2Ifyeŵo 13 - Amashiwi Aba Lesa

¹ Pamwaka wekumi naisanu naitatu wakwikalika kwamfumu Jeloboami, Abija walitaticile ukwikalika Juda.

² Alukwikalika mujelusalemi imyaka itatu; isina lyaŵanyina niMikaya umwana umwanakasi wakwe Ulieli uwakuGibea. Lomba pali iŋkondo pakati pali Abija naJeloboami.

³ Popele Abija walitulile iŋkondo, wali neŵumba lyaŵalalume ŵaŋkondo aŵalupata, eŵalalume aŵasalulwilwe amasausande imyanda ine; kaŵili Jeloboami naye nekulukuliŵamba mukulwa nakwe, wali neŵalalume aŵasalulwilwe amasausande imyanda isanu naitatu, aŵalalume ŵamakosa nelupata.

⁴ Popele Abija waliiminine palupili lwaSemalayimi, ululi pacalo camapili icakuEfilayimi, nekulaŵila ati: Ŋumfweni, weleloboami namweŵaIsilaeli mwense;

⁵ kansi tamulielelwe ukwisiŵa ati ŵaYawe, Lesa wakwe Isilaeli, ŵalimupelelele Dafidi uŵufumu bwapaIsilaeli, mukumupela ye nekuŵapela aŵana ŵakwe aŵalalume mukulayana kwamucele?

⁶ Naŋgawe'fyo Jeleboami, umwana wakwe Nebati, umupyunjisi wakwe Solomoni umwana wakwe Dafidi, waliimine nekuŵaalucila ŵawisikulu.

⁷ Popele paliwuŋganine kuli ye aŵalalume ŵalukoso, aŵana ŵakwe Belyali, aŵalikosesye mukumuŵucila Leyoboami umwana wakwe Solomoni, ili Leyoboami acili mwanice uwamutima unacile, nekuŵulo'kwisiŵa ukuŵacicila.

⁸ Lomba pano mweŵo mulukweŵa'ti muŋgacicila uŵufumu bwaŵaYawe muminwe yaŵana ŵakwe Dafidi aŵalalume; kaŵili mweŵo muli liŵumba ilikulu makosa; nakaŵili muli naŵo aŵombe ŵegolide aŵo amucitileni Jeloboami ati niŵalesa.

⁹ Kansi tamwalitamfisye aŵapapatilisi ŵaŵaYawe, aŵana ŵakwe Aleni, neŵena-Lefai, nekulicitila aŵapapatilisi koti mekalilo aŵantu ŵafyalo? Fyopele'fyo kansi aŵantu ŵonse uyo uwakwisa mukuli posa, ali nemusune umwana nembelele isyalalume sisanu nasiŵili, wopele euŋgawamupapatilisiuwakuli ŵaŵoaŵataŵali niŵalesa.

¹⁰ Sombi fweŵo, ŵaYawe niŵaLesa ŵesu; tatuŵalekele, fweŵone; kaŵili tuli neŵapapatilisi aŵalukuŵapyunjila ŵaYawe, aŵana ŵakwe Aloni, neŵena-Lefai pamilimo yaŵo;

¹¹ lomba ŵo insiku syonse ulucelo neciŋguto ŵalaŵalasisya ŵaYawe imilambu yakoca nefinuncile bwino ifyanse; kaŵili ŵalateka bwino petebulu iliswetele siŋkwa waŵumboni, necakuteka-po inyale icegolide pamo nenyale syakuko, mukwaka ifiŋgulo fyonse; pakuti fweŵo tulalama ukufunda kwaŵaYawe Lesa wesu; sombi mweŵo mwaŵaleka.

¹² Lomba woneni, ŵaLesa tuli naŵo, ŵalukututanjilila, pamo neŵapapatilisi ŵaŵo aŵali nempeŋga syaŋgwele mukumuweleleni iŋgwele, Mweŵana ŵakwe Isilaeli, tekulwa naŵaYawe, Lesa waŵawisinwe; pakuti tekuti mukasyuke, mweŵone.

¹³ Sombi Jeloboami walileŋgesye ati awakuwawelamina ŵapitile munuma yaŵo; fyopele'fyo ŵali pamenso paŵaJuda, neŵakuŵelama naŵo ŵali munuma yaŵo.

¹⁴ Popele, pakusyoloka aŵaJuda, kusaŋga ukulwa kwali pantanjile napanuma pali ŵo kaŵili. Peŋka kaŵaŵalilila ŵaYawe, neŵapapatilisi naŵo kaŵalisya nempeŋga,

¹⁵ Popele apo aŵalalume ŵakuJuda ŵaliŵilicisye; lomba, ili ŵaciŵilicisya aŵalalume ŵakuJuda, paliŵele ati ŵaLesa ŵalipamine Jeloboami neŵaIsilaeli ŵonse pamenso akwe Abija neŵaJuda.

¹⁶ Popele aŵana ŵakwe Isilaeli ŵaliŵundumucile pamenso aŵaJuda; naŵo ŵaLesa nekuŵapela namuminwe yaŵo.

¹⁷ Peŋka Abija neŵantu ŵakwe ŵaliŵepayawile kukwipayala ukukulu; fyopele'fyo paliwilile aŵakwipaiwa ŵaŵalsialaeli aŵalalume aŵasalulwilwe amasausande imyanda isanu.

¹⁸ Fyopele'fyo pampindi iyo aŵana ŵakwe Isilaeli ŵalikomekelwe, naŵo aŵana ŵakwe Juda nekucila-po, pakuti ŵo ŵalukucetekela muli ŵaYawe, Lesa waŵawisiŵo.

¹⁹ Popele Abija walimutamfisye Jeloboami, nekupokolola kuli ye imisi, Beteli pamo natumisi twakuko, na Yesyana pamo natumisi twakuko.

²⁰ Kaŵili Jeloboami taapokele liŵili amakosa pansiku syakwe Abija; naŵo ŵaYawe nekumupama, naye nekufwa.

²¹ Sombi Abija waliŵele nemakosa akuti nekuupa aŵakasi ikumi naŵane, nekufyala aŵana aŵalalume amakumi aŵili naŵaŵili, neŵana aŵanakasi ikumi naŵasanu naumo.

²² Lomba ifyakucita fyakwe Abija ifyakusyala-po, nensila syakwe, nefyakulaŵila fyakwe, fililembelwe mucakuŵulisisya cawakusimika Ido.