Mateo 6:2

Ang Biblia 2011

“Busa sa dihang maghatag ikaw ug limos, ayaw pagpatingog ug trumpeta sa imong atubangan sama sa gihimo sa mga tigpakaaron-ingnon diha sa mga sinagoga ug diha sa kadalanan aron sila dayegon sa mga tawo. Sa pagkatinuod, sultihan ko kamo nga sila nakadawat na sa ilang ganti.

Cross References

Salmo 112:9

Nanghatag siya nga madagayaon, nanghatag sa mga kabos; ang iyang pagkamatarong molungtad hangtod sa kahangtoran; ang iyang sungay bayawon diha sa kadungganan.

Salmo 37:21

Ang daotan mangutang ug dili mobayad, apan ang matarong maluluy-on ug manghatag.

Mga Panultihon 19:17

Siya nga maayo ngadto sa kabos nagpahulam sa Ginoo, ug siya mobayad kaniya sa iyang nabuhat.

Mga Panultihon 20:6

Daghang mga tawo magpahayag sa iyang kaugalingong pagkamaunongon, apan kinsay makakaplag ug usa ka matinumanon nga tawo?

Ecclesiastes 11:2

Hatagi ug bahin ang pito, bisan ang walo, kay ikaw wala masayod kon unsa ang kadaot nga mahitabo ibabaw sa yuta.

Isaias 10:6

Batok sa usa ka mapasipalahon nga nasod paadtoon nako siya, ug batok sa katawhan sa akong kaligutgot ako magsugo kaniya, sa pagkuha sa inilog ug sa pag-agaw sa sinakmit, ug aron sila tumban sama sa lapok sa mga dalan.

Isaias 58:7

Dili ba kini mao ang pagpaambit sa imong pan ngadto sa gigutom, ug pagdala sa kabos nga walay balay ngadto sa imong balay; sa diha nga ikaw makakita sa hubo, imo siyang bistihan, ug nga ikaw dili magtago gikan sa imong kaugalingon nga kadugo?

Isaias 9:17

Busa ang Ginoo wala malipay sa ilang mga batan-on nga lalaki, ug walay kaluoy sa mga wala nay amahan ug sa mga biyuda; kay ang tanan mapasipalahon ug tigbuhat ug daotan, ug ang matag baba nagsulti ug binuang. Bisan pa niining tanan ang iyang kasuko wala mapuypoy ug ang iyang kamot gibakyaw gihapon niya.

Oseas 8:1

Itaon sa imong baba ang trumpeta! Kay ang agila anaa sa balay sa Ginoo, tungod kay ilang giguba ang akong kasabotan ug gilapas ang akong Balaod.

Mateo 15:7

Tigpakaaron-ingnon! Pagkaayo gayong pagkapropesiya ni Isaias mahitungod kaninyo sa iyang pag-ingon,

Mateo 16:3

Ug inigkabuntag kamo moingon, ‘Mounos karon kay ang langit pula ug nanag-om.’ Makamao tuod kamong mohubad sa dagway sa kalangitan apan dili kamo makahubad sa mga ilhanan sa kapanahonan.

Mateo 22:18

Apan si Jesus nga nasayod sa ilang pagkadaotan, miingon, “Mga tigpakaaron-ingnon, nganong inyo man akong sulayan?

Mateo 23:5

Apan ang tanan nilang buhat gihimo aron lamang sa pagpasundayag ngadto sa mga tawo kay gipadak-an nila ang ilang mga pilakterya diha sa ilang ulo ug bukton ug gipatas-an nila ang ilang mga borlas sa sidsid sa ilang mga bisti.

Mateo 23:6

Ug gusto kaayo sila sa mga pinasidunggang dapit sa mga kombira ug sa labing maayong mga lingkoranan sa mga sinagoga

Mateo 24:51

Ug silotan niya siya ug ibutang tipon sa mga tigpakaaron-ingnon. Didto, ang mga tawo manghilak ug magkagot ang ilang mga ngipon.

Mateo 5:18

Kay sa pagkatinuod, sultihan ko kamo, hangtod nga mahanaw ang langit ug ang yuta, wala gayoy bisan usa na lang ka kudlit o usa ka tulbok nga sayloan diha sa Balaod hangtod nga ang tanan matuman.

Mateo 6:16

“Ug sa dihang magpuasa kamo, ayaw pagpakita nga nasubo kamo, sama sa mga tigpakaaron-ingnon kay gipasagdan nila nga nagkagidlay ang ilang mga nawong aron ang mga tawo makakita kanila nga nagpuasa. Sa pagkatinuod, sultihan ko kamo nga sila nakadawat na sa ilang ganti.

Mateo 6:3

Apan kon maghatag ikaw ug limos, ayaw pahibaloa ang wala nimong kamot sa gibuhat sa tuo nimong kamot

Mateo 6:5

“Ug sa dihang mag-ampo kamo, ayaw kamo pagsundog sa mga tigpakaaron-ingnon kay sila nahigugmang mag-ampo nga magtindog sa sulod sa mga sinagoga ug diha sa mga likoanan sa kadalanan aron makita sila sa mga tawo. Sa pagkatinuod, sultihan ko kamo nga sila nakadawat na sa ilang ganti.

Mateo 7:5

Tigpakaaron-ingnon! Kuhaa una ang troso gikan sa kaugalingon nimong mata ug unya makakita ka na pag-ayo aron sa pagkuha sa puling gikan sa mata sa imong igsoon.

Marcos 12:39

ug sa mga pinasidunggang lingkoranan sulod sa mga sinagoga ug sa mga pinasidunggang dapit diha sa mga kombira.

Marcos 7:6

Ug siya miingon kanila, “Maayo gayong pagkatagna ni Isaias mahitungod kaninyong mga tigpakaaron-ingnon, sumala sa nasulat, ‘Kining mga tawhana nagpasidungog kanako pinaagi sa ilang mga ngabil, apan ang ilang kasingkasing layo kanako.

Lucas 11:41

Apan ilimos ninyo kanang anaa sa sulod, ug tan-awa, ang tanan mahinlo alang kaninyo.

Lucas 11:43

Alaot kamong mga Pariseo, kay gihigugma ninyo ang labing maayong lingkoranan sa mga sinagoga ug ang mga pagtahod kaninyo sa mga tawo diha sa mga merkado.

Lucas 12:33

Ibaligya ang inyong kabtangan, ug panghatag kamo ug limos; sangkapi ang inyong kaugalingon sa mga sudlanan sa salapi nga dili madunot, sa bahandi sa langit nga dili mahurot diin walay kawatan nga makaduol ug walay mananap nga mokutkot.

Lucas 12:56

Mga tigpakaaron-ingnon! Makamao kamong mohubad sa dagway sa yuta ug sa langit, apan nganong dili man kamo makamaong mohubad sa kapanahonan karon?

Lucas 13:15

Ug ang Ginoo mitubag kaniya, “Mga tigpakaaron-ingnon! Dili ba nga ang matag usa kaninyo, sa adlaw nga igpapahulay, magbadbad sa iyang baka o sa iyang asno gikan sa kuwadra, ug dad-on kini sa gawas aron paimnon?

Lucas 20:46

“Pagbantay kamo sa mga eskriba nga gustong maglakawlakaw nga magsul-ob ug tag-as nga mga bisti ug mahigugma sa mga pagyukbo kanila diha sa mga merkado, ug sa mga labing maayong lingkoranan sulod sa mga sinagoga ug sa mga pinasidunggang lingkoranan diha sa mga kombira.

Lucas 6:24

“Apan alaot kamong mga dato, kay nakadawat na man kamo sa inyong kalipay.

Lucas 6:42

O unsaon man nimo pag-ingon ngadto sa imong igsoon, ‘Igsoon, akong kuhaon ang puling nga anaa sa imong mata,’ nga ikaw mismo wala man makakita sa troso nga anaa sa kaugalingon nimong mata? Tigpakaaron-ingnon! Kuhaa una ang troso nga anaa sa kaugalingon nimong mata ug unya makakita ka na pag-ayo sa pagkuha sa puling nga anaa sa mata sa imong igsoon.

Juan 13:29

Ang uban naghunahuna nga tungod kay si Judas mao man ang tigtipig sa sudlanan sa salapi, si Jesus nag-ingon kaniya, “Pagpalit sa atong kinahanglanon alang sa kasaulogan,” o nga pahatagan kaniya ang mga kabos.

Juan 5:41

Wala ako magdawat ug pasidungog gikan sa tawo.

Juan 5:44

Unsaon man ninyo sa pagtuo, kamo nga nagdawat ug pasidungog gikan sa usa ug usa apan wala mangita sa pasidungog nga gikan sa bugtong nga Dios?

Juan 7:18

Si bisan kinsa nga magsulti sa kinaugalingon lamang nangita sa iyang kaugalingong dungog apan si bisan kinsa nga nangita sa dungog sa nagpadala kaniya, matinud-anon ug wala diha kaniya ang pagkabakakon.

Mga Buhat 10:2

Siya usa ka tawong relihiyoso uban sa iyang tibuok nga panimalay; siya mahadlokon sa Dios, naghatag ug daghang hinabang ngadto sa mga tawo ug nag-ampo kanunay sa Dios.

Mga Buhat 10:31

ug miingon, ‘Cornelio, ang imong pag-ampo nadungog ug ang imong mga pagtabang nahinumdoman sa atubangan sa Dios.

Mga Buhat 10:4

Ug siya mitutok kaniya uban sa kahadlok ug miingon, “Unsa man Ginoo?” Ug siya miingon kaniya, “Ang imong mga pag-ampo ug mga pagtabang miabot sa itaas ingon nga handomanan sa atubangan sa Dios.

Mga Buhat 11:29

Ug ang mga tinun-an nakahukom nga ang matag usa kanila, sumala sa iyang masarangan, magpadala ug hinabang ngadto sa mga kaigsoonan nga nagpuyo sa Judea.

Mga Buhat 24:17

Unya human sa daghang katuigan mianhi ako aron sa pagdala ug mga hinabang ug mga halad alang sa akong nasod.

Mga Buhat 9:36

Didto sa Jopa may usa ka babayeng tinun-an nga ginganlan ug Tabita, nga kon hubaron, Dorcas o Lagsaw. Siya daghan ug mga maayong buhat ug mga pagtabang nga iyang gihimo.

Roma 12:8

ang nagmaymay, sa iyang pagpangmaymay; ang nag-amot, diha sa pagkamadagayaon; ang nangulo, diha sa kadasig; ang naghimo ug mga buhat sa kaluoy, diha sa kasaya.

1 Mga Taga-Corinto 13:3

Kon akong ipanghatag ang tanan nakong katigayonan ug kon itahan nako ang akong lawas aron sunogon apan walay gugma, dili kini magpulos kanako.

Mga Taga-Galacia 2:10

Buot lamang nila nga among hinumdoman ang mga kabos, nga maoy butang nga akong gikaikagan sa pagbuhat.

Mga Taga-Efeso 4:28

Ang kawatan kinahanglang dili na mangawat, kondili maghago hinuon, magbuhat sa mga maayong butang pinaagi sa iyang mga kamot aron may ikahatag siya ngadto sa mga nagkinahanglan.

1 Mga Taga-Tesalonica 2:6

Wala usab kami magtinguha sa mga pagpasidungog gikan sa mga tawo, o gikan kaninyo o sa uban pa, bisan tuod ug makapangayo kami kaninyo niini ingon nga mga apostoles ni Cristo.

1 Timoteo 6:18

Kinahanglan nga magbuhat sila ug maayo, magpadato sa mga maayong binuhatan, andam sa pagtabang ug manggihatagon.

Filemon 1:7

Kay akong nabatonan ang dakong kalipay ug kadasig tungod sa imong gugma nga ang kasingkasing sa mga balaan nadasig pinaagi kanimo, igsoon.

Mga Hebreo 13:16

Ug ayaw ninyo kalimti ang pagbuhat ug maayo ug ang pagkamanggihatagon, kay ang maong mga halad makapahimuot sa Dios.

1 Pedro 4:11

Ang magsulti, kinahanglan magsulti ingon sa pulong sa Dios; ang mag-alagad, kinahanglan mag-alagad sumala sa katakos nga gihatag sa Dios, aron nga sa tanang butang ang Dios mahimaya pinaagi kang Jesu-Cristo. Iya ang himaya ug ang paggahom hangtod sa kahangtoran. Amen.

1 Samuel 15:30

Unya siya miingon, “Ako nakasala apan pasidunggi ako karon sa atubangan sa mga kadagkoan sa akong katawhan ug sa atubangan sa Israel, ug balik uban kanako aron ako mosimba sa Ginoo nga imong Dios.”