Mateo 27:1

Ang Biblia 2011

Ug sa pagkabuntag na, ang tanang mga pangulong pari ug ang mga kadagkoan sa katawhan nagkasabot batok kang Jesus aron pahamtangan siya sa kamatayon.

Cross References

Salmo 2:2

Ang mga hari sa yuta nagpahiluna sa ilang kaugalingon, ug ang mga nagmando nagkasabot batok sa Ginoo ug sa iyang dinihogan, nga nag-ingon,

Salmo 31:13

Nadungog nako ang paghuhungihong sa daghan— kahadlok sa matag daplin!— samtang naghiusa sila sa pagsabot batok kanako, samtang naglaraw sila sa pagkuha sa akong kinabuhi.

Salmo 71:10

Kay ang akong mga kaaway nagsulti mahitungod kanako; kadtong naniid sa akong kinabuhi nag-usa sa paglaraw,

Miqueas 2:1

Alaot kadtong naglaraw ug kadaotan ug nagbuhat sa daotan diha sa ilang mga higdaanan! Sa pagkabuntag, sila magbuhat niini, tungod kay kini anaa sa gahom sa ilang kamot.

Mateo 23:13

“Apan alaot kamong mga eskriba ug mga Pariseo, mga tigpakaaron-ingon! Kay gitakpan ninyo ang gingharian sa langit atubangan sa mga tawo, kay wala kamo mosulod ug wala usab motugot sa pagpasulod niadtong buot mosulod niini.

Marcos 15:1

Dihadiha, sa pag-abot na sa kabuntagon, ang mga pangulong pari nakigsabot uban sa mga kadagkoan ug sa mga eskriba ug sa tibuok Sanhedrin. Ug gigapos nila si Jesus ug gidala ug gitugyan ngadto kang Pilato.

Lucas 13:1

Niadtong tungora dihay mga tawo nga misugilon kaniya mahitungod sa mga Galileanhon nga ang dugo gisagol ni Pilato sa ilang mga halad nga inihaw.

Lucas 22:66

Sa pagkaadlawan na, nagtigom ang mga pangulo sa lungsod ug ang mga pangulong pari ug mga eskriba. Ug siya ilang gidala ngadto sa Sanhedrin, ug sila miingon kaniya,

Juan 18:28

Unya ilang gidala si Jesus gikan sa balay ni Caifas ngadto sa palasyo sa gobernador. Sayo kadto sa kabuntagon ug sila wala mosulod sa palasyo aron dili sila mahugawan ug aron makakaon sila sa Kasaulogan sa Pagsaylo.

Mga Buhat 5:21

Sa pagkadungog nila niini, sila misulod sa Templo sa pagkakaadlawon ug nanudlo. Unya miabot ang labawng pangulong pari ug ang mga kauban niya ug ilang gipatawag ang Sanhedrin ug ang tibuok kadagkoan sa Israel ug nagsugo sila ngadto sa bilanggoan aron sa pagkuha sa mga apostoles.

Mga Maghuhukom 16:2

Ang mga Gazahanon gisuginlan, “Si Samson mianhi.” Ug ilang gilibotan ang dapit ug giatngan siya sa tibuok gabii didto sa ganghaan sa siyudad. Naghilom sila sa tibuok gabii nga nag-ingon, “Magpaabot kita hangtod sa kabuntagon unya patyon nato siya.”

1 Samuel 19:11

Si Saul nagpadala ug mga sinugo ngadto sa balay ni David aron sa pagbantay kaniya ug sa pagpatay kaniya sa pagkabuntag. Apan si Mical nga asawa ni David, misulti kaniya, “Kon dili nimo luwason ang imong kinabuhi karong gabhiona patyon ikaw ugma.”