2Ifyeŵo 12 - Amashiwi Aba Lesa

¹ Popele apo, pakwikalikwa uŵufumu bwakwe Leyoboami, naye pakukosa too, paliŵele ati alilekele ifunde lyaŵaYawe, neŵaIsilaeli naŵo ŵonse pamo nakwe.

² Popele lomba, pamwaka wamfumu Leyoboami uwaŵuisanu, Sisyaci imfumu yakuIjipiti walininine mukulwa naJelusalemi, pakuti ŵaliŵasilulwile ŵaYawe;

³ alificile neŋgolofwana syaŋkondo imyanda ikumi naiŵili neŵapali ŵakafwalo amasausande amakumi asanu nalimo; kaŵili aŵantu aŵafumine kuIjipiti pamo nakwe ŵali mpaŋgana mpaŋgama aŵakuŵulo'kupendeka, aŵaLubi neŵaSuci neŵaEtiopia.

⁴ Peŋka aJipokele imisi yamaliŋga iyali kuJuda, nekufika nakuJelusalemi.

⁵ Popele Syemaya uwakusimika walificile kuli Leyoboami nakufileme ifyakuJuda, ifyawuŋganine kuJelusalemi pakuti pali Sisyaci, nekulaŵila kuli ŵo ati: ŴaYawe ŵalaŵile'fi ati: Mwandeka, pakuti pali fyefyo naneŵo kaŵili namulekeni muminwe yakwe Sisyaci.

⁶ Peŋka'po ifileme ifyakuIsilaeli pamo nemfumunekulicefya; naŵoati: ŴaYawe ŵaliluŋgeme.

⁷ Popele, ili ŵaYawe ŵabwene ati ŵalicefya, isiwi lyaŵaYawe lyalificile kuli Syemaya, ati: Wo ŵalicefya; tekuti mbonale, yo; sombi ŋkaŵapela pampindi inini ukupuluka; lomba ukufitwa kwa nji tekuti kuketulwilwe pajelusalemi kuminwe yakwe Sisyaci.

⁸ Naŋgawe'fyo ŵakalukuli ŵapyunjisi ŵakwe; ati ŵakesiŵe ukumpyunjila neŵo, nekuŵupyunjila uŵufumu bwafyalo.

⁹ Fyopele'fyo Sisyaci, imfumu yakuIjipiti, waliwimine umusi wajelusalemi, nekupokolola ifyamakweŵo apatali ifyamuŋanda yaŵaYawe, nefyamakweŵo apatali ifyamuŋanda yamfumu; alifipokolwele fyonse lukoso, nekusipokolola kaŵili neŋgawo syegolide isyo acitile Solomoni.

¹⁰ Popele imfumu Leyoboami yalicitile iŋgaŵo syaluŵemba pamupunda wasiko, nekusisisya kuminwe yafilolo fyaŵakalama, aŵalukulama umulyaŋgo uwakunanda yamfumu.

¹¹ Popele paliŵele ati, impindi syonse isyakwinjila imfumu muŋanda yaŵaYawe, ŵakalama ŵaliisile nekusipinta, nekusibwelesya mucipinda caŵakalama.

¹² Lomba ili yalicefesye, ukufitwa kwaŵaYawe kwaliifutatile, ŵeŋgesa mukuyonala ono ono; kaŵili muJuda mwali nefintu ifiweme.

¹³ Fyopele'fyo imfumu Leyoboami yalilikosesye muJelusalemi, nekulukwikalika aŵantu; pakuti imyaka yakwe Leyoboami yalikumene amakumi ane nemwaka umo peulu, ili ataticile ukwikalika; naye waliikalicile aŵantu imyaka ikumi naisanu naiŵili mujelusalemi, umusi uyo ŵaYawe ŵasalulwile pakati pafikoto fyonse ifyakwe Isilaeli mukuŵika-mo'mo isina lyaŵo; kaŵili isina lyaŵanyina niNayama umwanakasi umuAmono.

¹⁴ Lomba walicitile ifyakuŵifya, pakuti taatekele umutima wakwe mukuŵafwaya-fwaya ŵaYawe.

¹⁵ Lomba ifyo ifi acitile Leyoboami, ifyakutaŋga nefyakupela, tafililembelwe mufyeŵo fyakwe Syemaya uwakusimika nefyakwe Ido uwakuŵona, koti mekalilo afitentekwa? Lomba pali neŋkondo pakati pali Leyoboami neleloboami insiku syonse.

¹⁶ Naye Leyoboami nekulala naŵawisiŵo, nekusikwa mumusi wakwe Dafidi; lomba Abija, umwana wakwe umwalalume, nekwikalika aŵantu pamupunda wakwe.