2Ifyeŵo 11 - Amashiwi Aba Lesa

¹ Peŋka Leyoboami, ili aficile kuJelusalemi, aliwuŋgenye iŋanda yakwe Juda neyakwe Benjamini, aŵalalume aŵasalulwilwe amasausande umwanda umo nemakumi asanu naatatu, ifita fyalupata, mukulwa naIsilaeli, mukubwesesya uŵufumu kuli Leyoboami.

² Sombi isiwi lyaŵaYawe lyalificile kuli Syemaya umuntu waŵaLesa, ati:

³ Kolaŵila kuli Leyoboami, umwana wakwe Solomoni, imfumu yakuJuda, nakuŵaIsilaeli ŵonse aŵali muJuda namuBenjamini, ati:

⁴ ŴaYawe ŵalaŵile'fi ati: Tekuti munine neli kulwa neŵakwaŵenu; mwense umo umo mubwelele kumananda enu; pakuti ici-ceŵo cafuma kuli neŵo. Fyopele'fyo ŵalikuticile amasiwi aŵaYawe, nekubwela kukumuŵucila Jeloboami.

⁵ Popele Leyoboami waliikele muJelusalemi, nekwiŵaka imisi iyakulifuninamo muJuda,

⁶ Aliiŵeke naBetelemi, naEtami, naTekoa,

⁷ naBeta-suli, naSoco, naAdulami,

⁸ naGati, naMalesya, naSifi,

⁹ naAdolayimi, naLacisi, naAseka,

¹⁰ naSaleya, naAjaloni, naEbiloni, iyili muJuda namuBenjamini, imisi yamaliŋga,

¹¹ Kaŵili alikosesye pantu apakulwila-mo, nekuwika-mo'mo ifilolo, nefyakulya ifyakuloŋgela, nemafuta nemfaina.

¹² Kaŵili mumisi yonse umo umo waliŵicile iŋgaŵo nemafumo, nekwikosya ukwakuti. Lomba aŵena-Juda neŵena-Benjamini ŵali ŵakwe.

¹³ Popele aŵapapatilisi neŵena-Lefai aŵali monse muIsilaeli ŵaliisile kuli ye ukufuma monse mumupaka waŵo.

¹⁴ Pakuti aŵena-Lefai ŵalilekele imitala yaŵo necaŵupyani bwaŵo, nekwisa kuJuda nakuJelusalemi; pakuti Jeloboami neŵana ŵakwe aŵalalume ŵaliŵatamfisye mukuŵacitila ŵaYawe imilimo yaŵupapatilisi;

¹⁵ naye waliliikalicile aŵapapatilisi aŵapantu apasuntucile, neŵaŵapepe, neŵaŵombe aŵo aŵumbile.

¹⁶ Popele, panuma pali ŵo, aŵakufuma mufikoto fyonse ifyaŵaIsilaeli, palificile kuJelusalemi mukuŵepaila imilambu ŵaYawe Lesa waŵawisiŵo, aŵatekele imitima yaŵo mukuŵafwayafwaya ŵaYawe ŵakwe Isilaeli.

¹⁷ Fyopele'fyo ŵo ŵalikosesye uŵufumu bwakuJuda, nekumukosya Leyoboami umwana wakwe Solomoni imyaka itatu; pakuti ŵo ŵalukwenda imyaka itatu pansila yakwe Dafidi neyakwe Solomoni.

¹⁸ Popele apo Leyoboami waliupile umukasi, Makalati umwana umwanakasi wakwe Yelimoti, umwana umwalalume wakwe Dafidi, newakwe Abikayili umwana umwanakasi wakwe Elyabi, umwana wakwe Jese;

¹⁹ lombo'yo-mwanakasi walimufyalile aŵana aŵalalume, Yeusi naSyemaliya naSayami.

²⁰ Lomba panuma pali ye, aliupile Mayaka umwana umwanakasi wakwe Abisalomi; naye walimufyalile Abija naAtai naSisya naSyelomiti.

²¹ Lomba Leyoboami walitemenwe Mayaka, umwana wakwe Abisalomi, ukucila napaŵakasi ŵakwe ŵonse napaŵanakasi ŵakwe lukoso; (pakuti ye waliupile aŵakasi ikumi naŵasanu naŵatatu, nekupoka lukoso aŵanakasi ŵambi amakumi asanu nalimo, nekufyala aŵana aŵalalume amakumi aŵili naŵasanu naŵatatu neŵana aŵanaka si amakumi asanu nalimo.)

²² Peŋka Leyoboami walimwikalicile Abija, umwana wakwe Mayaka, ati aŵe mukulu, ecileme pakati paŵakwaŵo; pakuti walukufwayo'kumwikalika ati nimfumu.

²³ Kaŵili alicitile nemano, nekuŵapalaŋganisya aŵana ŵakwe aŵalalume ŵonse monse mufyalo fyaJuda naBenjamini, kumisi yonse iyamaliŋga; naye nekuŵapela ifyakulya ifinji. Kaŵili aliŵafwaile aŵakasi aŵenji.