1Ifyeŵo 28 - Amashiwi Aba Lesa

¹ Popele Dafidi waliŵuŋgenye kuJelusalemi ifileme fyonse ifyakuIsilaeli, ifileme ifyakufikoto, nefilolo fyapansoko isyalukwipyunjila imfumu pamakoto, nefilolo ifyapamasausande, nefilolo ifyapamyanda, naŵekalicisi ŵapalupaŋgo lonse neŵuŵoni bwamfumu nebwaŵana ŵaiyo aŵalalume, pamo nefipatiko, neŵalalume ŵamakosa, eŵalalume ŵonse aŵamakosa nelupata.

² Peŋka Dafidi imfumu waliimakene kumakasa akwe, nekulawila ati: Ŋumfweni, mweŵakwasu namweŵantu ŵanji; neŵo, mwali mumutima wanji ukwiŵaka iŋanda yakutusya ukuliiŵacila ibokosi lyakulayana kwaŵaYawe necakusamina-po ulukasa lwaŵaLesa ŵesu; kaŵili naliansicile ukwiŵaka.

³ Sombi ŵaLesa ŵalilaŵile kuli neŵo ati: Tekuti ukaliiŵacile isina lyanji iŋanda, pakuti uli mwalalume waŋkondo, wakupokomosya imilopa.

⁴ Naŋgaŵa nifyefyo ŵaYawe Lesa wakwe Isilaeli ŵalinsalulwile neŵo muŋanda yonse yaŵatata, ati njikalilile nimfumu yapaIsilaeli insiku pee; pakuti ŵalisalulwile Juda ati ekale cileme; lomba muŋanda yakwe Juda, muŋanda yaŵatata, napakati paŵana aŵalalume ŵaŵatata, ŵalitemenwe muli neŵo, mukunjikalika ati nimfumu yapaŵaIsilaeli ŵonse.

⁵ Kaŵili paŵana ŵanji aŵalalume ŵonse, (pakuti ŵaYawe ŵampela aŵana aŵalalume aŵenji), ŵasalulula Solomoni umwana wanji ati akekale peteŵe lyaŵufumu bwaŵaYawe mwikwikalika Isilaeli.

⁶ Kaŵili ŵalilaŵile kuli neŵo ati: Solomoni umwana woŵe niye ukeŵaka iŋanda yanji nefyaluŵansa fyanji, pakuti namusalulula ati aŵe mwana wanji, naneŵo eli ŋkaŵa niŵawisi.

⁷ Kaŵili ŋkekalicilila uŵufumu bwakwe insiku pee, kani akalukucitisya impindi yonse amafunde anji nefyakusololola fyanji, koti nipakasuŵa kano.

⁸ Pakuti pali fyefyo lomba, pamenso aŵaIsilaeli ŵonse, iŵumba lyaŵaYawe Ilyawuŋgene, napo apomfwanicile kuli ŵaLesa ŵesu, kamulama nekufwaisya amafunde onse aŵaYawe Lesa wenu; ati mukaŵe necalo ici iciweme, mukaŵasile co aŵana ŵenu panuma penu ati ŵupyani ubwamuyayaya.

⁹ Kaŵili weŵo, weSolomoni wemwana wanji, ŋgoŵesiŵe ŵaLesa ŵaŵawiso, ukalukuŵapyunjila nemutima uwaminine nemilaŋgwe yaku sumina; pakuti ŵaYawe ŵalaceta imitima yonse, nekwisiŵisya ukulandakanya konse ukwakulaŋgutuka. Kani ulukuŵafwaya-fwaya, ŵakaŵonwa kuli weŵo; sombi kani ulukuŵaleka, ŵakakuposelelela lukoso.

¹⁰ Cenjela pano; pakuti ŵaYawe ŵakusalulula ati uwiŵacile umulenda uswetelele iŋanda: uŵe nemakosa, ukalukuficita.

¹¹ Popele apo Dafidi walimupele Solomoni umwana wakwe icamekalilo cansense yetempuli, necamananda akuko, necamipawo yakuko, necafipinda fyakuko ifyapeulu, necafipembe fyakuko ifyamukati, necapantu apali necifuniko cacifuto;

¹² necamekalilo cafyefyo fyonse ifi alukulaŋgulucila mumutima, ifyakufyaluŵansa ifyakunanda yaŵaYawe, nefyakufipembe fyonse ifyakusiŋguluka, ifyamipawo yananda yaŵaLesa, nefyamipawo yafintu ifiposelwe kuli ŵaLesa,

¹³ nefyakumakoto aŵapapatilisi neaŵena-Lefai, nefyakumilimo yonse yakukupyuŋga ukwamuŋanda yaŵaYawe, nefyakufiŋkoloŋkolo fyonse ifyakukupyuŋga ukwamuŋanda yaŵaYawe;

¹⁴ necamekalilo cegolide, ukwesya kwalilyo, ilyafintu fyegolide, nefyafiŋkoloŋkolo fyonse ifyamikoka yonse iyakupyuŋga: necesilifa lyafiŋkoloŋkolo fyonse fyesilifa, ukwesya kwalilyo, ifyafiŋkoloŋkolo fyonse ifyamikoka yonse iyakupyuŋga;

¹⁵ kaŵili napakwesya, icafyakuteka-po inyale ifyegolide, necanyale syakuko isyegolide, ukulukwesya pesikelo ifyakuteka-po inyale fyonse nenyale syakuko nasyo; necakufyakuteka-po inyale ifyesilifa, isilifa ilyakwesesiwa ifyakuteka-po inyale fyonse nenyale syakuko nasyo, koti milimo yafyakutekapo inyale fyonse;

¹⁶ negolide koti kwesiwa kwalilyo ilyakumatebulu aŵasiŋkwa ŵaŵumboni, ilyakumatebulu onse; nesilifa ilyakumatebulu esilifa;

¹⁷ nendoŵo yafinani, nemabeseni, neŋkomeci, syonse isyegolide iliswetele; ilyamabeseni egolide ilyakwesesiwa amabeseni onse; nelyamabeseni esilifa ilyakwesesiwa amabeseni onse;

¹⁸ negolide iliwaminisiwe koti kwesiwa kwalilyo ilyakuconto cafinuncile bwino; negolide ilyakucamekalilo icaŋgolofwana yaŵakelubi aŵatambicile amapindo aŵo, nekufimba-po pebokosi lyakulayana kwaŵaYawe.

¹⁹ Fyonse'fyo, efilaŵile Datidi, ŵalinjisiŵisye mumalembo akuminwe yaŵaYawe, ekucita konse ukwacamekalilo ici.

²⁰ Popele Dafidi walilaŵile kuli Solomoni umwana wakwe ati: Uŵe nemakosa nelupata uluweme, ukalukuficita; witina neli kususwa; pakuti ŵaYawe Lesa, eŵaLesa ŵanji, ŵali naweŵo; tekuti ŵakufililwe neli kukuleka, ili taiŋgasila imilimo yonse iyakukupyuŋga ukwakunanda yaŵaYawe.

²¹ Kaŵili ŵona-ko, ayo amakoto aŵapapatilisi neŵena-Lefai akukupyuŋga konse ukwakunanda yaŵaYawe; kaŵili pamikoka yonse iyamilimo, pakalukuli pamo naweŵo ŵonse aŵalalume aŵakusumina aŵali naŵumfundi awaŋgacita ukupyuŋga konse; kaŵili ifilolo neŵantu ŵonse ŵakalukukutika lukoso ukufunda koŵe.