Sofonias 2:9

Ang Biblia 2011

Busa ingon nga ako buhi, nag-ingon ang Ginoo sa mga panon, ang Dios sa Israel, ang Moab mahimong sama sa Sodoma, ug ang mga Amonihanon sama sa Gomora, usa ka yuta nga malukop sa mga kadyapa ug sa mga gahong sa asin, biniyaan hangtod sa kahangtoran. Ang mahibilin sa akong katawhan manakmit kanila ug ang salin sa akong nasod manag-iya kanila.

Cross References

Isaias 11:14

Apan sila manghugpa sa abaga sa mga Filistihanon didto sa kasadpan; maghiusa sila sa pagpangsakmit sa mga tawo sa silangan. Ilang ituy-od ang ilang kamot batok sa Edom ug sa Moab, ug ang mga Amonihanon motuman kanila.

Isaias 25:10

Kay ang kamot sa Ginoo mopahulay niining bukira, Ang Moab yatakan diha sa iyang dapit, ingon sa uhot nga gitumban diha sa tinapok nga hugaw.

Isaias 49:18

Iyahat ang imong mga mata sa palibot ug tan-awa, kini silang tanan magtigom, manganha kanimo. Ingon nga ako buhi, nag-ingon ang Ginoo, ikaw magbutang kanila ingon nga usa ka dayandayan, ug magbakos kanila sama sa usa ka pangasaw-onon.

Jeremias 46:18

“Ingon nga buhi ako, nag-ingon ang Hari nga ang ngalan si Yahweh sa mga panon, sama sa Tabor taliwala sa mga bukid, ug sama sa Carmel nga anaa duol sa dagat, ang usa ka tawo moduol.

Jeremias 48:1

Mahitungod sa Moab. Mao kini ang giingon sa Ginoo sa mga panon, ang Dios sa Israel: “Alaot ang Nebo, kay nalaglag kini! Ang Kiriataim gipakaulawan, kini nailog; ang panalipod gipakaulawan ug nagun-ob;

Jeremias 49:1

Mahitungod sa mga Amonihanon. Mao kini ang giingon sa Ginoo: “Wala bay mga anak nga lalaki ang Israel? Wala ba siyay manununod? Busa nganong giilogan man ni Milcom ang Gad, ug ang iyang katawhan mipuyo sa mga siyudad niini?

Jeremias 49:18

Sama sa pagkalaglag sa Sodoma ug sa Gomora ug sa mga silingang siyudad, nag-ingon ang Ginoo, walay tawo nga magpuyo didto, walay tawo nga moadto didto aron mopuyo.

Jeremias 49:33

Ang Hasor mahimong puluy-anan sa mga iro nga ihalas, biniyaan nga dayon; walay tawo nga magpuyo didto, walay tawo nga magpuyo niini.”

Jeremias 50:40

Ingon nga ang Sodoma ug Gomora gigun-ob sa Dios ug ang mga kasikbit nga siyudad niini, nag-ingon ang Ginoo, busa walay tawo nga magpuyo didto ug walay anak sa tawo nga molangyaw didto.

Amos 1:13

Mao kini ang giingon sa Ginoo, “Tungod sa tulo ka kalapasan sa mga Amonihanon, ug tungod sa upat, dili nako bakwion ang silot; tungod kay giyasyasan nila ang mga mabdos nga babaye sa Gilead, aron padakoon nila ang ilang utlanan.

Amos 2:1

Mao kini ang giingon sa Ginoo, “Tungod sa tulo ka kalapasan sa Moab, ug tungod sa upat, dili nako bakwion ang silot; tungod kay gisunog niya hangtod sa pagkaapog ang mga bukog sa hari sa Edom.

Sofonias 2:14

Ang mga panon sa kahayopan manglubog sa taliwala niya, ang tanang mga mananap sa mga nasod, lakip ang agila ug ang eriso; magpuyo sa iyang mga ulohang siyudad, ang ngiwngiw mag-awit diha sa mga tamboanan ang uwak magtingog diha sa mga tugkaranan, kay ilang panguhaon ang mga hinimo ug kahoy nga cedro.

Sofonias 2:7

Ang baybayon mahimong kabtangan alang sa mga salin sa balay sa Juda diin sila manibsib, ug diha sa mga balay sa Askelon sila manghigda sa kagabhion. Kay ang Ginoo nga ilang Dios maghunahuna kanila ug magpahiuli sa ilang kahimtang.

Sofonias 3:13

kadtong salin sa Israel; sila dili magbuhat ug sayop o mosulti ug mga bakak, o ang malimbongon nga dila makaplagan pa diha sa ilang baba. Sila manibsib ug manghigda, ug walay bisan kinsa nga maghadlok kanila.

Zacarias 2:13

Paghilom, tanang katawhan, sa atubangan sa Ginoo, kay siya nahigmata gikan sa iyang balaan nga puluy-anan.

Numeros 14:21

Apan sa pagkatinuod gayod, ingon nga ako buhi, ug ingon nga ang himaya sa Ginoo nagpuno sa tibuok kayutaan,

Roma 14:11

kay nasulat kini, “Ingon nga ako buhi, nag-ingon ang Ginoo, ang tanan moluhod sa akong atubangan, ug ang tanang dila magsugid ngadto sa Dios.”

Deuteronomio 29:22

Ug ang kaliwatan nga umaabot, ang inyong mga anak nga mosunod kaninyo ug ang langyaw nga moabot gikan sa layo nga kayutaan, moingon sa diha nga makakita sila sa mga kalisdanan niining yutaa ug sa mga sakit nga gipadala sa Ginoo kanila—

Deuteronomio 29:23

ang tibuok nga yuta niini asupri ug asin ug nagdilaab, wala pugsi ug walay nagtubo niini, diin walay sagbot nga makaturok, sama sa pagkalaglag sa Sodoma ug sa Gomora, sa Adma ug sa Zeboim nga gilaglag sa Ginoo sa iyang kapungot ug kaligutgot—