Lucas 8:24

Ang Biblia 2011

Ug siya giduol ug gipukaw nila nga nag-ingon, “Agalon, Agalon, hapit na kita mangamatay!” Ug siya mimata ug iyang gibadlong ang hangin ug ang bangis nga mga balod, ug kini mihunong ug miabot ang kalinaw.

Cross References

Salmo 65:7

nga nagpahilom sa dinahunog sa kadagatan, sa dinahunog sa mga balod niini, sa kaguliyang sa mga katawhan.

Isaias 50:2

Ngano man nga sa akong pag-abot walay tawo? Sa akong pagtawag, walay usa nga mitubag? Gipamub-an ba ang akong kamot nga kini dili makalukat? O wala ba akoy gahom aron sa pagluwas? Tan-awa, tungod sa akong pagbadlong gipauga nako ang dagat, gihimo nako ang mga sapa nga usa ka kamingawan; ang ilang mga isda nangabaho, tungod kay wala nay tubig ug nangamatay tungod sa kauhaw.

Jeremias 5:22

Dili ba kamo mahadlok kanako? nag-ingon ang Ginoo; Dili ba kamo mokurog sa akong atubangan? Gibutang nako ang balas ingon nga utlanan alang sa dagat, usa ka babag nga dayon nga kini dili makalabang; bisan ang mga balod moisa, dili kini mopatigbabaw, bisan ug kini modahunog, dili kini makalabang niini.

Nahum 1:4

Siya magbadlong sa dagat ug magpahubas niini, siya magpahubas sa tanang mga suba; ang Basan ug ang Carmel nalaya, ang bulak sa Lebanon nagkalawos.

Mateo 14:30

Apan sa pagkakita niya sa hangin, nahadlok siya ug sa nag-anam siya pagtidlom, misinggit siya nga nag-ingon, “Ginoo, luwasa ako!”

Mateo 8:25

Ug giduol nila siya ug gipukaw nga nag-ingon, “Ginoo, tabang! Mangamatay na kita.”

Marcos 4:39

Ug mibangon siya ug gibadlong ang hangin, ug miingon siya sa lanaw, “Kalinaw! Hunong!” Ug ang hangin milurang ug miabot ang dakong kalinaw.

Lucas 4:35

Apan gibadlong siya ni Jesus nga nag-ingon, “Hilom ug gula gikan kaniya!” Sa diha nga ang tawo gilamba sa yawa diha sa ilang taliwala, migula siya gikan sa tawo nga wala makahimo kaniya ug kadaot.

Lucas 4:39

Ug siya mitindog sa tungod niya ug iyang gibadlong ang hilanat, ug kini mibiya kaniya ug dihadiha mibangon siya ug mialagad kanila.

Lucas 5:5

Unya si Simon mitubag kaniya, “Ginoo, tibuok gabii kaming naghago ug wala gayod kami makakuha! Apan tungod sa imong sulti akong itaktak ang mga pukot.”

Lucas 8:25

Unya miingon siya kanila, “Hain man diay ang inyong pagsalig?” Ug sa ilang kahadlok sila nahibulong nga nag-ingon sa usa ug usa, “Kinsa ba diay kini siya, nga nagmando bisan sa hangin ug tubig, ug sila mituman kaniya?”