2Ifyeŵo 15 - Amashiwi Aba Lesa

¹ Popele umupasi waŵaLesa waliisile pali Asaliya umwana wakwe Odedi;

² naye walifumine mukumucinsya Asa, nekulaŵila kuli ye ati: Ŋumfweni mweŵaAsa, mamweŵaJuda mwense, namweŵena-Benjamini: ŵaYawe ŵalukwikala nenu, lintu ili mulukwikala naŵo; kaŵili kani mulukuŵafwaya-fwaya, ŵakaŵonwa kuli mweŵo; sombi kani mukalukuŵaleka, naŵo kaŵili ŵakamulekeni.

³ Lomba impindi isitali aŵaIsilaeli kaŵalukuŵula ŵaLesa ŵacine, kaŵaŵula nemupapatilisi uwakusambisya, kaŵaŵula kaŵili nefunde;

⁴ sombi lintu ili ŵaalulucile pakukululuka kwaŵokuli ŵaYawe, Lesa wakwe Isilaeli, nekulukuŵafwaya-fwaya, telyo ŵaŋgaŵonwa kuli ŵo.

⁵ Kaŵili pampindi isyo tapali-po uŵutende pali woyouwakufuma neli nipali woyo uwakwinjila, sombi ifyakukululusya ifikulu fyali panjikale syonse isyapafyalo.

⁶ Lomba ŵalitoŵaicile umbi umusyoŵo waŵantu ukulukuŵucila umbi nawo, nemusi umbi nekulukuŵucila umbi nawo; pakuti ŵaLesa ŵaliŵakatesye kutusyamo tonse.

⁷ Sombi mweŵo muŵe nemakosa, amaŵoko enu ekaleŵela; pakuti imilimo yenu ikalambulwa.

⁸ Peŋka, ili aumfwile ayo-masiwi nekusimka kwakwe Odedi uwakusimika, Asa walikosesye umutima wakwe, nekufumya ifipakaŵi mucalo caJuda necaBenjamini, namumisi iyo apokele mucalo camapili icakuEfilayimi; kaŵili aliwamisye iconto caŵaYawe, icali pamenso ansense yaŵaYawe.

⁹ Popele aliŵuŋgenye aŵena-Juda neŵena-Benjamini ŵonse, pamo naŵaŵo aŵalukwikalekala naŵo ukufuma kuEfilayimi nakuManase nakuSimyoni; pakuti pakati paŵaIsilaeli paliwilile pali ye aŵenji makosa, ili ŵabwene ati ŵaYawe Lesa wakwe ŵalukwikala nakwe.

¹⁰ Fyopele'fyo ŵaliwuŋganme kuJelusalemi pamwensi waŵuitatu, pamwaka wekumi naisanu uwakwikalika kwakwe Asa.

¹¹ Naŵo akokasuŵa ŵaliŵepaile ŵaYawe imilambu yafyakutapa ifyo ŵaletele, iŋombe imyaanda isanu naiŵili, nembelele amasausande asanu naaŵili.

¹² Popele ŵalicitile ukulayana ukwakufwaya-fwaya ŵaYawe, Lesa waŵawisiŵo, nemitima yaŵo yonse, neŵuntu bwaŵo ŵonse;

¹³ nekulayana ati aŵantu ŵonse, uyo ukakana ukuŵafwaisya ŵaYawe, Lesa wakwe Isilaeli, akepaiwe, naŋgaŵa'ti ucepele neli ucindeme, naŋgawa'ti mwalalume neli mwanakasi.

¹⁴ Popele ŵalilapile kuli ŵaYawe nesiwi ilikulu, neŋgwele, nempeŋga, nemiloli.

¹⁵ Peŋka aŵaJuda ŵonse ŵalisembele pakuti pacilapo; pakuti kansi ŵalilapile nemitima yaŵo yonse nekulukuŵafwaya-fwaya nekukumbwa kwaŵo konse; lomba ŵalibwenwe kuli ŵo: peŋka ŵaYawe ŵaliŵapele ukutusya ponse ponse.

¹⁶ Kaŵili alifumisye Mayaka, ŵanyina Asa imfumu, ati aleke ukwikala ŵuŋgalamwe, pakuti walicitile iciŵumbwaŵumbwa icakunekasya icakwe Asyela; lomba Asa alicitemene iciŵumbwaŵumbwa cakwe, nekucalula lifukutu, nekucoca kukanika kaKedilono.

¹⁷ Sombi tapafumisiwe apasuntucile muIsilaeli; naŋgaŵe'fyo umutima wakwe Asa waliwaminine insiku syakwe syonse.

¹⁸ Popele aliletele muŋanda yaŵaLesa ifyo-fintu ifi ŵaposele ŵawisi kuli ŵaLesa, nafyefyo ifi aposele umwine, isilifa negolide nefiŋkoloŋkolo.

¹⁹ Kaŵili tapali iŋkondo neli imo ukufika napamwaka wakwikalika kwakwe Asa ukwamakumi atatu naisanu.