2Ifyeŵo 17 - Amashiwi Aba Lesa

¹ Popele Jeosafati, umwana wakwe umwalalume, walukwikalika aŵantu pamupunda wakwe, nekulikosya mukwimina Isilaeli,

² Naye waliŵicile ifita monse mumisi yamaliŋga iyakuJuda, nekwikalika ifita ifyakwikalilila mucalo caJuda namumisi iyakuEfilayimi, iyo Asa ŵawisi apokele.

³ Lomba ŵaYawe ŵalukwikala naJeosafati, pakuti walukwenda pansila syakutaŋga isyaŵawisi ŵaDafidi, nekuŵulo'kufwaya ŵaBala;

⁴ sombi walukuŵafwaisya wa Lesa ŵaŵawisi, nekulukwenda mumafunde aŵo, nekuŵulo'kwenda koti kucita kwaŵaIsilaeli.

⁵ Pakuti pali fyefyo ŵaYawe ŵalikosesye uŵufumu muminwe yakwe; popele aŵaJuda ŵonse ŵalimuletele Jeosafati impese; naye wali nemaŵoni neŵuleme ubwinji makosa.

⁶ Kaŵili umutima wakwe walisuntucile pansila syaŵaYawe. Nakaŵili alifumisye pantu apasuntucile naŵaAsyela muJuda.

⁷ Kaŵili, pamwaka waŵuitatu uwakwikalika kwakwe, walitumine ifileme fyakwe, eBenikayili naObadiya naSakaliya naNetanyeli naMikaya, ati fisambisye mumisi yakuJuda;

⁸ napamo naŵo aŵena-Lefai, eSyemaya naNetanya naSebadya naAsayeli naSyemilamoti naJekonatani naAdonija naTobiya naTobadonija, aŵena-Lefai; kaŵili pamo naŵaŵo Elisyama naJeolami, aŵapapatilisi.

⁹ Naŵo ŵalukusambisya muJuda, lomba ŵali nebuku Iyefunde lyaŵaYawe; naŵo nekulukwenda-enda monse mumisi yakuJuda, nekulukusambisya pakati paŵantu.

¹⁰ Popele ukuŵatina ŵaYawe kwaliponene paŵufumu ŵonse bwafyalo ifyasiŋgulucile Juda: fyopele'fyo ŵo tabwamutulile Jeosafati iŋkondo.

¹¹ Popele aŵaFilisiti ŵambi ŵalimuletele Jeosafati impese, nesilifa lyamusoŋko; neŵaAlabi naŵo ŵalimuletele amataŋga, imbelele isyalalume amasausande asanu naaŵili nemyanda isanu naiŵili, naŵapepe amasausande asanu naaŵili nemyanda isanu naiŵili.

¹² Lomba Jeosafati walikulile ukwakuti makosa; naye nekwiŵaka muJuda amananda akulu aŋkondo nemisi yamaŵoni.

¹³ Kaŵili wali nemaŵoni aenji mumisi yakuJuda, neŵalalume ŵaŋkondo, aŵalalume aŵamakosa nelupata, muJelusalemi.

¹⁴ Lomba ukuŵapendo'bwinji koti mananda aŵawisiŵo nikuku: paŵena-Juda ifilolo fyapamasausande, niAdana icilolo, napamo nakwe aŵalalume aŵamakosa nelupata amasausande imyanda itatu;

¹⁵ nekumulonda ye pali Jeokanani icilolo, napamo nakwe aŵalalume amasausande imyanda iŵili nemakumi asanu naa ta tu;

¹⁶ nekumulonda ye pali Amasya, umwana wakwe Sicili, uwaliposele umutima-nteka kuli ŵa Yawe, napamo nakwe aŵalalume aŵamakosa nelupata amasausande imyanda iŵili;

¹⁷ napaŵena-Benjamini, niEliyada, umwalalume uwamakosa nelupata, napamo nakwe aŵalalume amasausande imyanda iŵili, aŵasamicilwe amata neŋgaŵo;

¹⁸ nekumulonda ye pali Jeosabadi, napamo nakwe aŵalalume amasausande umwanda umo nemakumi asanu naatatu aŵaansicilwe ukulwa.

¹⁹ Aŵo eŵaŵo aŵalukwitaŵataŵila imfumu, peulu pali ŵaŵo aŵo imfumu yaŵicile mumisi yamaliŋga monse muJuda.