Levitico 16:31

Ang Biblia 2011

Kini maoy usa ka adlaw nga igpapahulay sa balaan nga pahulay alang kaninyo ug hikawi ninyo ang inyong mga kaugalingon. Kini maoy usa ka lagda nga walay kataposan.

Cross References

Esdras 8:21

Unya ako nagpahibalo ug usa ka pagpuasa didto sa suba sa Ahava, aron kami magpaubos sa among kaugalingon sa atubangan sa among Dios, sa pagpangita gikan kaniya sa usa ka tul-id nga dalan alang kanamo, alang sa among mga kabataan ug sa tanan namong kabtangan.

Exodo 31:15

Buhata ninyo ang inyong buluhaton sulod sa unom ka adlaw apan ang ikapitong adlaw mao ang adlaw sa balaan nga pagpahulay, balaan ngadto sa Ginoo. Si bisan kinsa nga magbuhat ug bisan unsang buluhaton sa adlaw nga igpapahulay, kinahanglan nga patyon gayod.

Exodo 35:2

Himoa ninyo ang inyong buluhaton sulod sa unom ka adlaw apan ang ikapito nga adlaw himoa ninyo nga adlawng igpapahulay sa balaang pagpahulay ngadto sa Ginoo. Si bisan kinsa nga magbuhat ug bisan unsa nga buluhaton niining adlawa, kinahanglan nga patyon siya.

Isaias 58:3

‘Ngano man nga kami nagpuasa, ug ikaw wala makakita niini? Ngano nga nagpaubos kami sa among kaugalingon, ug ikaw wala makamatikod niini?’ Tan-awa, sa adlaw sa inyong pagpuasa kamo nangita sa kaugalingon ninyong kalipay, ug nagdaogdaog sa tanan ninyong mamumuo.

Isaias 58:5

Mao ba kini ang pagpuasa nga akong gipili: usa ka adlaw alang sa tawo aron magpaubos sa iyang kaugalingon? Kini aron ba nga iduko niya ang iyang ulo sama sa bugang, ug magbukhad sa bisti nga sako ug abo sa ilalom niya? Tawgon ba nimo kini nga pagpuasa, ug usa ka adlaw nga kahimut-an sa Ginoo?

Daniel 10:12

Unya siya miingon kanako, “Ayaw kahadlok, Daniel, kay sukad sa unang adlaw nga gipahiluna nimo ang imong kasingkasing sa pagsabot, ug nagpaubos ikaw sa imong kaugalingon atubangan sa imong Dios, ang imong mga pulong gidungog ug ako mianhi tungod sa imong mga pulong.

Levitico 23:32

Kini alang kaninyo usa ka adlaw nga igpapahulay sa balaan nga pahulay ug maghikaw kamo sa inyong kaugalingon, sa ikasiyam nga adlaw sa bulan, gikan sa gabii hangtod sa sunod nga gabii. Tumana ninyo ang inyong adlaw nga igpapahulay.”

Levitico 25:4

Apan ang ikapito nga tuig usa ka tuig nga igpapahulay sa pahulay nga balaan alang sa yuta, usa ka pahulay alang sa Ginoo. Ayaw pugsi ang inyong yuta, ug ayaw pul-ongi ang inyong parasan.