ati: Nikundo?

²¹ Nawo ati: Ŋkema, ŋkalukuli mupasi wakuŵepa mukanwa kaŵakusimika ŵakwe ŵonse. Naŵo ati: Icine ukamoŋgola, nekucila-po kaŵili; ima, ukacite'fyo.

²² Pakuti pali fyefyo pano, ŵoneni, ŵaYawe ŵaŵika umupasi wakuŵepa mukanwa kaŵaŵa-ŵakusimika ŵenu; kaŵili ŵaYawe ŵalilaŵile'fyakuŵifya ifyakuli mweŵo.

²³ Peŋka'po Sedeciya, umwana wakwe Cenayana, walipalamine nekumupama Mikaya palutoŵo, nekulaŵila ati: Umupasi waŵaYawe waliile mbaisa-nsila ukufuma kuli neŵo mukulaŵila kuli weŵo?

²⁴ Kumfwa Mikaya ati: Ŵona-ko, ukaŵona pakasuŵa ako, pakwinjila weŵo mucipinda icamukati lukoso mukufisama.

²⁵ Popele imfumu yakuIsilaeli yalilaŵile ati: Twaleni Mikaya, mumupinte ukumubwesesya kuli Amoni, icilolo capamusi, nakuli Joasi, umwana wamfumu;

²⁶ mukalaŵile ati: Imfumu ilukulaŵile'fi ati: Mumuŵike uyu-muntu mwikati, mumupele ukulya siŋkwa wakukululuka, nekunwa nemenda akukululuka, ili nsiŋgabwela neŵutende.

²⁷ Kumfwa Mikaya ati: Kani mweŵo mukabwele newutende lukoso, lomba ŵaYawe taŵalaŵile muli neŵo. Naye ati kaŵili: Umfweni, mweŵantu mwense!

²⁸ Fyopele'fyo imfumu yakuIsilaeli na Iecsafati, imfumu yakuJuda, ŵalininine ukuya kuLamoti-gilyadi.

²⁹ Popele imfumu yakuIsilaeli yalilaŵile kuli Jeosafati ati: Nakulisaŋgula nekwinjila muŋkondo; sombi mweŵo mufwale ŵakaminsa ŵenu awamataŋgalo. Fyopele'fyo imfumu yaku Isilaeli yalilisaŋgwile; naŵo kaŵenjila muŋkondo.

³⁰ Lomba imfumu yakuSilya kale yafifundile ifilolo fyapaŋgolofwana syaiyo, ati: Tekulwa neŵacepele neli nineŵacindeme, sombi mulwe nemfumu yakuIsilaeli veŋka.

³¹ Popele apo, ili ifilolo ifyapaŋgolofwana fyamubwene Jeosafati, paliŵele ati fyalilaŵile ati: Nimfumu yakuIsilaeli. Pakuti pali fyefyo fyalialulucile mukulukulwa nakwe; sombi Jeosafati kaaŵilika, naŵo ŵaYawe nekumofwa-ko; lomba ŵaLesa ŵalififumisye kuli ye.

³² Popele apo lomba, ili ifilolo ifyapaŋgolofwana fyabwene ati ye taali nimfumu yakuIsilaeli, fyalibwelele ukuleko'kumutamfya.

³³ Peŋka umbi umuntu walifunine uŵuta bwakwe muŵulemba lukoso, lomba nekwilasa imfumu yaku Isilaeli pakati pamalundo afyakulifuna-ko. Pakuti pali fyefyo yalilaŵile kuwakwensya iŋgolofwana ati: Alulo'kuŵoko koŵe, untwale ukumfumya mwiŵumba; pakuti nalaswo'kwakuti.

³⁴ Popele iŋkondo yalikulile ako-kasuŵa; naŋgaŵe'fyo imfumu yakuIsilaeli yalukuliciŋka-ko paŋgolofwana yaiyo, ukulukulwa neŵaSilya ukufika iciŋgulo. Lomba pampindi yakuwa kwakasuŵa kaifwa.