Miqueas 4:10

Ang Biblia 2011

Paglimbaglimbag ug pag-agulo, O anak nga babaye sa Zion, sama sa babaye nga nagbati; kay karon mogula gayod ikaw sa siyudad ug magpuyo diha sa kapatagan; moadto ikaw sa Babilonia. Didto luwason ikaw, didto ang Ginoo maglukat kanimo gikan sa kamot sa imong mga kaaway.

Cross References

2 Mga Hari 20:18

Ug ang uban nimong mga anak nga lalaki nga matawo kanimo, ilang kuhaon ug himoon sila nga mga yunoko sa palasyo sa hari sa Babilonia.”

2 Mga Hari 25:4

Unya ang kuta sa siyudad gibuslotan ug ang hari uban sa mga manggugubat miikyas sa pagkagabii agi sa ganghaan tungatunga sa duha ka paril duol sa tanaman sa hari bisan ug ang mga Caldeanhon naglibot na sa siyudad. Ug sila miagi sa dalan padulong sa Araba.

2 Cronicas 33:11

Busa gidala sa Ginoo ngadto kanila ang mga tigmando sa kasundalohan sa hari sa Asiria nga midakop kang Manases pinaagi sa mga kaw-it, ug migapos kaniya pinaagi sa mga posas nga bronsi ug gidala siya ngadto sa Babilonia.

2 Cronicas 36:20

Iyang gibihag ngadto sa Babilonia kadtong nakaikyas gikan sa espada ug sila nahimong mga sulugoon niya ug sa iyang mga anak nga lalaki hangtod sa pagkatukod sa gingharian sa Persia,

2 Cronicas 36:23

“Mao kini ang gisulti ni Ciro nga hari sa Persia, ‘Ang Ginoo, ang Dios sa langit, naghatag kanako sa tanan nga gingharian sa yuta ug iya akong gisugo sa pagtukod alang kaniya ug usa ka balay didto sa Jerusalem nga anaa sa Juda. Si bisan kinsa nga anaa uban kaninyo sa tanan niyang katawhan, ang Ginoo nga iyang Dios mag-uban unta kaniya! Paadtoa siya.’ ”

Salmo 106:10

Busa giluwas niya sila gikan sa kamot sa nagdumot kanila, ug gikuha sila gikan sa kamot sa kaaway.

Isaias 43:14

Kini mao ang giingon sa Ginoo, ang inyong Manunubos, ang Balaan sa Israel: “Tungod kaninyo ako magpadala ngadto sa Babilonia, ug gun-obon nako ang tanang rehas, ug ang singgit sa mga Caldeanhon, mahimong pagbangutan.

Isaias 45:13

Gibangon nako siya diha sa pagkamatarong ug akong himoon nga tul-id ang tanan niyang mga dalan; siya magtukod sa akong siyudad, ug buhian ang akong mga hininginlan, dili tungod sa bili o sa balos,” nag-ingon ang Ginoo sa mga panon.

Isaias 48:20

Panggula kamo gikan sa Babilonia, pangagiw kamo gikan sa Caldea, ipahayag kini uban sa usa ka singgit sa kalipay, isaysay kini, isangyaw kini sa kinatumyan sa yuta; isulti ninyo, “Giluwas sa Ginoo ang iyang sulugoon nga si Jacob!”

Jeremias 13:4

“Kuhaa ang bakos nga imong pinalit nga anaa sa imong hawak ug pangandam, lakaw ngadto sa Eufrates ug tagoi kini didto sa usa ka liki sa pangpang.”

Jeremias 15:21

Pagawason ko ikaw gikan sa kamot sa mga daotan, ug lukaton ko ikaw gikan sa kamot sa mga tawong bangis.”

Jeremias 29:20

Busa pamatia ninyo ang pulong sa Ginoo, kamong tanan nga binihag nga akong gipapahawa gikan sa Jerusalem ngadto sa Babilonia.

Jeremias 4:31

Kay ako nakadungog ug pagtuaw sama sa usa ka babaye nga nagbati, ang kasakit sama sa nagpahimugso sa iyang kamagulangan nga anak, ang pagtuaw sa anak nga babaye sa Zion, naglisod sa pagginhawa, nagtuy-od sa iyang mga kamot, “Alaot ako! Nagkaluya ako atubangan sa mga mamumuno.”

Jeremias 48:41

ang mga siyudad makuha, ug ang mga salipdanan mailog. Ang kasingkasing sa mga manggugubat sa Moab nianang adlawa mahisama sa kasingkasing sa usa ka babaye nga nagbati.

Jeremias 52:27

Ug sila gitigbas sa hari sa Babilonia ug gipamatay didto sa Ribla sa yuta sa Hamat. Busa ang Juda gidala nga binihag gikan sa kaugalingon niining yuta.

Oseas 1:10

Bisan pa niana ang gidaghanon sa katawhan sa Israel mahisama sa balas sa dagat, nga dili matakos o maihap, ug sa dapit diin kini gisulti kanila, “Kamo dili akong katawhan,” kini isulti kanila “Mga anak sa buhi nga Dios.”

Oseas 13:13

Ang kasakit sa pagpanganak modangat kaniya, apan siya dili maalamon nga anak, kay karon siya dili angay nga magpadayag sa iyang kaugalingon diha sa baba sa tagoangkan.

Oseas 2:14

“Busa, tan-awa, danihon nako siya, ug dad-on ngadto sa kamingawan, ug sultihan nako siya diha sa kalumo.

Miqueas 5:2

Apan ikaw, O Betlehem Efrata, ikaw nga gamayng lungsod diha sa kabanayan sa Juda, gikan kanimo mogula alang kanako ang mahimong tigmando sa Israel, nga ang kagikan gikan pa sa kanhing panahon, gikan sa kakaraanan.

Miqueas 5:3

Busa pasagdan niya sila hangtod sa panahon nga kadtong nagbati manganak; unya ang uban sa iyang kaigsoonan mobalik ngadto sa katawhan sa Israel.

Gipadayag 12:14

Apan gihatag ngadto sa babaye ang duha ka mga pako sa dakong agila aron siya makalupad gikan sa bitin ngadto sa kamingawan, sa dapit diin siya atimanon sulod sa usa ka panahon, ug sa mga panahon, ug sa katunga sa usa ka panahon.