Juan 15:19

Ang Biblia 2011

Kon kamo iya pa sa kalibotan, ang kalibotan nahigugma unta sa mga iya, apan kay kamo dili man iya sa kalibotan, hinuon gipili kamo nako gikan sa kalibotan, tungod niini nagdumot kaninyo ang kalibotan.

Cross References

Mateo 10:22

Dumtan kamo sa tanang tawo tungod sa akong ngalan. Apan ang molahutay hangtod sa kataposan maluwas.

Mateo 24:9

“Unya itugyan nila kamo ngadto sa kalisdanan ug ipapatay kamo ug dumtan sa tanang kanasoran tungod sa akong ngalan.

Lucas 6:32

“Kon kamo nahigugma sa mga nahigugma kaninyo, unsa may grasya niana nga mainyo? Kay bisan gani ang mga makasasala nahigugma man sa mga nahigugma kanila.

Juan 13:18

Wala ako magsulti mahitungod kaninyong tanan. Ako nakaila kanila nga akong gipili. Apan kinahanglang matuman ang kasulatan nga nag-ingon, ‘Siya nga nagkaon sa akong pan nag-isa sa iyang tiil batok kanako.’

Juan 15:16

Kamo wala magpili kanako apan ako ang nagpili kaninyo ug nagtahas kaninyo aron manglakaw kamo ug mamunga ug bunga nga molungtad, aron nga ang bisan unsa nga inyong pangayoon gikan sa Amahan pinaagi sa akong ngalan, ihatag kaninyo.

Juan 6:70

Si Jesus mitubag kanila, “Dili ba gipili man kamo nako, ang napulo ug duha ug ang usa kaninyo yawa?”

Santiago 4:4

Mga mananapaw! Wala ba kamo masayod nga ang pagpakighigala sa kalibotan pagpakigbatok sa Dios? Busa si bisan kinsa nga buot makighigala sa kalibotan naghimo sa iyang kaugalingon nga kaaway sa Dios.

1 Pedro 4:3

Kay igo na kadtong nangaging panahon sa pagbuhat sumala sa kabubut-on sa mga Gentil, sa paggawi diha sa pagpatuyang, sa kaulag, sa paghuboghubog, sa mapatuyangong paghudyaka, sa walay hunong nga pag-inom ug dulumtanan nga pagsimba ug mga diosdios.

1 Juan 3:12

ug dili sama kang Cain nga iya sa daotan ug mipatay sa iyang igsoon. Ug nganong gipatay man niya ang iyang igsoon? Tungod kay daotan man ang iyang binuhatan ug matarong ang iyang igsoon.

Gipadayag 12:17

Unya ang dragon nasuko batok sa babaye, ug miadto siya sa pagpakiggubat batok sa tanan nga uban pang mga kaliwat sa babaye, sa mga nagtuman sa kasugoan sa Dios ug nagdala ug pagpamatuod mahitungod kang Jesus.

Gipadayag 12:9

Ug gitambog ang dakong dragon, ang bitin nga karaan, ang ginganlag Yawa ug Satanas, ang tiglimbong sa tibuok kalibotan—gitambog ngadto sa kalibotan, ug ang iyang mga anghel gitambog uban kaniya.