Jeremias 7:29

Ang Biblia 2011

Putli ang imong buhok ug isalibay kini; pagbangutan didto sa hawan nga kabungtoran kay ang Ginoo misalikway ug mibiya sa kaliwatan sa iyang kapungot.’

Cross References

2 Mga Hari 17:20

Ug gisalikway sa Ginoo ang tanang kaliwat sa Israel ug gisakit sila ug gitugyan ngadto sa kamot sa mga mamimihag, hangtod nga gipalayo niya sila gikan sa iyang panan-aw.

Job 1:20

Unya si Job mitindog, ug migisi sa iyang bisti, ug mikiskis sa iyang ulo ug mihapa sa yuta ug misimba.

Isaias 22:12

Niadtong adlawa ang Ginoong Dios sa mga panon, nag-awhag kaninyo aron sa paghilak ug sa pagminatay, ug sa pagpaupaw ug sa pagsul-ob ug sako;

Jeremias 12:7

“Gibiyaan nako ang akong balay, gisalikway nako ang akong panulundon; gihatag nako ang minahal sa akong kalag ngadto sa mga kamot sa iyang mga kaaway.

Jeremias 14:19

Gisalikway ba gayod nimo ang Juda? Giayran ba sa imong kalag ang Zion? Nganong gisamaran man nimo kami, nga tungod niana walay kaayohan alang kanamo? Nangita kami ug kalinaw, apan walay maayo nga miabot; alang sa panahon sa pagkaayo, apan kalisang hinuon.

Jeremias 16:6

Ang mga dagko ug mga gagmay mangamatay dinhi niining yutaa. Dili sila ilubong, ug walay magbangutan alang kanila, o magsamad sa iyang kaugalingon o magpaupaw sa iyang kaugalingon tungod kanila.

Jeremias 3:2

Iyahat ang imong mga mata ngadto sa mga hawan nga kahitas-an, ug tan-awa! Diin ba ikaw nga wala dulogi sa paghigda? Sa kadalanan ikaw milingkod nga nagpaabot sa mga hinigugma sama sa usa ka Arabo diha sa kamingawan. Imong gihugawan ang yuta pinaagi sa imong mga pagpakighilawas ug pagkadaotan.

Jeremias 3:21

Nadungog ang usa ka tingog sa kabungtoran, ang paghilak ug mga pangaliyupo sa mga anak sa Israel, tungod kay gipasukwahi nila ang ilang dalan, sila nalimot sa Ginoo nga ilang Dios.

Jeremias 47:5

Ang pagkaupaw midangat sa Gaza; ang Askelon nalaglag. O salin sa Anakihanon, unsa ba kadugay ang pagsamad nimo sa imong kaugalingon?

Jeremias 48:37

“Kay ang tanang ulo gikiskisan ug ang tanang bungot gibalbasan; ang tanang mga kamot adunay mga samad ug diha sa mga hawak ang bisti nga sako.

Jeremias 6:30

Sinalikway nga plata ang itawag kanila kay ang Ginoo nagsalikway man kanila.”

Jeremias 9:10

“Himoa ang paghilak ug ang pagminatay alang sa kabukiran, ug pagbangutan alang sa sibsibanan sa kamingawan, tungod kay naawaaw na kini mao nga wala nay moagi niini, ug ang pag-inga sa mga baka dili na madungog; ang mga langgam sa kalangitan ug ang mga mananap namiya ug nangahanaw.

Jeremias 9:16

Katagon nako sila didto sa kanasoran nga wala nila mailhi o sa ilang mga katigulangan. Ug padad-an nako sila ug espada sunod kanila hangtod nga mapuo nako sila.”

Mga Pagbangotan 5:22

O gisalikway na ba gayod nimo kami? Nasuko ba gayod ikaw sa hilabihan kanamo?

Ezequiel 19:1

Ug ikaw, pagbangutan alang sa mga pangulo sa Israel,

Ezequiel 28:12

“Anak sa tawo, pagpatugbaw ug pagbangutan alang sa hari sa Tiro, ug ingna siya, Mao kini ang giingon sa Ginoong Dios: Ikaw ang patik sa kahingpitan, puno sa kaalam, ug hingpit sa katahom.

Amos 5:1

Pamatia ninyo kining pulong nga akong gihimo alang kaninyo diha sa pagbangutan, O balay sa Israel:

Miqueas 1:16

Pagpaupaw kamo sa inyong kaugalingon ug putla ang inyong buhok alang sa mga anak sa inyong kalipay; pagpaupaw kamo sama sa agila, kay sila mobiya gikan kaninyo ngadto sa pagkabihag.

Mateo 12:39

Apan kanila mitubag siya nga nag-ingon, “Ang usa ka daotan ug maluibon nga kaliwatan mangita ug ilhanan apan walay laing ilhanan nga ihatag niini gawas lamang sa ilhanan ni Jonas nga propeta.

Mateo 16:4

Ang katawhan nga daotan ug maluibon sa Dios mangita gayod ug ilhanan apan walay laing ilhanan nga ihatag kanila gawas sa ilhanan nga nahitabo kang Jonas.” Ug siya mibiya kanila ug milakaw.

Mateo 23:36

Sa pagkatinuod sultihan ko kamo, kining tanan moabot niini karong kaliwatana.

Mateo 3:7

Apan sa pagtan-aw niya nga daghan sa mga Pariseo ug sa mga Saduceo ang miadto aron sa pagpabautismo, siya miingon kanila, “Kamong kaliwat sa mga bitin! Kinsa bay nagpasidaan kaninyo sa pag-ikyas gikan sa kapungot nga umaabot?

Mga Buhat 2:40

Ug pinaagi sa daghang mga pulong siya nagpamatuod ug midasig kanila nga nag-ingon, “Luwasa ang inyong kaugalingon gikan niining hiwi nga kaliwatan.”

Deuteronomio 32:5

Nagpakasala sila kaniya, dili na sila iyang mga anak tungod sa ilang sala; sila usa ka sukwahi ug hiwi nga kaliwatan.