Kategorya
BERSIKULO PARA SA ESPESYAL NGA MGA HITABO
Nagapasalamat ta sa Ginoo sa matag panghitabo o espesyal nga adlaw nga atong nasinati. Mga adlaw kini sa kalipay ug pagsaulog. Nalipay ang Ginoo kon magkinabuhi kita nga malinawon ug malipayon. Dayega ang Ginoo niining mga adlawa ug ayaw kalimti nga Siya ang naghatag kanato niining mga espesyal nga higayon.
Salmo 30:11-12 Gihimo niya ang akong pagbangotan nga sayaw; gihubo niya ang akong sako ug gibistihan ako ug kalipay, aron ako magaawit ug mga pagdayeg kanimo ug dili mohilom. Oh Ginoo nga akong Dios, magapasalamat ako kanimo hangtod sa kahangturan! Daghan pa kaayong mga bersikulo sa Bibliya mahitungod sa mga espesyal nga okasyon ug ania ang pipila niini.
Unsay inyong buhaton sa adlaw sa tinakda nga kasaulogan, ug sa adlaw sa kasaulogan sa Ginoo?
Unya ang tibuok katilingban nagkasabot sa paghimo sa Kasaulogan sa lain pang pito ka adlaw ug sila nagsaulog niini sa laing pito ka adlaw uban sa kalipay.
“Tumana ninyo ang Kasaulogan sa Pan nga Walay Patubo. Pito ka adlaw kamong magkaon ug pan nga walay patubo sumala sa gisugo nako kaninyo, sa panahon nga gitakda sa bulan sa Abib kay sa bulan sa Abib migawas kamo gikan sa Ehipto.
Himoa ninyo ang Kasaulogan sa Pan nga Walay Patubo sumala sa akong gisugo kaninyo. Magkaon kamo ug pan nga walay patubo sulod sa pito ka adlaw sulod sa gitakda nga panahon sa bulan sa Abib, kay niini migula kamo gikan sa Ehipto ug walay si bisan kinsa nga magpakita sa akong atubangan nga walay dala.
Busa ang katawhan sa Israel kinahanglan nga magtuman sa adlaw nga igpapahulay, sa pagtamod sa adlaw nga igpapahulay hangtod sa tanan nilang mga kaliwatan ingon nga usa ka kasabotan nga walay kataposan.
Ug ila kining nakita nga nasulat diha sa Balaod nga ang Ginoo nagsugo pinaagi kang Moises nga ang katawhan sa Israel kinahanglang magpuyo sa mga balongbalong sa panahon sa kasaulogan sa ikapito nga bulan. Ug kinahanglan nga ilang isangyaw ug ipahibalo sa tanan nilang mga lungsod ug sa Jerusalem, “Lakaw kamo ngadto sa kabukiran ug pagdala ug mga sanga sa olibo, ihalas nga olibo, mirtol, palmira ug ubang kahoy nga dahonon aron buhaton nga mga balongbalong sumala sa nasulat.”
Taposon nako ang tanan niyang kalipay, ang iyang mga kasaulogan, ang iyang mga bag-ong subang sa bulan, ang iyang mga adlawng igpapahulay, ug ang tanan niyang mga tinakdang kasaulogan.
Ayaw na pagdala ug mga halad nga walay kapuslanan; ang insenso dulumtanan alang kanako. Ang bag-ong pagsubang sa bulan ug ang adlaw nga igpapahulay ug ang pagtawag sa mga panagtigom— dili ako makaantos sa kasal-anan ug sa balaang panagtigom. Ang inyong bag-ong pagsubang sa mga bulan ug ang inyong gitakda nga mga kasaulogan gikaligutgotan sa akong kalag; nangahimo sila nga kabug-at alang kanako, gikapoyan na ako sa pagpas-an niini.
Sa pagkakita ni Aaron niini, nagtukod siya ug usa ka halaran sa atubangan niini ug si Aaron mipahibalo, ug miingon, “Ugma mao ang kasaulogan ngadto sa Ginoo.”
Gikan sa bag-ong subang sa bulan ngadto sa bag-ong subang sa bulan, ug gikan sa usa ka adlawng igpapahulay ngadto sa laing adlawng igpapahulay, ang tanang mga tawo manganhi aron sa pagsimba sa akong atubangan, nag-ingon ang Ginoo.
ug maghimo kamo ug halad pinaagi sa kalayo alang sa Ginoo, usa ka halad nga inihaw nga sunogon o usa ka halad aron sa pagtuman sa usa ka panaad o ingon sa usa ka halad nga kinabubut-on o sa inyong gitakdang mga kasaulogan aron sa paghimo sa usa ka kahumot alang sa Ginoo gikan sa mga baka o gikan sa mga karnero,
Ug si Moises nagsugo kanila nga nag-ingon, “Human sa matag pito ka tuig, sa gitakdang panahon sa tuig sa pagpahigawas, sa Kasaulogan sa mga Balongbalong, sa dihang moduol ang tibuok Israel sa pagpakita diha sa atubangan sa Ginoo nga inyong Dios sa dapit nga iyang pilion, basaha kini nga Balaod sa atubangan sa tibuok Israel diha sa ilang pangdungog.
“Ayaw ninyo ihalad ang dugo sa inyong halad kanako uban sa pan nga may patubo o isalin hangtod sa pagkabuntag ang tambok sa giihaw sa kasaulogan alang kanako.
“Kinahanglan nga maggahin kamo sa ikapulo sa tanang abot sa inyong tanom nga naggikan sa uma matag tuig. Ug sa atubangan sa Ginoo nga inyong Dios, sa dapit nga iyang pilion aron papuy-on didto ang iyang ngalan, kaona ninyo ang ikapulo sa inyong abot, sa inyong bino ug sa inyong lana ug ang mga kamagulangan sa inyong mga baka ug sa inyong mga karnero, aron makakat-on kamo sa pagkahadlok kanunay sa Ginoo nga inyong Dios.
Ang inyong mga kasaulogan akong himoon nga pagsubo, ug ang tanan ninyong mga awit pagbangutan; dad-an nako ug bisti nga sako ang tanan ninyong mga hawak ug kaupaw sa matag ulo; himoon nako kini nga sama sa pagsubo sa kamatayon alang sa bugtong nga anak, ug ang kataposan niini sama sa usa ka pait nga adlaw.
“Mag-ihap ikaw ug pito ka tuig sa pahulay alang kanimo, pito ka pito ka tuig, ug niana ang mga adlaw sa pito ka tuig sa pahulay mahimo kanimo nga 49 ka tuig. Unya patingoga ug kusog ang trumpeta sa ikanapulo nga adlaw sa ikapito nga bulan, sa Adlaw sa Pagtabon sa Sala, patingoga ninyo ang trumpeta ngadto sa tibuok ninyong yuta.
Sa ikanapulo ug lima nga adlaw niining bulana mao ang Kasaulogan sa Pan nga Walay Patubo alang sa Ginoo. Pito ka adlaw kamong magkaon ug mga pan nga walay patubo.
Sa ikapito nga bulan, sa ikanapulo ug lima nga adlaw sa bulan, panahon sa kasaulogan, himoon niya ang samang pangandam alang sa halad tungod sa sala, sa halad nga sunogon ug sa mga halad nga pagkaon, ug sa lana.
“Sa unang bulan, sa ikanapulo ug upat nga adlaw sa bulan, himoa ninyo ang kasaulogan sa Pagsaylo, ug sulod sa pito ka adlaw ang pan nga walay patubo maoy kan-on ninyo.
Ug ilang gihimo ang Kasaulogan sa mga Balongbalong ingon nga kini nasulat ug gihalad ang matag adlaw nga mga halad nga sunogon nga inihap sumala sa tulumanon, sumala sa gikinahanglan sa matag adlaw.
Ang katawhan sa Israel nga didto sa Jerusalem naghimo sa Kasaulogan sa Pan nga Walay Patubo sulod sa pito ka adlaw uban sa dakong kalipay ug ang mga Levihanon ug ang mga pari nagdayeg sa Ginoo matag adlaw, nag-awit uban sa mga tunog nga tulunggon ngadto sa Ginoo.
sumala sa gikinahanglan sa katungdanan matag adlaw, maghalad sumala sa sugo ni Moises alang sa mga adlaw nga igpapahulay, sa mga bag-ong subang sa bulan, ug sa tulo ka tinuig nga kasaulogan, ang Kasaulogan sa Pan nga Walay Patubo, ang Kasaulogan sa mga Semana ug ang Kasaulogan sa mga Balongbalong.
“Sa makatulo sa usa ka tuig ang tanan ninyong mga lalaki kinahanglang magpakita sa atubangan sa Ginoo nga inyong Dios, sa dapit nga pilion niya: sa Kasaulogan sa mga Pan nga Walay Patubo, sa Kasaulogan sa mga Semana ug sa Kasaulogan sa mga Balongbalong. Ug kinahanglang dili sila magpakita nga walay dala sa atubangan sa Ginoo.
“Ipasaulog sa katawhan sa Israel ang Pagsaylo sa gitakda nga panahon niini. Usahay ang panganod magpabilin sa ibabaw sa Tolda sa pipila ka adlaw, unya sumala sa sugo sa Ginoo magpuyo sila sa kampo ug sumala sa sugo sa Ginoo manglakaw sila. Ug usahay ang panganod magpabilin sukad sa pagkagabii hangtod sa pagkabuntag, ug kon ang panganod mopataas sa pagkabuntag, sila manglakaw o kon mopabilin ug usa ka adlaw ug usa ka gabii, sa diha nga mopataas ang panganod, sila manglakaw. Bisan ug duha ka adlaw o usa ka bulan o taastaas nga panahon nga ang panganod magpadayon pa sa ibabaw sa Tolda, magpabilin niini, ang katawhan sa Israel magpabilin sa kampo ug dili manglakaw. Apan kon kini mopataas, sila manglakaw. Sa sugo sa Ginoo magpahiluna sila sa kampo ug sa sugo sa Ginoo manglakaw sila. Sila mituman sa sugo sa Ginoo, sa sugo sa Ginoo pinaagi kang Moises. Sa ikanapulo ug upat nga adlaw niining bulana, sa pagkakilomkilom, saulogon ninyo kini sa gitakdang panahon niini, sumala sa tanang lagda niini ug sumala sa tanang mga tulumanon niini saulogon ninyo kini.”
“Apan sa ikanapulo ug lima nga adlaw sa ikapito nga bulan, sa diha nga makatigom kamo ug abot sa yuta, himoa ninyo ang kasaulogan sa Ginoo sulod sa pito ka adlaw. Ang unang adlaw usa ka pahulay nga balaan ug ang ikawalo nga adlaw usa ka pahulay nga balaan.
“Sultihi ang katawhan sa Israel: Sa ikanapulo ug lima nga adlaw niining ikapito nga bulan ug sulod sa pito ka adlaw mao ang Kasaulogan sa mga Balongbalong ngadto sa Ginoo.
“Apan sa ikanapulo nga adlaw niining ikapito nga bulan mao ang Adlaw sa Pagtabon sa Sala. Kini mao ang panahon sa balaan nga panagtigom ug hikawi ninyo ang inyong kaugalingon ug paghalad kamo ug halad pinaagi sa kalayo alang sa Ginoo.
“Sultihi ang katawhan sa Israel: Sa ikapito nga bulan, sa unang adlaw sa bulan maoy usa ka balaan nga pahulay alang kaninyo, usa ka balaang panagtigom nga saulogon pinaagi sa pagpatingog sa mga trumpeta.
“Pag-ihap kamo sugod sa adlaw human sa adlaw nga igpapahulay, sugod sa adlaw nga magdala kamo sa binangan sa halad nga binayaw, hangtod sa ikapito nga adlaw nga igpapahulay. Mag-ihap kamo ug 50 ka adlaw hangtod sa adlaw sunod sa ikapito nga adlaw nga igpapahulay ug unya maghalad kamo ug bag-o nga halad nga pagkaon alang sa Ginoo.
“Sultihi ang katawhan sa Israel: Sa dihang mosulod na kamo sa yuta nga akong ihatag kaninyo ug mag-ani kamo sa abot niini, dad-a ninyo ngadto sa pari ang usa ka bangan sa unang mga bunga sa inyong pag-ani. Bayawon niya ang binangan sa atubangan sa Ginoo, aron kini dawaton alang kaninyo. Sa pagkaugma, human sa adlaw nga igpapahulay ang pari magbayaw niini.
Sa unang bulan, sa ikanapulo ug upat nga adlaw sa bulan, taliwala sa duha ka gabii, mao ang Kasaulogan sa Pagsaylo sa Ginoo.
“Kini mao ang gitakda nga mga kasaulogan sa Ginoo, ang mga panagtigom nga balaan nga ipahibalo ninyo sa panahon nga gitakda kini.
“Sultihi ang katawhan sa Israel: Ang gitakda nga mga kasaulogan sa Ginoo nga inyong ipahibalo ingon nga balaan nga mga panagtigom, ang akong mga kasaulogan nga gitakda mao kini.
Tumanon ninyo kini nga pahimangno ingon nga usa ka tulumanon alang kaninyo ug sa inyong mga kaliwat hangtod sa kahangtoran. Ug sa diha nga mosulod kamo sa yuta nga ihatag sa Ginoo kaninyo sumala sa iyang gisaad, tumana ninyo kini nga tulumanon. Ug sa diha nga ang inyong mga anak moingon kaninyo, ‘Unsa bay gipasabot niining maong tulumanon?’ Kamo moingon, ‘Mao kini ang halad sa Pagsaylo sa Ginoo kay misaylo siya sa mga balay sa katawhan sa Israel didto sa Ehipto, sa dihang gipamatay niya ang mga Ehiptohanon, apan gisayloan niya ang atong mga panimalay.’ ” Ug ang katawhan miduko ug misimba.
Ug sa ikanapulo ug lima nga adlaw niining bulana maoy usa ka kasaulogan, sulod sa pito ka adlaw sa pan nga walay patubo ang kaonon. Sa unang adlaw himoon ang usa ka balaan nga panagtigom, dili kamo mabuhat ug bug-at nga buluhaton.
“Sa unang adlaw sa ikapito nga bulan, maghimo kamo ug usa ka balaan nga panagtigom, dili kamo magbuhat ug bug-at nga buluhaton. Kini mao ang adlaw sa pagpatingog sa mga trumpeta alang kaninyo.
“Kining adlawa mahimong usa ka handomanan alang kaninyo, ug himoon ninyo kini ingon nga kasaulogan alang sa Ginoo. Sa tanan ninyong kaliwatan saulogon ninyo kini ingon nga tulumanon hangtod sa kahangtoran.
“Bantayi ninyo ang bulan sa Abib ug sauloga ang Pagsaylo alang sa Ginoo nga inyong Dios, kay sa bulan sa Abib gikuha kamo sa Ginoo nga inyong Dios gikan sa Ehipto niadtong usa ka gabii.
Tumana ang Kasaulogan sa mga Semana, ang unang mga abot sa trigo, ug ang Kasaulogan sa Pag-ani sa kataposan sa tuig.
“Makatulo sa usa ka tuig maghimo kamo ug kasaulogan alang kanako. Himoa ninyo ang Kasaulogan sa Pan nga Walay Patubo sumala sa akong gisugo kaninyo. Magkaon kamo ug pan nga walay patubo sulod sa pito ka adlaw sulod sa gitakda nga panahon sa bulan sa Abib, kay niini migula kamo gikan sa Ehipto ug walay si bisan kinsa nga magpakita sa akong atubangan nga walay dala. Kinahanglan nga himoon ninyo ang Kasaulogan sa Pag-ani sa mga unang bunga sa inyong mga paghago, sa inyong gipugas sa uma. Ug himoa ninyo ang Kasaulogan sa Paghipos sa Abot sa kataposan sa tuig, sa dihang hiposon ninyo gikan sa uma ang bunga sa inyong mga paghago.
“Ug himoa ang Kasaulogan sa mga Balongbalong sulod sa pito ka adlaw, sa dihang matigom na ninyo ang mga ani gikan sa inyong giokanan ug sa inyong pug-anan sa ubas. Ug paglipay kamo sa inyong pagsaulog, kamo ug ang inyong anak nga lalaki, ug ang inyong anak nga babaye ug ang inyong ulipon nga lalaki ug ang inyong ulipon nga babaye, ang Levihanon, ang langyaw, ang wala nay amahan ug ang biyuda nga anaa sa inyong mga lungsod.
Unya sauloga ninyo ang Kasaulogan sa mga Semana alang sa Ginoo nga inyong Dios uban ang halad nga kinabubut-on sa inyong kamot nga inyong ihatag, ingon nga gipanalanginan kamo sa Ginoo nga inyong Dios.
Unya ang tanan nga wala mamatay gikan sa tanang mga nasod nga miadto batok sa Jerusalem moadto matag tuig aron pagsimba sa Hari, ang Ginoo sa mga panon, paghimo sa Kasaulogan sa Balongbalong.
Ug sa nakita niya nga kini nakapahimuot sa mga Judio, mipadayon siya sa pagdakop usab kang Pedro. Nahitabo kini sa mga adlaw sa Pan nga Walay Patubo. Ug sa nadakop na niya si Pedro, gibutang niya siya sa bilanggoan ug gitugyan siya ngadto sa upat ka hut-ong sa mga sundalo aron pagbantay kaniya sa tuyo nga human sa Kasaulogan sa Pagsaylo paatubangon niya siya sa katawhan.
Balaanon ninyo ang ika-50 nga tuig ug ipahibalo ninyo ang kagawasan ngadto sa tibuok nga yuta alang sa tanang mga nagpuyo niini. Kini mao ang pagkalipay alang kaninyo, ug mamalik kamo ang matag tawo ngadto sa iyang kaugalingong yuta ug ang matag usa mamalik sa iyang panimalay.
Tan-awa ang Zion, ang siyudad sa atong mga tinakda nga kasaulogan! Ang imong mga mata makakita sa Jerusalem, usa ka puluy-anan nga malinawon, usa ka tolda nga dili mabalhin, ang mga lagdok niini dili gayod lukahon, o bugtoon ang bisan usa sa mga pisi niini.
Unya nagsingabot na ang Kasaulogan sa Pagsaylo nga iya sa mga Judio, ug sa wala pa kini, daghan ang nanungas gikan sa kalungsoran ngadto sa Jerusalem aron sa pagpaputli sa ilang kaugalingon.
Ug sa ingon gipahayag ni Moises sa katawhan sa Israel ang mga kasaulogan nga gitakda sa Ginoo.
“Sa ikanapulo ug lima nga adlaw sa ikapito nga bulan, kamo maghimo ug usa ka balaan nga panagtigom; dili kamo magbuhat ug bug-at nga buluhaton ug magsaulog kamo alang sa Ginoo sulod sa pito ka adlaw.
Ug ilang gihimo ang Kasaulogan sa Pan nga Walay Patubo sulod sa pito ka adlaw uban sa kalipay kay ang Ginoo naghimo kanila nga malipayon ug naglukmay sa kasingkasing sa hari sa Asiria ngadto kanila, mao nga gitabangan niya sila sa buluhaton sa balay sa Dios, ang Dios sa Israel.
Sa adlaw usab sa inyong kalipay ug sa inyong gitakda nga mga kasaulogan ug sa mga sinugdanan sa inyong mga bulan, patingoga ninyo ang mga trumpeta alang sa inyong mga halad nga sunogon ug alang sa mga inihaw ninyong mga halad sa pakigdait ug kini mahimo alang kaninyo nga handomanan sa atubangan sa inyong Dios. Ako mao ang Ginoo nga inyong Dios.”
“Sa ikanapulo nga adlaw niining ikapito nga bulan, maghimo kamo ug usa ka balaan nga panagtigom ug maghikaw sa inyong kaugalingon, dili kamo magbuhat ug bisan unsa nga buluhaton.
Himoa ninyo ang inyong buluhaton sulod sa unom ka adlaw apan ang ikapito nga adlaw himoa ninyo nga adlawng igpapahulay sa balaang pagpahulay ngadto sa Ginoo. Si bisan kinsa nga magbuhat ug bisan unsa nga buluhaton niining adlawa, kinahanglan nga patyon siya.
apan milawig kami gikan sa Filipos human sa mga adlaw sa Pan nga Walay Patubo ug sulod sa lima ka adlaw miadto kami kanila sa Troas, diin nagpabilin kami sulod sa pito ka adlaw.
Unya ang hari nagsugo sa tibuok katawhan, “Tumana ang Kasaulogan sa Pagsaylo alang sa Ginoo nga inyong Dios, sumala sa nasulat niining basahon sa kasabotan.”
ingon nga ang mga adlaw diin ang mga Judio nakapahulay gikan sa ilang mga kaaway, ug ingon nga bulan diin ang kasubo gihimo nga kalipay ug ang kasakit usa ka maayong adlaw, nga sila nagbuhat niini nga mga adlaw sa pagsaulog ug paglipay, mga adlaw sa pagpadala ug mga gasang pagkaon sa usa ug usa ug mga gasa alang sa mga kabos.
Kini alang kaninyo usa ka adlaw nga igpapahulay sa balaan nga pahulay ug maghikaw kamo sa inyong kaugalingon, sa ikasiyam nga adlaw sa bulan, gikan sa gabii hangtod sa sunod nga gabii. Tumana ninyo ang inyong adlaw nga igpapahulay.”
Ug himoa ninyo ang kasaulogan sa Pan nga Walay Patubo, kay niining adlawa gikuha nako ang inyong mga panon gikan sa yuta sa Ehipto. Busa sauloga ninyo kining adlawa sa tanan ninyong kaliwatan ingon nga usa ka tulumanon hangtod sa kahangtoran.
Unya sa kataposang adlaw nga mao ang labing dakong adlaw sa kasaulogan, si Jesus mitindog ug misinggit nga nag-ingon, “Kon adunay tawong giuhaw, paaria siya kanako aron siya moinom.
“Mao kini ang giingon sa Ginoo sa mga panon: Ang puasa sa ikaupat nga bulan, ug ang puasa sa ikalima, ug ang puasa sa ikapito, ug ang puasa sa ikanapulo mahimo nga kasadya ug kalipay alang sa balay sa Juda, ug mga malipayon nga kasaulogan, busa higugmaa ang kamatuoran ug pakigdait.
Apan ang tawo nga hinlo ug wala mopanaw sa layo, kon magdumili siya sa pagsaulog sa Pagsaylo, ang maong tawo ipahimulag gikan sa iyang katawhan tungod kay wala siya maghalad sa iyang halad alang sa Ginoo sa gitakdang panahon niini; ang maong tawo magpas-an sa iyang sala.
Ang katawhan sa Israel nga nanambong nagsaulog sa Pagsaylo niadtong panahona ug sa Kasaulogan sa Pan nga Walay Patubo sulod sa pito ka adlaw.
Niining bukira ang Ginoo sa mga panon maghimo alang sa tanang mga katawhan ug usa ka kasaulogan sa tambok nga mga butang, usa ka kasaulogan sa mga maayong bino, sa mga butang nga tambok nga puno sa uyok, sa maayong bino nga pinalugdang nga maayong pagkasala.
Makabaton kamo ug usa ka alawiton ingon sa gabii sa dihang saulogon ang usa ka balaan nga kasaulogan, ug kalipay sa kasingkasing sa diha nga ang usa ka tawo magpatingog uban ang usa ka plawta aron sa pag-adto sa bukid sa Ginoo, ngadto sa Bato sa Israel.
Busa didtoy dakong kalipay sa Jerusalem kay sukad sa panahon ni Solomon nga anak ni David nga hari sa Israel, wala pay sama niini didto sa Jerusalem.
Sa dihang nahinumdom ako niini ang akong kasingkasing naguol pag-ayo: giunsa nako pag-uban sa panon sa katawhan, ug sa pagpangulo kanila sa pagpanglakaw ngadto sa balay sa Dios, uban sa tingog sa kalipay ug pagpasalamat, usa ka dakong panon nga nagsaulog.
Ug sa milabay na ang taas nga panahon ug kuyaw na ang paglawig tungod kay ang tingpuasa milabay na man, si Pablo mitambag kanila
Pangadto kamo sa kasaulogan. Dili ako moadto sa maong kasaulogan, kay ang akong panahon wala pa mahingpit.”
Apan sila miingon, “Dili sa panahon sa Kasaulogan kay tingali unya ug mahitabo ang kaguliyang sa mga tawo.”
“Sa diha nga ang katawhan sa yuta moanhi sa atubangan sa Ginoo panahon sa mga tinakda nga kasaulogan, kadtong mosulod agi sa amihanang ganghaan aron sa pagsimba mogula agi sa habagatang ganghaan, ug kadtong mosulod agi sa habagatang ganghaan mogula usab agi sa amihanang ganghaan. Siya dili mobalik agi sa ganghaan diin siya misulod, kondili siya mogula lahos sa ganghaan nga atbang sa iyang gisudlan.
“Kini mao ang mga kasaulogan nga gitakda sa Ginoo, nga inyong ipahibalo ingon nga mga panahon sa balaang panagtigom aron sa paghalad ug halad pinaagi sa kalayo alang sa Ginoo, mga halad nga sunogon ug mga halad nga pagkaon, mga inihaw ug mga halad nga ilimnon, ang matag usa sa gitakda nga adlaw niini.
Patingoga ang trumpeta sa bag-ong subang sa bulan, sa pagtakdol sa bulan, sa atong adlaw sa kasaulogan.
Sa matag adlaw sukad sa unang adlaw hangtod sa kataposang adlaw, siya nagbasa gikan sa basahon sa Balaod sa Dios. Ug ilang gituman ang kasaulogan sulod sa pito ka adlaw ug sa ikawalo nga adlaw adunay balaang panagtigom sumala sa tulumanon.
ang mga Judio naggahin, ug ilang gisaad alang sa ilang kaugalingon ug sa ilang mga kaliwatan ug sa tanan nga mitipon kanila, aron nga sa walay pagpakyas magtuman sila niining duha ka adlaw sumala sa nasulat niini ug sa panahon nga gitakda matag tuig, nga kining mga adlawa hinumdoman ug tumanon hangtod sa tanang kaliwatan, sa matag panimalay, lalawigan ug siyudad ug nga niining mga adlawa sa Purim dili mahimong walay pulos alang sa mga Judio o ang handomanan niining mga adlaw mahunong sa ilang mga kaliwatan.
Ang ika-50 nga tuig mao ang tuig sa kalipay alang kaninyo. Ayaw kamo pagpugas o pag-ani sa moturok sa iyang kaugalingon diha sa yuta, ayaw pamupo sa paras diha sa parasan nga wala kapul-ongi.
“Pagbuhat ug duha ka trumpeta nga plata. Buhata kini pinaagi sa pagsalsal ug gamita kini alang sa pagtawag sa katilingban ug alang sa pagpalakaw sa nagkampo.
Unya si Jeroboam nagtakda ug usa ka kasaulogan sa ikanapulo ug lima nga adlaw sa ikawalo nga bulan, sama sa kasaulogan nga didto sa Juda ug siya naghalad ibabaw sa halaran, sama sa gihimo niya didto sa Betel, naghalad ngadto sa mga nating baka nga iyang gibuhat. Ug iyang gipahimutang sa Betel ang mga pari sa mga habog nga dapit nga iyang gibuhat.
Katungdanan sa pangulo ang paghatag sa mga halad nga sunogon, sa mga halad nga pagkaon ug sa mga halad nga ilimnon panahon sa mga kasaulogan, sa mga bag-ong subang sa bulan ug sa mga adlawng igpapahulay, sa tanang mga tinakda nga kasaulogan sa balay sa Israel. Siya mag-andam sa halad tungod sa sala, sa halad nga pagkaon, sa halad nga sunogon ug sa halad sa pakigdait aron sa paghimo sa pagtabon sa sala alang sa balay sa Israel.
Patingoga ang trumpeta didto sa Zion; paggahin ug panahon alang sa pagpuasa; pagtawag ug usa ka balaang panagtigom;
Kay kini tuig sa kalipay, kini balaan alang kaninyo. Ang abot sa yuta maoy inyong kaonon.
Sa unang adlaw sa Kasaulogan sa Pan nga Walay Patubo, sa diha nga naghalad sila sa karnero sa Pagsaylo, ang iyang mga tinun-an miingon kaniya, “Asa man kami nimo paadtoa sa paghikay aron ikaw mokaon alang sa pagsaulog sa Pagsaylo?”
Unya miabot ang adlaw sa Pan nga Walay Patubo, nga maoy pag-ihaw sa karnero alang sa Kasaulogan sa Pagsaylo.
Niadtong higayona nagkaduol na ang Kasaulogan sa Pan nga Walay Patubo, nga ginganlan ug Kasaulogan sa Pagsaylo.
Sa unang adlaw sa Kasaulogan sa Pan nga Walay Patubo, si Jesus giadto sa mga tinun-an nga nag-ingon, “Asa man nimo ipahikay kanamo ang imong pagkaon sa Kasaulogan sa Pagsaylo?”