2Ifyeŵo 14 - Amashiwi Aba Lesa

¹ Fyopele'fyo Abija alilele naŵawisiŵo; lomba ŵalimusicile mumusi wakwe Dafidi; naye Asa umwana wakwe umwalalume waliikalicile aŵantu pamupunda wakwe. Pansiku syakwe icalo cali neŵutende imyaka ikumi.

² Lomba Asa walicitile ifiweme nefiluŋgeme pamenso aŵaYawe Lesa' wakwe;

³ pakuti alifumisye ifyonto fyabwensu, napantu apasuntucile, nekutoŵala impanda syamabwe, nekutema ŵaAsyela;

⁴ nekuŵafunda aŵaJuda ati ŵaŵafwaisye ŵaYawe, Lesa waŵawisiŵo, ŵacite ifunde nefyakufunda.

⁵ Kaŵili alifumisye mumisi yonse iyakuJuda pantu apasuntucile nefiŵumbwaŵumbwa ifyakasuŵa; peŋka uŵufumu bwali neŵutende pamenso akwe.

⁶ Kaŵili aliiŵeke muJuda imisi yamaliŋga; pakuti icalo cali neŵutende, naye taali neŋkondo iyo-myaka; nipakuti ŵaYawe eŵamupele ukutusya.

⁷ Kansi walilaŵile kuŵaJuda ati: Ŋgatwiŵake iyi-misi, tusiŋgulusisye-ko ifiŵumba, nemananda atali akosele, nefiŵi, nemitaŵiko. Icalo cicili pamenso esu, pakuti twalukuŵafwaisya ŵaYawe Lesa wesu. Twaŵafwaisya, naŵo lomba ŵatupela ukutusya ponse ponse. Fyopele'fyo kaŵalukwiŵaka nekulukusyucile.

⁸ Lomba Asa wali neŵumba lyafita ifyapintile iŋgawo nemafumo; aŵakufuma kuJuda ŵalikumene amasausande imyanda itatu; neŵakufuma kuBenjamini naŵo aŵapintile iŋgawo isikulu nekufuna amata, ŵalikumene amasausande imyanda iŵili nemakumi asanu naa ta tu; ŵonse aŵo ŵali ŵalalume ŵamakosa nelupata.

⁹ Popele palifumine mukuŵaŵucila Syala umuEtiopia pamo neŵumba lyafita ifyakukumana aŵantu imilyoni neŋgolofwana syaŋkondo imyanda itatu; naye walificile kuMalesya.

¹⁰ Popele Asa walifumine mukukumana nakwe, naŵo ŵaliliŵambile mukulwa mumukolo waSefata kuMalesya.

¹¹ Popele Asa alililile kuli ŵaYawe Lesa wakwe, nekulaŵila ati: MweŵaYawe, tapali-po naumbi utaali nimweŵo uwakofwa-ko, pakati pawamakosa nawoyo utaakwete-makosa; mweŵaYawe, Lesa wesu, mutofwe-ko; pakuti tulukupema-mo muli mweŵo; lomba nimwisina lyenu emo twaliisila iŵumbe'li. MweŵaYawe, nimweŵaLesa ŵesu; tekusumina ati aŵantunsi ŵacile pali mweŵo.

¹² Fyopele'fyo ŵaYawe ŵalipamine aŵaEtiopia pamenso akwe Asa, napamenso aŵaJuda; naŵo aŵaEtiopia kaŵaŵundumuka.

¹³ Peŋka Asa neŵantu aŵo ali naŵo ŵaliŵatamfisye ukufika nakuGelala; lomba paliwile aŵapaŵaEtiopia aŵenji makosa, fyopele'fyo taŵaisiŵile ukuliŵusya; pakuti ŵalionawilwe ono ono pamenso aŵaYawe, napamenso eŵumba lyaŵo; peŋka aŵantu ŵalitwite ifyakutapa ifinji ifyakuti.

¹⁴ Kaŵili ŵalipamine imisi yonse iyasiŋgulucile kuGelala; pakuti ukuŵatina ŵaYawe kwalificile pali ŵo; lomba aŵantu ŵalitapile fyonse ifyamumisi; pakuti muli yo mwali ifyakutapa ifinji.

¹⁵ Kaŵili ŵalipamine nefimpata fyaŋombe, nekutwala imbelele mpaŋgana mpaŋgana, neŋgamela, nekubwelela kuJelusalemi.