1Samweli 1 - Amashiwi Aba Lesa

¹ Lomba ekwali umuntu umbi uwakuLamatayimi-sofimi, uwakucalo camapili icakuEfilayimi, isina lyakwe niElikana, umwana wakwe Yelokami, umwana wakwe Eliyu, umwana wakwe Toyu, umwana wakwe Sufi, umwina-Efilayimi;

² kaŵili wali neŵakasi ŵaŵili; isina lyakwe umbi niAna, nesina lyakwe umbi naye niPenina; lomba Penina wali neŵana, sombi Ana taali-po neŵana neli umo.

³ Kaŵili uyo-mwalalume walukufuma mumusi mwaŵo imyaka namyaka, nekuya mukucindika ŵaYawe ŵamaŵumba nekuŵaposele'milambu iyakwipaya kuSilo. Nakaŵili eko ŵali aŵana ŵakwe Eli, Yofini naFinekasi, aŵapapatilisi aŵakuli ŵaYawe.

⁴ Popele, pakufika akasuŵa akakupose'milambu Elikana, aliŵaaŵenye Penina umukasi wakwe neŵana ŵakwe ŵonse aŵalalume neŵanakasi;

⁵ sombi Ana ye alimwaŵenye kuŵili; pakuti alimutemenwe Ana; sombi ŵaYawe eŵamwisele munda.

⁶ Popele umukasi umuŵyakwe walukumukatasyo' kwakuti ati ŋgalukuŵombomene, pakuti ŵaYawe eŵamwisele munda.

⁷ Popele fyopele'fyo ifi acitile umulume imyaka namyaka, pakuya Ana kuŋanda yaŵaYawe, koti nifyopele'fyo kaamukatasya umukasi umuŵyakwe; pakuti pali fyefyo walukulila, taalukulyapo, tau.

⁸ Popele Elikana, umulume wakwe, walilaŵile kuli ye ati: Ana, mbanindo ulukulilila? Mbanindo kaŵili tolukulya-po? Mbanindo ulukuŵombomene umutima woŵe? Kansi neŵo nsilicilile-po amakweŵo napaŵana aŵalalume ikumi pamenso oŵe?

⁹ Popele Ana aliimine, pakusilo'kulya wo kuSilo, napakusilo'kunwa ŵo. Lomba Eli umupapatilisi waliikele peteŵe lyakwe palupanda ulwakumulyaŋgo uwakwitempuli lyaŵaYawe.

¹⁰ Naye Ana wali nekulula kwansoni mumutima wakwe, nekulukuŵatembela ŵaYawe, nekulukulila neminsosi.

¹¹ Naye walilapile icilapo ati: MweŵaYawe ŵamaŵumba, kani cine mwakutontomeka ukupeŋga kwamusya wenu, nekundaŋguluka, nekuŵulo'kuluŵa-ko umusya wenu, sombi nekumupelo'musya wenu umwana umwalalume, kani mwakuncitile'fyo, neŵo eli ŋkamuposa kuli ŵaYawe insiku syamweo wakwe syonse, kaŵili tesi lukafike-po pamutwi wakwe ulwembe neli lumo.

¹² Popele apo, ili acitembela pamenso aŵaYawe, kuŵona, Eli walimubwene akanwa.

¹³ Pakuti Ana walukulaŵila mumutima wakwe; lomba imilomo yeŋka eyalukuteŋkana, sombi isiwi lyakwe talyaumfwanicile; pakuti pali fyefyo Eli walilaŋgulucile ati wapendwa.

¹⁴ Popele Eli walilaŵile kuli ye ati: Mbaisa-mpindi iyo ukaleko'kupendwa? Lifumisye imfaina syoŵe!

¹⁵ Popele Ana waliasucile ati: Koku, Sikulu wanji, neŵo ndi mwanakasi wamutima wansoni; nsinwine-po neli nimfaina neli fyakunwa ifiŵilile, sombi naitululo'mupasi wanji pamenso aŵaYawe.

¹⁶ Tekumwesyo'musya wenu ati mwana wakwe Belyali; pakuti kukufula ukwakutamaka kwanji nekwaceŵo canji eko nalaŵila ukufika kumpindi ino.

¹⁷ Popele apo Eli waliasucile ati: Koya neŵutende; ŵaLesa ŵaŵaIsilaeli ŋgaŵasumine ukulomba koŵe uko waŵalombela.

¹⁸ Naye Ana ati: Nemuntu wenu ŋgansaŋge uluse pamenso enu. Fyopele'fyo uyomwanakasi walikumbulucile, nekulukulya; kaŵili pamenso pakwe tapaŵombomene-po liŵili.

¹⁹ Popele apo ŵaliimine ulucelocelo, nekucindika pamenso aŵaYawe, lomba nekubwela, nekufika nakunanda kwaŵo kuLama. Popele Elikana walimwisiŵile Ana umukasi wakwe; kaŵili ŵaYawe ŵalimulaŋgulucile.

²⁰ Popele apo, pakufike'mpindi, Ana waliimitile, nekufyalo'mwana umwalalume; nekumwilike'sina lyakwe ati niSamweli, nekweŵa ati: Nipakuti ndimulombele kuli ŵaYawe.

²¹ Peŋko'vo-muntu Elikana neŵamuŋanda yakwe ŵonse ŵaliile mukuposa kuli ŵaYawe umulambu wamwaka, nekulapa kwakwe.

²² Sombi Ana taaile-po; pakuti walilaŵile kumulume wakwe ati: Teti ŋkaye ili taaŋgasumuko' mwana; ili akasumuka eli ŋkamutwala, ati akaŵoneke pamenso aŵaYawe, nekulukwikele uko insiku syonse lukoso.

²³ Popele Elikana, umulume wakwe, walilaŵile kuli ye ati: Ulukucite'fyo ifi ulukwesya ati fiweme; ulukusyele ili tauŋgamusumuna; sombi ŵaYawe ŵekalike isiwi lyaŵo. Fyopele'fyo umwanakasi walisyele nekulukonsyo'mwana wakwe ili taaŋgamusumuna.

²⁴ Peŋka'po, ili amusumwine, alimupintile, pamo neŋombe sitatu, nekwesya kwawuŋga kumo, necikoko camfaina, nekumutwala kunanda yaŵaYawe iyamu'Silo: Iombo'mwana kaacili mwanice.

²⁵ Popele apo ŵaliipeye iŋombe, nekutwalo'mwana kuli Eli.

²⁶ Popele umwanakasi ati: MweŵaSikulu ŵanji, koti nififi ifi uli nemweo umutima wenu, ŵaSikulu ŵanji, neŵo ndi mwanakasi uyo wo pele uwaimakene apa pali mweŵo, ili ntembela kuli ŵaYawe.

²⁷ Niwuyumwana natembelele; lomba ŵaYawe ŵalimpele ukulomba kwanji, uko naŵalombele;

²⁸ pakuti pali fyefyo naneŵo kaŵili namuposa kuli ŵaYawe; insiku syonse isi akekala nemweo ye, akalukuposelwe kuli ŵaYawe. Popele alicindicile ŵaYawe kopele uko.