1Samweli 31 - Amashiwi Aba Lesa

¹ Lomba aŵaFilisiti ŵalukulwa neŵaIsilaeli; nafyo ifita fyaŵaIsilaeli fyaliwutucile ukufuma pamenso aŵaFilisiti, nekuwa ifiipailwe palupili lwaGilibowa.

² Peŋka aŵaFilisiti ŵaliŵalondelele Saulu neŵana ŵakwe aŵalalume; naŵo aŵaFilisiti ŵaliŵepeye Jonafani naAbinadabi naMelecisyua, aŵana ŵakwe Saulu.

³ Lomba ukulwa kwalukumupensya Saulu, naŵo aŵamifwi ŵalikumene nakwe; lomba ye walipeŋgele ukwakuti pakuti paŵamifwi.

⁴ Peŋka Saulu kaalaŵila kuwakumupintile'fyaŋkondo ati, Somona impoko yoŵe untibwisye nayo; ŵeŋgesa aŵa aŵakuŵule'cisilamu kufika nekuntibwisya nekuntoŋgala. Sombi uwakumupintile' fyaŋkondo walikene, pakuti walukutino' kwakuti. Pakuti pali fyefyo Saulu waliŵulile impoko yakwe nekuwila-po.

⁵ Peŋka uwakumupintile'fyaŋkondo, pakuŵona ati Saulu wafwa, naye fyopele'fyo waliwilile pampoko yakwe, nekufwila pamo nakwe.

⁶ Fyopele'fyo kaŵafwila pamo Saulu, neŵana ŵakwe aŵalalume ŵotatu, newakumupintile'fyaŋkondo, neŵantu ŵakwe ŵonse ako-kusuŵa kopele.

⁷ Lomba aŵaIsilaeli aŵali pesilya lyamukolo naŵaŵo aŵali pesilya lyajodeni, ili ŵabwene ati ifita fyaŵaIsilaeli filukuŵundumuka, nekuŵona ati Saulu neŵana ŵakwe aŵalalume ŵalifwile, ŵalisile imisi nekuŵutuka; naŵo aŵaFilisiti ŵaliisile nekwikala-mo.

⁸ Lomba ŋgamailo, paku fika aŵaFilisiti mukufula ifyakufwala fyaŵafwile, ŵaliŵabwene Saulu neŵana ŵakwe ŵotatu aŵawilile palupili lwaGilibowa.

⁹ Naŵo nekumuteto'mutwi Saulu, nekufula ifyakwe ifyakulilamina-mo, nekutuma kucalo caŵaFilisiti apasiŋgulucile mukutwale'fyeŵo kunanda yafiŵumbwaŵumbwa fyaŵo nakuŵantu.

¹⁰ Lombe' fyakwe ifyakulilamina-mo ŵalifiŵicile muŋanda yakwe Asitaloti; kaŵili umuŵili wakwe ŵalikoŵekele kuciŵumba celiŋga ilyakuBetasyani.

¹¹ Peŋka'po ili ŵaumfwile aŵantu aŵakuJabesi-gilyadi ifyakwe ifi ŵamucitile Saulu aŵaFilisiti,

¹² aŵamitima ikosele aŵalalume ŵonse ŵaliimine nekwenda uŵusiku ŵonse, nekukoŵola icitumbi cakwe Saulu nefitumbi fyaŵana ŵakwe kwiliŋga ilyakuBetasyani; naŵo kaŵafika ku Jabesi nekufyocela apo.

¹³ Lomba ŵaliŵulile amafupa aŵo nekwasika munsi mumuti kujabesi, lomba nekulukukane'fyakulya insiku sisanu nasiŵili.