1Ifyeŵo 29 - Amashiwi Aba Lesa

¹ Popele Dafidi imfumu yalilaŵile kwiŵumba lyonse ilyawuŋgene, ati: Solomoni, umwana wanji, uyo ŵaLesa ŵasalulwile eŋka, acili mwanice, unacile; lomba imilimo ikulu; pakuti akatanino aka takali kaŵantu, sombi kaŵaYawe Lesa.

² Pano nayansicila iŋanda yaŵaLesa ŵanji, kumakosa anji onse, igolide lyafyegolide, nesilifa lyafyesilifa, neluŵemba lwafyaluŵemba, nemfitwe yafyamfitwe, nefiti fyafyafiti, nemabwe esyoyami, nemabwe akuŵika-mo, nemabwe amalembo neamisaŋgo-misaŋgo, nemikoka yonse yamabwe amakweŵo apatali, nemabwe aŋgulu mpaŋgana mpaŋgana,

³ Nakaŵili, pakuti nalandakanya Inanda yaŵaLesa ŵanji, kamuŵona ndi neŵuŵoni bwanji nemwine ubwegolide nebwesilifa, ndukuŵupela kunanda yaŵaLesa ŵanji, peulu pali fyefyo fyonse ifyo nayansicila iŋanda iswetelele;

⁴ ematalanto egolide amasausande atatu, egolide yakuOfili, nematalanto esilifa iliwaminisiwe amasausande asanu naaŵili, mukuŵika peulu pafiŵumba fyamananda;

⁵ negolide lyafyegolide, nesilifa lyafyesilifa, nefyamilimo yonse iyakuminwe yaŵamfundi. Mbaninani lomba uli nemutima wakusumina ukulukuliposa kuli ŵaYawe lelo?

⁶ Peŋka'po ifileme ifyakumananda aŵawisiŵo, nefileme ifyakufikoto fyakwe Isilaeli, nefilolo fyapamasausande nefyapamyanda, pamo neŵekalicisi aŵakwikalika imilimo yamfumu, ŵaliliposele nemitima yakusumina;

⁷ kaŵili ŵalipele kukupyuŋga ukwamuŋanda yaŵaLesa amatalanto egolide amasausande asanu nemadalici amasausande ikumi, nematalanto esilifa amasausande ikumi, nematalanto aluŵemba amasausande ikumi naasanu naatatu, nematalanto amfitwe amasausande umwanda.

⁸ Kaŵili aŵo aŵabwenekele ŵali nemabwe amakweŵo ŵaliapele kuŵuŵoni ubwakunanda yaŵaYawe, muminwe yakwe Jeciyeli umwina-Gesyoni.

⁹ Popele apo aŵantu ŵalisembele, pakuti ŵalukuposa ukwakusumina, pakuti ŵalukuŵaposela ŵaYawe nemitima iwaminine iyakusumina; naye Dafidi imfumu walisembele nekusemba ukukulu.

¹⁰ Pakuti pali fyefyo Dafidi waliŵacindicile ŵaYawe pamenso eŵumba lyonse Ilyawuŋgene: naye Dafidi ati: MweŵaYawe, mweŵaLesa ŵakwe Isilaeli wisifwe, ŋgamulukucindeme insiku syamuyayaya.

¹¹ MweŵaYawe bwenu uŵukulu, nemakosa, neŵuleme, nekucila, nemulemyo; pakuti fyonse ifili mwiulu nefili pacalo capansi fyenu; bwenu uŵufumu, mweŵaYawe; mulisuntwilwe peulu pafintu fyonse.

¹² Uŵuŵile neŵuleme ŵulafuma kuli mweŵo; mulafiikalika fyonse; mulupi lwenu muli amakosa neŵukulu; mulupi lwenu muli ukukusya nekuŵapela ŵonse amakosa.

¹³ Pakuti pali fyefyo, mweŵaLesa ŵesu, tulukumutoteni nekulicindika isina lyenu ilyaŵuleme.

¹⁴ Sombi neŵo ninenani, neŵantu ŵanji naŵo niŵani, ati tuŋgesiwa ukuposa ukwakusumine'fi koti nififi? Pakuti ifintu fyonse filafuma kuli mweŵo, kaŵili twamupeleni ifyafyenu mweŵene.

¹⁵ Pakuti tuli ŵensu pamenso enu, ŵakwikalekala lukoso, koti nifyefyo ifi ŵali ŵawisifwe ŵonse; insiku syesu isyapacalo capansi sili koti cinto, tapali-po ukwikalilila, tau.

¹⁶ MweŵaYawe Lesa wesu, fyonse'fi ifinji, ifi twaansicila mukumwiŵacileni iŋanda iyakwisina lyenu iliswetelele, filafuma kulupi lwenu, fyonse fyenu mweŵene.

¹⁷ MweŵaLesa, ndiisi kaŵili ati mulesya umutima, nekutemenwa mukuluŋgama, Neŵo, pakuluŋgama kwamutima wanji, nafipose'fi fyonse nemutima wakusumina; kaŵili pano naŵona nekusemba ati aŵantu ŵenu, awali-po apa, ŵalukumuposeleni nemitima yakusumina.

¹⁸ MweŵaYawe, MweŵaLesa ŵakwe Ablaamu, nalsaci, naIsilaeli, ŵawisifwe, kamulaminine'fi mukulandakanya ukwakulaŋguluka ukwamumitima yawantu ŵenu, muliansicile imitima yaŵo;

¹⁹ kaŵili mumupele Solomoni umwana wanji umutima uwaminine, uwakulama amafunde enu, nekusimika kwenu, nekufunda kwenu, nekulukucite'fi fyonse, nekwiŵaka akatanino, ako naansicila.

²⁰ Popele Dafidi walilaŵile kwiŵumba lyonse ilyawuŋgene ati: Pano kamuŵacindika ŵaYawe Lesa wenu. Peŋka iŵumba lyonse lyaliŵacindicile ŵaYawe, Lesa waŵawisiŵo, nekwinamisya nemitwi pansi, nekulukuŵalambila ŵaYawe nemfumu.

²¹ Popele ŵaliŵepaile ŵaYawe imilambu, nekuŵaposela ŵaYawe imilambu yakoca, ŋgamailo, iŋombe isausande limo, nembelele isyalalume isausande limo, neŵana ŵambelele isausande limo, pamo nemilambu yakuko yakunwa, nemilambu yakwipaya mpaŋgana mpaŋgana pakuti paŵaIsilaeli ŵonse.

²² Kaŵili pakasuŵa ako ŵaiukulya nekunwa pamenso aŵaYawe nekusemba ukukulu. Popele ŵalimucitile Solomoni, umwana wakwe Dafidi, ati nimfumu impindi yaŵusiŵili, nekumusufisya kuli ŵaYawe ati aŵe cileme, naye Sadoko ati aŵe mupapatilisi.

²³ Popele apo Solomoni waliikele peteŵe lyaŵaYawe ati nimfumu pamupunda wakwe Dafidi wisi, nekulukusyuka; lomba aŵaIsilaeli ŵonse nekulukumumfwa.

²⁴ Peŋka ifileme fyonse, neŵalalume ŵamakosa, pamo neŵana ŵamfumu Dafidi aŵalalume ŵonse, ŵalilikomekele kuli Solomoni imfumu.

²⁵ Popele waYawe ŵalimukusisye Solomoni ukwakuti pamenso aŵaIsilaeli ŵonse, nekumupela umulemyo waŵufumu, uwakuŵe'fyo lomba tawali-po pamfumu syonse isyamuIsilaeli isyamutanjilile.

²⁶ Lomba Dafidi, umwana wakwe jese, waliŵekalicile aŵaIsilaeli ŵonse.

²⁷ Impindi iyo alukuŵekalika aŵaIsilaeli ŵonse yalikumene imyaka amakumi ane; walukwikalika muEbiloni imyaka isanu naiŵili; namu Jelusalemi namo kaalukwikalika imyaka amakumi atatu naitatu.

²⁸ Peŋka walifwile ili acekwisye bwino ukwakuti, nensiku isyakumene, wali neŵuŵile neŵuleme; naye Solomoni umwana wakwe nekwikalika pamupunda wakwe.

²⁹ Lomba ifyakucitwa kuli Dafidi imfumu, ifyakutaŋga nefyakupela-ko, ŵoneni, fililembelwe mufyeŵo fyakwe Samweli uwakuwona, namufyeŵo fyakwe Natani uwakusimika, namufyeŵo fyakwe Gadi uwakuŵona;

³⁰ pamo nefyakwikalika kwakwe fyonse, neŵukulu bwakwe, nempindi isyamuŵelele nesyaŵelele Isilaeli, nesyaŵelele uŵufumu ŵonse ubwapafyalo.