Miqueas 6:7

Ang Biblia 2011

Mahimuot ba ang Ginoo sa mga linibo ka laking karnero, uban sa napulo ka libo ka suba sa lana? Ihatag ba nako ang akong kamagulangang anak tungod sa akong kasal-anan, ang bunga sa akong lawas tungod sa sala sa akong kalag?”

Cross References

2 Mga Hari 16:3

apan naglakaw siya diha sa dalan sa mga hari sa Israel. Gisunog pa gani niya ang iyang anak nga lalaki ingon nga halad sumala sa dulumtanang buhat sa mga nasod nga gisalikway sa Ginoo gikan sa atubangan sa katawhan sa Israel.

2 Mga Hari 21:6

Ug iyang gisunog ang iyang anak nga lalaki ingon nga halad, ug nanag-an ug nanglamat ug nagpakitambag niadtong tigpakisayod ug mga espiritu ug tigsalamangka. Siya naghimo ug daotan sa hilabihan gayod diha sa panan-aw sa Ginoo nga nakapahagit kaniya sa pagkasuko.

2 Mga Hari 23:10

Ug iyang gipasipalahan ang Tofet nga anaa sa walog sa mga anak ni Hinom, aron walay bisan kinsa nga makasunog sa iyang anak nga lalaki o anak nga babaye ingon nga halad ngadto kang Molec.

2 Mga Hari 3:27

Unya iyang gikuha ang iyang kamagulangang anak nga lalaki nga mao untay maghari puli kaniya ug gihalad siya ingon nga halad nga sunogon ibabaw sa kuta. Ug dihay dakong kaligutgot batok sa Israel. Ug namahawa sila gikan kaniya ug namauli ngadto sa ilang kaugalingong yuta.

Job 29:6

sa diha nga ang akong mga lakang gihugasan ug gatas, ug ang bato nagpaagas alang kanako ug mga sapa sa lana!

Salmo 50:9

Dili ako modawat sa torong baka gikan sa imong balay, o laking kanding gikan sa imong mga toril.

Salmo 51:16

Kay ikaw dili malipay sa halad nga inihaw; kon ako maghalad ug halad nga sunogon dili ikaw mahimuot.

Salmo 51:18

Buhata ang maayo alang sa Zion, sumala sa imong maayong kabubut-on; patindoga pag-usab ang mga kuta sa Jerusalem,

Mga Panultihon 15:8

Ang halad sa daotan usa ka dulumtanan sa Ginoo, apan ang pag-ampo sa matarong maoy iyang kalipay.

Mga Panultihon 21:3

Ang pagbuhat sa pagkamatarong ug hustisya labaw nga dawaton sa Ginoo kay sa halad.

Isaias 1:1

Ang panan-awon ni Isaias nga anak ni Amos, nga iyang nakita mahitungod sa Juda ug sa Jerusalem, sa mga adlaw ni Uzias, ni Jotam, ni Ahas ug ni Hesekias, nga mga hari sa Juda.

Isaias 40:16

Ang Lebanon dili paigo nga isugnod, o ang mga mananap niini igo sa usa ka halad nga sunogon.

Jeremias 19:5

ug nagtukod sila sa mga habog nga dapit ni Baal aron sa pagsunog sa ilang mga anak nga lalaki diha sa kalayo ingon nga mga halad nga sunogon alang sa Baal, nga wala nako isugo o imando o mosantop kini sa akong hunahuna,

Jeremias 6:20

Sa unsang tuyo nga midangat kanako ang insenso gikan sa Seba, o ang tam-is nga tubo gikan sa layong dapit? Ang inyong halad nga sunogon dili madawat, o ang inyong mga halad makapahimuot kanako.

Jeremias 7:31

Ug ilang gitukod ang habog nga dapit sa Tofet nga atua sa walog sa anak ni Hinom, aron sa pagsunog diha sa kalayo sa ilang mga anak nga lalaki ug sa ilang mga anak nga babaye, nga wala nako isugo o mosantop sa akong hunahuna.

Ezequiel 23:37

Kay sila nanapaw ug ang dugo anaa sa ilang mga kamot. Pinaagi sa ilang mga diosdios sila nakapanapaw ug ang ilang mga anak nga lalaki nga ilang gipanganak kanako ilang gihalad ngadto kanila ingon nga pagkaon.

Oseas 5:6

Uban sa ilang mga panon ug sa ilang kahayopan sila mangadto aron sa pagpangita sa Ginoo, apan dili nila makit-an siya; siya nagpalayo gikan kanila.

Oseas 6:6

Kay ako nagtinguha sa gugmang walay paglubad ug dili sa halad nga inihaw, sa kahibalo mahitungod sa Dios kay sa mga halad nga sunogon.

Levitico 18:21

Ayaw ihatag ang bisan usa sa imong mga anak aron ihalad sila pinaagi sa kalayo ngadto kang Molec ug sa ingon gipasipalahan nimo ang ngalan sa imong Dios. Ako mao ang Ginoo.

Levitico 20:1

Ang Ginoo miingon kang Moises,

Amos 5:22

Bisan pa ug kamo magtanyag kanako sa inyong mga halad nga sunogon, ug mga halad nga pagkaon, dili nako dawaton kini, ug ang halad sa pakigdait gikan sa inyong mga pinatambok nga mananap dili nako tan-awon.

Filemon 1:12

Gipabalik nako siya nganha kanimo, uban gayod sa akong kasingkasing.

Mga Maghuhukom 11:31

si bisan kinsa nga mogula sa pultahan sa akong balay aron sa pagsugat kanako, sa diha nga ako mopauli nga madaogon gikan sa mga Amonihanon maiya sa Ginoo ug ako maghalad kaniya alang sa usa ka halad nga sunogon.”

Mga Maghuhukom 11:39

Sa kataposan sa duha ka bulan, siya mipauli ngadto sa iyang amahan, nga naghimo ngadto kaniya sumala sa iyang panaad nga iyang gihimo. Wala gayod siya makasinati ug lalaki. Ug kini nahimong usa ka batasan didto sa Israel,

1 Samuel 15:22

Ug si Samuel miingon, “Aduna bay dakong kalipay ang Ginoo diha sa mga halad nga sunogon ug sa mga inihaw kay sa pagtuman sa tingog sa Ginoo? Timan-i, ang pagtuman labaw pang maayo kay sa inihaw, ug ang pagpamati kay sa tambok sa mga laking karnero.