2Ifyeŵo 16 - Amashiwi Aba Lesa

¹ Pamwaka wamakumi atatu naisanu naumo uwakwikalika kwakwe Asa, lomba Bayasya, imfumu yaŵaIsilaeli, walininine mukuŵemina aŵaJuda, nekwiŵaka Lama, ati aŵakanye ŵonse ati tekufuma neli kwinjila kuli Asa, imfumu yaŵaJuda.

² Peŋka Asa aliŵulile isilifa negolide pafyamakweŵo ifyamuŋanda yaŵaYawe nefyamuŋanda yamfumu, nekulituma kuli Benadadi, imfumu yakuSilya, ati:

³ Pali ukulayana pakati pali neŵo namweŵo, koti nikoko ukwali pakati pali ŵatata naŵawisinwe; ŵoneni, namutumineni isilifa negolide; kamuyeni lomba, mupandule ukulayana kwenu ukwakuli Bayasya, imfumu yaŵaIsilaeli, ati ŋgaafume kuli neŵo.

⁴ Peŋka Benadadi waliyumfwile imfumu Asa, nekutuma ifilolo fyamaŵumba afita fyaiyo mukulwa nemisi yaŵaIsilaeli; naŵo nekupama Ijoni naDani naAbelimayimi, nemisi yamaŵoni yonse iyakuNafitali.

⁵ Popele paliŵele ati Bayasya, pakumfwe'fyo, walilekele ukwiŵaka Lama, nekuleŋgesya ati imilimo yakwe icileke.

⁶ Peŋka Asa imfumu alipokele aŵaJuda ŵonse; naŵo ŵalituntulwile amabwe akuLama nematabwa akuko, ayo aiŵacisye-ko Bayasya; naye Asa aliiŵeke kuli o Geba naMisipa.

⁷ Lomba pampindi iyo Yanani uwakuŵona waliisile kuli Asa imfumu yaŵaJuda, nekulaŵila kuli ye ati: Pakuti mwalukupema-mo mumfumu yaŵaSilya, nekuŵulo'kupema-mo muli ŵa Yawe Lesa wenu, pakuti pali fyefyo iŵumba lyamfumu yaŵaSilya lyapuluka namuminwe yenu.

⁸ Kansi aŵaEtiopia neŵaLubi taŵali liŵumba ilikulu makosa, pamo neŋgolofwana neŵapali ŵakafwalo aŵenji ukwakuti? Naŋgawe'fyo, pakuti mwalukupema-mo muli ŵaYawe, epo ŵaŵapele namuminwe yenu.

⁹ Pakuti amenso aŵaYawe alaŵutuka-ŵutuka ponse pacalo capansi, mukulibwenesya ati ŵalikosele pakuti pali ŵaŵo aŵali nemitima iwaminine kuli ŵo. Pali fifi mwacita ifyakutumpa; pakuti ukufuma kumpindi ino mukalukuli neŋkondo,

¹⁰ Peŋka'po Asa walimufitilwe uwakuŵona, nekumuposa namwikati; pakuti alukumupuputilwa pakuti paceŵo ico. Kaŵili Asa aliŵapensesye ŵambi aŵantu iyo-mpindi yopele.

¹¹ Lomba ŵoneni, ifyakucita fyakwe Asa, nefyakutaŋga nefyakupela-ko, kusaŋga fililembelwe mwibuku lyamfumu syaŵaJuda neŵaIsilaeli.

¹² Popele, pamwaka wakwikalika kwakwe uwamakumi atatu naisanu naine, Asa waliŵele neŵulwasi bwakumakasa; lomba uŵulwasi bwakwe bwalilemene ukwakuti; naŋgawe'fyo, paŵulwasi bwakwe, taafwaile kuli ŵaYawe tau, walifwaile kuŵalaye.

¹³ Popele apo Asa walilele naŵawisiŵo, nekufwa pamwaka wakwikalika kwakwe uwamakumi ane naumo.

¹⁴ Peŋka ŵalimusicile mufyumbwe fyakwe umwine, ifyo aliŵasisye mumusi wakwe Dafidi, nekumulalika paŵulo ubwaiswile ukunuŋka kwanse nefinuncile bwino ifyamikoka namikoka ifyansicilwe kumano aŵakupataŋkanye'fyakunuŋka; popele ŵalimucitile icakoca icikulu makosa.