Numeros 22:12

Ang Biblia 2011

Ug ang Dios miingon kang Balaam, “Dili ka mouban kanila; dili ka magtunglo sa katawhan kay gipanalanginan sila.”

Cross References

Genesis 12:2

Ug akong buhaton gikan kanimo ang usa ka dako nga nasod, ug ikaw panalanginan nako ug himoong bantogan ang imong ngalan, aron ikaw mahimo nga usa ka panalangin.

2 Cronicas 31:10

Ug si Asarias nga pangulong pari gikan sa balay ni Zadok mitubag kaniya, “Sukad nga ang katawhan misugod sa pagdala sa mga halad ngadto sa balay sa Ginoo, kita nakakaon ug may igo pa, ug daghan pa ang nahibilin, kay ang Ginoo nagpanalangin sa iyang katawhan mao nga aduna kitay daghang nahibilin.”

Salmo 144:15

Malipayon ang katawhan nga natumngan sa maong mga panalangin? Malipayon ang katawhan nga ang ilang Dios mao ang Ginoo!

Salmo 146:5

Malipayon siya nga ang tabang mao ang Dios ni Jacob, nga ang paglaom anaa sa Ginoo nga iyang Dios,

Isaias 61:9

Ang ilang kaliwatan mailhan taliwala sa kanasoran, ug ang ilang kaliwatan sa taliwala sa mga katawhan; ang tanan nga makakita kanila moila kanila, nga sila usa ka katawhan nga gipanalanginan sa Ginoo.

Miqueas 6:5

O akong katawhan, hinumdomi unsa ang gilaraw ni Balak nga hari sa Moab, ug kon unsa ang gitubag kaniya ni Balaam nga anak ni Beor ug unsa ang nahitabo gikan sa Sitim ngadto sa Gilgal, aron kamo mahibalo sa pagkamatarong sa Ginoo.”

Numeros 22:11

‘Tan-awa, kining katawhan nga migula gikan sa Ehipto milukop sa tibuok sa yuta. Dali ngari, tungloha sila alang kanako basin na lamang ug ako makahimo sa pagpakig-away batok kanila ug sa paghingilin kanila.’ ”

Numeros 22:13

Busa sa pagkabuntag mibangon si Balaam ug miingon sa mga pangulo ni Balak, “Pamauli kamo sa inyong yuta, kay ang Ginoo nagdumili sa pagpauban kanako kaninyo.”

Numeros 22:6

Busa dali ngari, tungloha kining maong katawhan alang kanako kay sila gamhanan kaayo kay kanako, basin na lamang ug mabuntog nako sila ug maghingilin kanila gikan sa yuta; kay ako nahibalo nga ang imong panalanginan mabulahan ug ang imong tunglohon matinunglo.”

Numeros 23:23

Wala gayoy panglamat batok kang Jacob, walay pagpanagna batok sa Israel. Karon ikasulti kini mahitungod kang Jacob ug sa Israel, ‘Unsa ang nabuhat sa Dios!’

Numeros 23:3

Ug si Balaam miingon kang Balak, “Tindog tupad sa imong halad nga sunogon ug ako moadto, basin ug ang Ginoo moanhi sa pagpakigtagbo kanako. Ug bisan unsa nga iyang ipakita kanako, akong isugilon kanimo.” Ug siya miadto sa usa ka hawan nga bukid.

Numeros 23:8

Unsaon nako pagtunglo sa wala tungloha sa Dios? Unsaon nako pagpanghimaraot sa wala panghimaraota sa Ginoo?

Numeros 24:9

Siya mipauraray, siya mihigda sama sa usa ka liyon, ug sama sa usa ka baye nga liyon; kinsa ang mopukaw kaniya? Bulahan ang tanan nga magpanalangin kanimo, ug tinunglo ang tanan nga magtunglo kanimo.”

Mateo 27:19

Ug samtang naglingkod siya didto sa hukmanan, gipadad-an siya sa iyang asawa ug tugon, “Ayaw pangilabot nianang tawo nga matarong kay karong adlawa nahasol ako pag-ayo tungod sa akong damgo mahitungod kaniya.”

Roma 11:29

Kay ang mga gasa ug ang pagtawag gikan sa Dios dili mabakwi.

Mga Taga-Efeso 1:3

Dayegon nato ang Dios ug Amahan sa atong Ginoong Jesu-Cristo, nga pinaagi kang Cristo nagpanalangin kanato sa tanang mga espirituhanong panalangin diha sa mga langitnong dapit.

Deuteronomio 2:7

Kay ang Ginoo nga inyong Dios nagpanalangin kaninyo sa tanang buhat sa inyong mga kamot. Siya nahibalo sa inyong paglatas niining dakong kamingawan. Niining 40 ka tuig, ang Ginoo nga inyong Dios nag-uban kaninyo, walay bisan unsa nga nakulang kaninyo.’

Deuteronomio 23:5

Apan ang Ginoo nga inyong Dios dili buot mamati kang Balaam kondili gibalhin sa Ginoo nga inyong Dios ang tunglo ngadto sa panalangin alang kaninyo kay ang Ginoo nga inyong Dios nahigugma kaninyo.

Deuteronomio 28:6

Mabulahan kamo sa dihang mosulod kamo ug mabulahan kamo sa dihang mogula kamo.

Deuteronomio 33:29

Bulahan ikaw, O Israel! Kinsa ba ang sama kanimo, katawhan nga giluwas sa Ginoo, ang taming sa imong panabang ug ang espada sa imong kadaogan? Ang imong mga kaaway moanha nga magpaitoy-itoy kanimo. ug imong tumban ang ilang habog nga mga dapit.”

Deuteronomio 7:14

Mabulahan kamo labaw sa tanang mga katawhan. Walay lalaki o babaye nga dili makaanak diha kaninyo o sa inyong kahayopan.