2Ifyeŵo 10 - Amashiwi Aba Lesa

¹ Popele Leyoboami waliile kuSyekemi mukumwikalika ati nimfumu,

² Popele apo, ili aumfwile'fyo Jeloboami umwana wakwe Nebati, (pakuti wali kuIjipiti, uko wafyucile ukufuma pamenso amfumu Solomoni,) lomba Jeloboami walibwelele ukufuma kuIjipiti.

³ Peŋka ŵalitumine nekumwita; naye Jeloboami pamo neŵaIsilaeli ŵonse nekufika, nekulaŵila kuli Leyoboami, ati:

⁴ Ŵawiso ŵalilemesye icikoŋkoli cesu; pakuti pali fyefyo lomba kamupufya uŵupyunjisi uŵukatesye bwaŵawiso, necikoŋkoli caŵo icilemene ico ŵatutwicile, telyo tuŋgamupyunjileni.

⁵ Naye walilaŵile kuli ŵo ati: Mukabwelele kuli neŵo pakupita insiku sitatu, Naŵo aŵantu nekukumbuluka.

⁶ Peŋka imfumu Leyoboami nekwipusyansyanya neŵalalume aŵacekulu aŵalukwimakana pamenso akwe Solomoni ŵawisi, ili acili nemweo, ati: Mbamulukumfunde'ndo ati mbaasuke syani aŵaŵantu?

⁷ Naŵo nekulaŵila kuli yo ati: Kani muŵaŵele uluse aŵa-ŵantu, muŵatotesye, mulaŵile kuli ŵo amasiwi aweme, eli ŵakaŵa ŵapyunjisi ŵenu insiku pee.

⁸ Sombi yo yalilekele ukufunda kwaŵacekulu, uko ŵaifundile, nekwipusyansyanya newasaŋkwa aŵakulile pamo nayo, aŵalukwimakana pamenso aiyo.

⁹ Nayo nekulaŵila kuli ŵo ati: Mbamulukufunde'ndo ati tuŵaasuke syani aŵa-ŵantu, aŵalaŵile kuli neŵo ati, Kamupufya icikoŋkoli ico ŵatutwicile ŵawiso?

¹⁰ Peŋka awasaŋkwa, aŵakulile pamo nayo, ŵalilaŵile kuli yo ati: Kamulaŵila kuŵantu aŵalaŵile kuli mweŵo ati, Ŵawiso ŵalilemesye icikoŋkoli cesu, sombi ŋgamutupufisye co; kamulaŵila ifyakuŵe'fi ati: Akanyansa kanji kali nemutika uwakucila-po napaluŵunda lwaŵatata.

¹¹ Lomba pano ifi ŵatata ŵamutwicileni necikoŋkoli icilemene, neŵo ŋkalunda-po pacikoŋkoli cenu; ŵatata ŵalukumupameni kufikoti, sombi neŵo ŋkamupameni kuli ŵaŋkalaŋoŋgo.

¹² Fyopele'fyo Jeloboami neŵantu ŵonse ŵaliisile kuli Leyoboami pakasuŵa kaŵusitatu koti kulaya kwamfumu, pakweŵa ati, Mukabwelele kuli neŵo pakasuŵa kaŵusitatu.

¹³ Popele imfumu yaliŵaasucile newuŋgwa: nayo imfumu Leyoboami nekuleka ukufunda kwaŵacekulu,

¹⁴ nekulaŵila kuli ŵo koti kufunda kwawasaŋkwa, ati: Ŵatata ŵalilemesye Icikoŋkoli cenu, sombi neŵo ŋkalunda-po apo; ŵatata ŵalukumupameni kufikoti, sombi neŵo ŋkamupameni kuli ŵaŋkalaŋoŋgo.

¹⁵ Fyopele'fyo imfumu tayakuticile aŵantu; pakuti fyalicitilwe kuli ŵaLesa, ati ŵaYawe ŵekalike isiwi lyaŵo, ilyo ŵalaŵile kukuŵoko kwakwe Ayija umuSilo kuli Jeloboami umwana wakwe Nebati.

¹⁶ Popele ili aŵaIsilaeli ŵonse ŵabwene ati imfumu tailukutukutika, aŵantu ŵaliyasucile imfumu ati, Mbacisa-cakwaŵana tuli naco muli Dafidi? Kaŵili tatukwete neli ŵupyani mumwana wakwe Jese. Kumasema enu, mwense mweŵalalume, mweŵaIsilaeli! Pano kamuliansicila iŋanda yenu, mweŵene, mweŵaDafidi! Fyopele'fyo aŵaIsilaeli ŵonse ŵalikumbulucile ukuya kumasema aŵo.

¹⁷ Sombi ifyaŵana ŵakwe Isilaeli, aŵalukwikala mumisi yakuJuda, Leyoboami walukuŵekalika ŵo.

¹⁸ Popele apo imfumu Leyoboami yalitumine Adolami uwali pamilimo yamusoŋko; peŋka aŵana ŵakwe Isilaeli ŵalimupamine kumabwe, naye nekufwa. Nayo imfumu Leyoboami nekwaŋgufyo'kuninina kuŋgolofwana yaiyo nekuŵutucila kuJelusalemi.

¹⁹ Fyopele'fyo aŵaIsilaeli nekuyalucila iŋanda yakwe Dafidi ukufika nakuli kakano-kasuŵa.