Jeremias 8:22

Ang Biblia 2011

Wala bay tambal sa Gilead? Wala bay mananambal didto? Busa ngano man nga wala maulii sa maayong panglawas ang anak nga babaye sa akong katawhan?

Cross References

Genesis 37:25

Unya nanglingkod sila aron mangaon ug giyahat ang ilang mga mata ug nakita nila ang usa ka panon sa mga Ismaelinhon nga nagpadulong kanila gikan sa Gilead uban ang ilang mga kamilyo nga nagkarga ug mga tagok sa tanom, haplas ug mira nga dad-on nila padulong sa Ehipto.

Genesis 43:11

Unya si Israel nga ilang amahan miingon kanila, “Kon mao na gayod kini, buhata kana ninyo. Pagdala kamo sa labing maayong bunga sulod sa inyong mga sudlanan ug dad-i ninyo kadtong tawo ug usa ka gasa, diyotay nga haplas ug diyotay nga dugos, mga lamas humot nga tagok sa kahoy ug mira, mga pistasio ug mga almendras.

Jeremias 14:19

Gisalikway ba gayod nimo ang Juda? Giayran ba sa imong kalag ang Zion? Nganong gisamaran man nimo kami, nga tungod niana walay kaayohan alang kanamo? Nangita kami ug kalinaw, apan walay maayo nga miabot; alang sa panahon sa pagkaayo, apan kalisang hinuon.

Jeremias 22:6

Kay mao kini ang giingon sa Ginoo mahitungod sa balay sa hari sa Juda: “ ‘Ikaw sama sa Gilead alang kanako, sama sa kinatumyan sa Lebanon, apan himoon ko gayod ikaw nga kamingawan, siyudad nga walay magpuyo.

Jeremias 46:11

Tungas ngadto sa Gilead ug pagkuha ug balsamo, O ulay nga anak sa Ehipto! Kawang lamang ang paggamit nimo ug daghang mga tambal; walay kaayohan alang kanimo.

Jeremias 51:8

Ang Babilonia sa kalit napukan ug nabuak; pagminatay kamo alang kaniya! Pagkuha kamo ug tambal alang sa iyang samad; basin ug mamaayo siya.

Jeremias 6:7

Ingon nga bag-o kanunay ang tubig sa atabay, gibag-o usab niya kanunay ang iyang pagkadaotan; ang kabangis ug pagpanglaglag nabati diha kaniya; ang balatian ug mga samad anaa kanunay sa akong atubangan.

Jeremias 9:1

O katubigan unta ang akong ulo, ug ang akong mga mata tuboran sa mga luha, aron ako maghilak adlaw ug gabii tungod sa mga nangamatay sa anak nga babaye sa akong katawhan!

Jeremias 9:11

Himoon nako ang Jerusalem nga usa ka tinapok sa nangatumpag, usa ka puluy-anan sa mga irong ihalas; ug buhaton nako ang mga siyudad sa Juda nga biniyaan, wala nay magpuyo.”

Mga Pagbangotan 2:13

Unsay akong ikasulti kanimo, unsay ikatandi kanimo, O anak nga babaye sa Jerusalem? Unsa ba ang akong ikatandi kanimo aron ako makahupay kanimo, O anak nga ulay sa Zion? Kay dako sama sa dagat ang imong pagkalaglag; kinsay makaayo kanimo?

Ezequiel 27:17

Ang Juda ug ang yuta sa Israel nakigpatigayon kanimo. Ilang gibayloan ang imong mga baligya sa trigo, mga olibo ug igos, dugos, lana ug balsamo.

Numeros 32:1

Karon ang mga kaliwat ni Ruben ug ang mga kaliwat ni Gad adunay hilabihan ka dagko nga mga panon sa kahayopan, ug ilang nakita ang yuta sa Jaser ug ang yuta sa Gilead, ug ang maong dapit usa ka dapit alang sa kahayopan.

Lucas 8:43

Ug may usa ka babaye nga walay undang ang pagdugo sulod sa napulo ug duha ka tuig nga nahutdan na sa iyang tanang katigayonan nga gigasto alang sa mga mananambal ug dili na maayo ni bisan kinsa,