Kategorya
63 Mga Bersikulo sa Bibliya Bahin sa Panaghigalaay ug Pakig-uban
Kauban sa atong mga higala, atong gina-ambit ang mga higayon sa kalipay ug kasubo. "Dili na ko motawag ninyo nga mga ulipon, kay ang ulipon wala mahibalo sa gibuhat sa iyang agalon; apan gitawag ko kamo nga mga higala, kay ang tanan nga akong nadungog gikan sa akong Amahan, akong gipahibalo kaninyo." (Juan 15:15)
Importante gyud ang pagkamatinud-anon ug pagkamatinumanon kay kini makapahimsog ug makapa-tinuod sa atong relasyon. Ang tinuod nga panaghigalaay makita sa panahon sa kalisud, kung kanus-a nato kinahanglan ang tabang.
Daghan ang moingon nga higala sa panahon sa kalipay, pero ang tinuod nga pagsulay sa panaghigalaay moabot kung dunay sakit, problema sa kwarta, o pagkamatay sa minahal sa kinabuhi. "Ang higala nagahigugma sa tanang panahon, ug ang igsoon natawo alang sa panahon sa kalisdanan." (Proverbio 17:17)
“Siya nga nagpugong sa kaluoy gikan sa usa ka higala nagsalikway sa kahadlok sa Labing Gamhanan.
Mga hinigugma, maghigugmaay kita sa usa ug usa kay ang gugma iya sa Dios, ug siya nga nahigugma gipakatawo sa Dios ug nakaila sa Dios.
Ang tawo nga masukihon nagsabwag ug panagbingkil, ug ang usa ka tighunghong nagpabulag sa suod nga managhigala.
Ayaw talikdi ang imong higala ug ang higala sa imong amahan; ug ayaw pag-adto sa balay sa imong igsoon sa adlaw sa imong kalisdanan. Maayo pa ang silingan nga duol kay sa igsoon nga layo.
Siya nga naglakaw uban sa mga maalamon mahimong maalamon, apan ang kauban sa mga buangbuang mag-antos sa kadaot.
Ug sumala sa inyong buot nga buhaton sa mga tawo nganha kaninyo, buhata kini ngadto kanila.
Ang bahandi magdala ug daghang sa mga higala, apan ang kabos biyaan sa iyang mga higala.
Ang lana ug ang pahumot makalipay sa kasingkasing, apan ang kalag gidugmok sa kagul-anan.
Kamo akong mga higala kon magtuman kamo sa akong sugo kaninyo. Dili na nako kamo tawgon nga mga ulipon, kay ang ulipon wala masayod sa gibuhat sa iyang agalon. Apan ako nagtawag kaninyo nga mga higala kay ang tanan nga nadungog nako gikan sa akong Amahan gipahibalo nako kaninyo.
Kay kon sila mangapukan, ang usa magbangon sa iyang kauban. Apan alaot kadtong nag-inusara sa diha nga siya mapukan, walay lain nga magbangon kaniya.
Adunay mga higala nga magpakaaron-ingnon nga mga higala, apan adunay usa ka higala nga magpabilin nga suod pa kay sa usa ka igsoon.
Ug bisan kon ang usa ka tawo mopatigbabaw batok niadtong nag-inusara, ang duha makasukol kaniya. Ang tulo ka lubid nga pisi dili daling mabugto.
Busa, ingon nga kita adunay kahigayonan, buhaton nato ang maayo ngadto sa tanang mga tawo, ilabi na kanila nga mga sakop sa panimalay sa pagtuo.
Kadtong magpasaylo sa usa ka kalapasan nangita ug gugma, apan kadtong magbalikbalik sa maong butang nagpabulag sa usa ka higala.
Ang usa ka higala mahigugma sa tanang panahon, ug ang usa ka igsoon natawo alang sa kalisdanan.
Sa kataposan, kamong tanan, kinahanglang mag-usa sa hunahuna, magbinatiay, maghigugmaay ingon nga mga igsoon, maluluy-on, ug mapaubsanon sa hunahuna,
Walay si bisan kinsa nga adunay gugma nga labaw pa niini, nga ang usa ka tawo magtahan sa iyang kinabuhi alang sa iyang mga higala.
Pagyayongay kamo sa mga kabug-at sa usa ug usa, ug sa ingon niana matuman ninyo ang balaod ni Cristo.
Ang matarong nga tawo molikay sa daotan, apan ang dalan sa daotan nagpahisalaag kanila.
Paghigugmaay kamo nga mainiton sa usa ug usa ingon nga mga igsoon, pagpalabwanay kamo sa pagtahod sa usa ug usa.
Sa pagkadungog sa tulo ka higala ni Job niining tanang kadaotan nga midangat kaniya, miadto ang matag usa kanila gikan sa iyang kaugalingong dapit: si Elipas nga Temanhanon, si Bildad nga Suhihanon, ug si Zofar nga Naamatihanon. Sila nagsabot nga moduaw aron sa pagduyog sa iyang kasakit ug paghupay kaniya.
Sa dihang gibayaw ni Moises ang iyang kamot, midaog ang Israel apan sa dihang gipaubos niya ang iyang kamot, midaog ang Amalek. Apan ang mga kamot ni Moises gikapoy busa mikuha sila ug usa ka bato ug gibutang kini sa ubos niya ug milingkod siya niini. Ug gisangga ni Aaron ug ni Hur ang iyang mga kamot, ang usa sa usa ka kilid, ug ang usa didto sa pikas. Ug ang iyang mga kamot nagpabiling inisa hangtod sa pagsalop sa adlaw.
Ang kasulatan natuman nga nag-ingon, “Si Abraham mituo sa Dios, ug kini giisip kaniya nga pagkamatarong,” ug siya gitawag nga higala sa Dios.
Ayaw pakanunaya ang imong tiil sa balay sa imong silingan, kay tingali unya ug pul-an siya kanimo, ug masuko kanimo.
Ayaw pagpakighigala sa usa ka tawo nga daling masuko, o mokuyog sa tawo nga masuk-anon, kay tingali unya ug ikaw makakat-on sa iyang mga pamaagi, ug magbitik sa imong kaugaligon diha sa usa ka lit-ag.
Busa naandan sa Ginoo ang pagpakigsulti kang Moises sa nawong ug nawong sama sa usa ka tawo nga makigsulti sa iyang higala. Sa diha nga si Moises mobalik ngadto sa kampo, ang iyang kaabag nga si Josue nga anak ni Nun, usa ka batan-on, dili mobiya sa Tolda.
Kasaligan ang mga samad sa usa ka higala; naghingapin ang mga halok sa usa ka kaaway.
Ug mamalandong kita alang sa pagdinasigay sa usa ug usa ngadto sa paghigugma ug sa mga maayong buhat,
“Si Saul ug si Jonatan, mga pinalangga ug angayng higugmaon! Diha sa kinabuhi ug diha sa kamatayon wala sila magkabulag; sila tulin pa kay sa mga agila, sila kusgan pa kay sa mga liyon.
Ayaw kamo pagpahisalaag, “Ang daotang pakig-uban makadaot sa maayong pamatasan.”
Busa pagdinasigay kamo ug lig-ona ninyo ang usa ug usa, sama sa inyong gibuhat karon.
Ug giuli sa Ginoo ang tanang katigayonan ni Job sa diha nga nag-ampo siya alang sa iyang mga higala. Ug ang Ginoo naghatag kang Job ug duha ka pilo kay sa napanag-iya niya kaniadto.
Ug kon adunay mangutana kaniya, ‘Unsa kining mga samad sa imong kamot?’ siya moingon, ‘Ang mga samad akong naangkon didto sa balay sa akong mga higala.’ ”
Unya sa pagkahuman ni David ug pakigsulti kang Saul, ang kalag ni Jonatan nahiusa sa kalag ni David ug si Jonatan nahigugma kaniya ingon sa iyang kaugalingong kalag.
Ug gipapanumpa pag-usab ni Jonatan si David nga higugmaon siya kay gihigugma man niya si David sama sa iyang kaugalingong kalag.
Gipasalamatan nako ang akong Dios diha sa tanan nakong paghandom kaninyo. nga nakabaton sa samang pakigbisog nga inyo kaniadtong nakita kanako, ug inyo karong nadungog nga anaa kanako. Sa tanan nakong pagpangamuyo alang kaninyong tanan, ako sa kanunay nag-ampo uban sa kalipay, mapasalamaton tungod sa inyong pagpakig-ambit diha sa Maayong Balita sukad sa unang adlaw hangtod karon.
Ingon nga kamo mga pinili sa Dios, balaan ug hinigugma, isul-ob ninyo ang pagkamabination, pagkamaluluy-on, pagkamapaubsanon, kaaghop, ug pailob; mag-pinailobay sa usa ug usa ug nga kon aduna may mulo ang usa batok sa usa, magpinasayloay ang usa ug usa. Ingon nga ang Ginoo nagpasaylo kaninyo, busa mao usab kamo. Ug labaw niining tanan isul-ob ang gugma nga mao ang bugkos sa kahingpitan.
Ang pagpakighigala sa Ginoo ila niadtong may kahadlok kaniya, ug siya magpadayag kanila sa iyang kasabotan.
Ang Dios sa pailob ug pagdasig maghatag unta kaninyong tanan ug pagsinabtanay sa usa ug usa sumala kang Cristo Jesus, aron diha sa hiniusa nga tingog magdungan kamo sa paghimaya sa Dios ug Amahan sa atong Ginoong Jesu-Cristo.
Ug mamalandong kita alang sa pagdinasigay sa usa ug usa ngadto sa paghigugma ug sa mga maayong buhat, sa walay pagbiya sa atong panagtigom, ingon sa gibuhat sa pipila, hinuon magdinasigay kita sa usa ug usa ug ilabina gayod sa makita na ninyo nga ang Adlaw nagkaduol na.
Labaw sa tanan, pagmainiton kamo kanunay sa inyong gugma sa usa ug usa, kay ang gugma magtabon man sa daghang mga sala.
Apan kon kita naglakaw diha sa kahayag, ingon nga siya anaa sa kahayag, kita may pakig-ambitay sa usa ug usa, ug ang dugo ni Jesus nga iyang Anak naghinlo kanato gikan sa tanang sala.
Ayaw kamo pagpakighiusa uban sa dili magtutuo. Kay unsa may anaa sa panag-abin sa pagkamatarong ug sa pagkadaotan? O unsa may panag-ambitan sa kahayag ug sa kangitngit?
Bisan ang akong suod nga higala nga akong gisaligan, nga nagkaon sa akong pan, nag-isa sa iyang tikod batok kanako.
Apan ikaw kini, ang sama kanako, akong kauban, akong suod nga higala. Tam-is ang atong pagsultihanay; sa balay sa Dios nagkuyog kita sa pagpanglakaw uban sa panon.
“Kamo mao ang kahayag sa kalibotan. Ang siyudad nga mahimutang sa ibabaw sa bungtod dili gayod matago.
Unya sa pagkahuman ni David ug pakigsulti kang Saul, ang kalag ni Jonatan nahiusa sa kalag ni David ug si Jonatan nahigugma kaniya ingon sa iyang kaugalingong kalag. Sa pagkaugma, usa ka daotang espiritu gikan sa Dios miabot nga makusganon diha kang Saul ug siya nagsalimoang sulod sa balay samtang si David nagtugtog sa iyang alpa ingon sa iyang gibuhat matag adlaw. Ug dihay bangkaw sa kamot ni Saul. Ug gilabay ni Saul ang bangkaw kay siya naghunahuna, “Akong tuhugon si David diha sa bungbong.” Apan si David milikay gikan kaniya sa makaduha. Si Saul nahadlok kang David tungod kay ang Ginoo nag-uban kaniya ug mibiya gikan kang Saul. Busa gipapahawa siya ni Saul gikan sa iyang atubangan, ug gihimo siya nga tigmando sa usa ka libo ug migula siya ug mibalik sa atubangan sa katawhan. Si David nagmalamposon sa tanan niyang gibuhat kay ang Ginoo nag-uban man kaniya. Unya sa dihang nakita ni Saul nga nagmalamposon si David, siya mitindog nga may kahadlok kaniya. Apan ang tibuok nga Israel ug Juda nahigugma kang David kay siya migula ug mibalik sa ilang atubangan. Unya si Saul miingon kang David, “Ania karon ang akong kamagulangang anak nga babaye nga si Merab, siya akong ipaasawa kanimo. Pagmaisogon lamang alang kanako ug pagpakiggubat alang sa Ginoo.” Kay si Saul naghunahuna, “Dili unta itugot nga modapat ang akong kamot kaniya, kondili ang kamot sa mga Filistihanon ang padapaton kaniya.” Ug si David miingon ngadto kang Saul, “Kinsa ba ako ug kinsa ang akong mga kadugo, ang panimalay sa akong amahan diha sa Israel, nga ako mahimong umagad sa hari?” Apan niadtong panahona sa dihang si Merab nga anak ni Saul ihatag na unta ngadto kang David, gihatag siya kang Adriel nga taga-Mehola aron ipaasawa. Gikuha siya ni Saul niadtong adlawa ug wala na motugot nga mopauli pa siya sa balay sa iyang amahan. Si Mical nga anak nga babaye ni Saul nahigugma kang David, ug ilang gisuginlan si Saul ug ang maong butang nakalipay kaniya. Si Saul naghunahuna, “Ihatag nako siya kaniya aron siya mahimong lit-ag kaniya ug nga ang kamot sa mga Filistihanon makigbatok kaniya.” Busa si Saul miingon kang David sa ikaduhang higayon, “Ikaw karon mahimong akong umagad.” Ug gisugo ni Saul ang iyang mga sulugoon, “Sultihi si David sa hilom ug ingna, ‘Ania karon, ang hari nalipay kanimo, ug ang tanan niyang mga sulugoon nahigugma kanimo, busa karon mahimo ikaw nga umagad sa hari.’ ” Ang mga sulugoon ni Saul misulti niining mga pulonga sa mga igdulungog ni David. Ug si David miingon, “Sayon ba lamang alang kaninyo kanang butanga nga mahimong umagad sa hari, nga nakita man ninyo nga ako usa ka kabos nga tawo ug dili inila?” Ug ang mga sulugoon ni Saul misugilon kaniya, “Niining paagiha nagsulti si David.” Unya si Saul miingon, “Kini mao ang isulti ninyo kang David, ‘Ang hari wala magkinahanglan sa bisan unsang bugay, kondili usa ka gatos ka yamis sa mga Filistihanon, aron iyang panimaslan ang mga kaaway sa hari.’ ” Kay si Saul naghunahuna nga mahulog si David sa kamot sa mga Filistihanon. Sa diha nga gisuginlan si David sa iyang mga sulugoon niining mga pulonga, kini nakapahimuot pag-ayo kang David nga mahimong umagad sa hari. Ug sa wala pa matapos ang panahon, si David mitindog ug miadto kuyog sa iyang mga tawo ug gipatay ang duha ka gatos ka tawo sa mga Filistihanon ug gidala ni David ang ilang mga yamis ug gihatag nila kini sa husto nga gidaghanon ngadto sa hari aron siya mahimong umagad sa hari. Ug gipaasawa ni Saul kaniya si Mical nga iyang anak. Apan sa dihang nakita ug nahibaloan ni Saul nga ang Ginoo nag-uban kang David ug si Mical nga anak ni Saul nahigugma kaniya, si Saul misamot pagkahadlok kang David. Busa si Saul nagpabilin nga kaaway ni David sa kanunay. Unya si Jonatan naghimo ug usa ka kasabotan uban kang David tungod kay gihigugma niya siya sama sa iyang kaugalingong kalag.
Busa kon aduna may pagdasig diha kang Cristo, kon aduna may pagkadinasig sa gugma, kon aduna may pakig-ambitay diha sa Espiritu, kon aduna may pagbinatiay ug pagkinaluy-anay, aron nga diha sa ngalan ni Jesus ang tanang tawo moluhod didto sa langit, dinhi sa yuta ug sa ilalom sa yuta, ug ang tanang dila magsugid nga Ginoo si Jesu-Cristo alang sa pagdayeg sa Dios nga Amahan. Busa, akong mga hinigugma, ingon nga kamo sa kanunay mituman, dili lamang sa panahon nga anaa ako kaninyo, kondili labaw pa gani sa panahon usab nga wala ako diha kaninyo, panglimbasogi ninyo ang inyong kaugalingong kaluwasan uban ang kahadlok ug pagkurog, kay ang Dios mao ang naglihok diha kaninyo, sa pagbuot ug sa pagbuhat alang sa iyang ikahimuot. Buhata ninyo ang tanang butang sa walay pagbagulbol o pagpakiglalais, aron mahimo kamong putli ug dili masaway, mga anak sa Dios nga walay buling taliwala sa usa ka hiwi ug sukihan nga kaliwatan, nga sa taliwala nila kamo magsidlak ingon nga mga kahayag dinhi sa kalibotan, nga nagpadayon sa pagtanyag sa pulong alang sa kinabuhi, aron nga sa adlaw unya ni Cristo ako mapasigarbohon nga ako wala diay magdagan nga walay pulos o maghago nga walay pulos. Apan kon ibubo ako diha sa inyong halad nga inihaw ug sa halad sa inyong pagtuo, ikalipay ko kini ug ako maglipay uban kaninyong tanan. Sa ingon, kinahanglang maglipay usab kamo ug maglipay uban kanako. Naglaom ako diha sa Ginoong Jesus nga sa dili madugay akong ipadala si Timoteo nganha kaninyo aron malipay usab ako sa pagkahibalo sa mga butang mahitungod kaninyo. hingpita ninyo ang akong kalipay pinaagi sa samang hunahuna, ingon nga nagbaton ug samang gugma, nga anaa sa hingpit nga panagkauyon ug usa ka hunahuna.
Hinaot nga ang Ginoo maghatag ug kaluoy sa panimalay ni Onesiforo, kay sa makadaghan iya akong gidasig. Wala niya ikaulaw ang akong pagkabilanggo, hinuon sa iyang pag-abot diri sa Roma gipangita niya ako sa makugihon gayod ug nakit-an niya ako. Hinaot nga ang Ginoo magtugot kaniya sa pagkakaplag ug kaluoy gikan sa Ginoo niadto unyang adlawa. Ikaw nasayod gayod sa tanang pagpangalagad nga iyang gihimo diha sa Efeso.
Paghilom diha sa Ginoo ug paghulat nga mapailobon kaniya; ayaw kaguol tungod kaniya nga nagmauswagon sa iyang dalan, tungod sa tawo nga naghimo ug daotan nga mga laraw. Ayaw na pagkasuko, ug biyai ang kaligutgot! Ayaw na kaguol, kay kana nagpaingon sa buhat nga daotan. Kay ang mga daotan laglagon, apan ang mga naghulat sa Ginoo makapanag-iya sa yuta.
Kay sama nga ang lawas usa ra ug adunay daghang mga bahin, ug ang tanang mga bahin sa lawas bisan daghan usa ra ka lawas, ingon usab niana diha kang Cristo. Kay pinaagi sa usa ka Espiritu kitang tanan, mga Judio o mga Grego, mga ulipon o mga gawasnon, gibautismohan ngadto sa usa ka lawas ug kitang tanan gipainom sa usa ka Espiritu. Kay ang lawas dili usa ka bahin lamang, kondili daghan.
Kay gipangandoy nako nga makigkita kaninyo aron makapaambit kaninyo ug espirituhanong gasa aron sa paglig-on kaninyo, nga sa ato pa, magdinasigay kita pinaagi sa pagtuo sa usa ug usa, sa inyo ug sa ako.
Pamati sa tambag ug dawata ang pahimangno, aron ikaw makaangkon ug kaalam alang sa umaabot.
Kay kamo, mga igsoon, gitawag ngadto sa kagawasan. Apan lamang ayaw ninyo gamita ang inyong kagawasan ingon nga kahigayonan sa unod, kondili pinaagi sa gugma alagari ninyo ang usa ug usa.
sa iyang mga mata gitamay ang tawo nga dunot ug kasingkasing, apan nagtahod siya sa mga may kahadlok sa Ginoo; mobarog sa iyang panumpa bisan kini makasakit kaniya;
uban ang tanang pagpaubos ug kaaghop, uban sa pailob, mag-inantosay sa usa ug usa diha sa gugma, Apan si Cristo wala ninyo makat-oni sa ingon niana, kon tinuod man nga kamo nakadungog mahitungod kaniya ug gitudloan diha kaniya, ingon nga ang kamatuoran anaa kang Jesus. Gitudloan kamo sa paghukas sa inyong daang pagkatawo nga iya pa sa inyong karaang pamatasan nga nadunot tungod sa mga malimbongong kaibog, sa pagbag-o diha sa espiritu sa inyong mga salabotan, ug sa pagsul-ob sa bag-ong pagkatawo nga gibuhat sumala sa dagway sa Dios diha sa matuod nga pagmakatarong ug pagkabalaan. Tungod niini, sa mahukas na ninyo ang bakak, ang matag usa kaninyo kinahanglang magsulti sa kamatuoran ngadto sa iyang isigkatawo, kay kita mga bahin man sa usa ug usa. Kasuko kamo apan ayaw pagpakasala tungod niini, ayaw pasalopi sa adlaw ang inyong kasuko, ug ayaw ninyo hatagi ug higayon ang yawa. Ang kawatan kinahanglang dili na mangawat, kondili maghago hinuon, magbuhat sa mga maayong butang pinaagi sa iyang mga kamot aron may ikahatag siya ngadto sa mga nagkinahanglan. Kinahanglang walay sulting daotan nga manggula gikan sa inyong baba, kondili kanang maayo lamang nga makapalig-on ug angay sa higayon, aron makahatag kini ug kaayohan ngadto sa mga naminaw. matinguhaon sa pagpatunhay sa espirituhanong panaghiusa pinaagi sa bugkos sa panagdait.