Jeremias 51:5

Ang Biblia 2011

Kay ang Israel ug ang Juda wala biyai sa iyang Dios, ang Ginoo sa mga panon; apan ang yuta sa mga Caldeanhon napuno sa sala batok sa Balaan sa Israel.

Cross References

1 Mga Hari 6:13

Ug ako magpuyo uban sa mga anak ni Israel, ug dili nako biyaan ang akong katawhan nga Israel.”

2 Mga Hari 21:16

Dugang pa, si Manases nag-ula sa daghan kaayong dugo sa mga walay sala, hangtod nga napuno niya ang Jerusalem gikan sa usa ka daplin ngadto sa pikas, gawas sa sala nga nakapahimo sa Juda sa pagpakasala nga tungod niana sila nagbuhat ug daotan sa mga mata sa Ginoo.

Esdras 9:9

Kay kami mga ulipon apan ang among Dios wala mobiya kanamo sa among pagkaulipon kondili naghatag kanamo sa iyang gugmang walay paglubad sa atubangan sa mga hari sa Persia, sa paghatag kanamo ug kadasig sa pagpatindog sa balay sa among Dios ug sa pag-ayo sa nangaguba niini ug sa paghatag kanamo ug usa ka paril sa Juda ug sa Jerusalem.

Salmo 94:14

Kay ang Ginoo dili mosalikway sa iyang katawhan; dili siya mobiya sa iyang panulundon;

Isaias 44:21

Hinumdomi kining mga butanga, O Jacob, ug Israel, kay ikaw akong sulugoon; giumol ko ikaw, ikaw akong sulugoon; O Israel, ikaw dili nako kalimtan.

Isaias 51:15

Kay ako mao ang Ginoo nga imong Dios, nga nagkutaw sa dagat aron ang mga balod niini magdahunog— si Yahweh sa mga panon mao ang iyang ngalan.

Isaias 62:12

Ug sila tawgon nga Ang Balaang Katawhan, Ang Tinubos sa Ginoo, ug ikaw tawgon nga Gipangita, Usa ka Siyudad nga Dili Biniyaan.

Jeremias 14:19

Gisalikway ba gayod nimo ang Juda? Giayran ba sa imong kalag ang Zion? Nganong gisamaran man nimo kami, nga tungod niana walay kaayohan alang kanamo? Nangita kami ug kalinaw, apan walay maayo nga miabot; alang sa panahon sa pagkaayo, apan kalisang hinuon.

Jeremias 14:9

Ngano nga sama man ikaw sa usa ka tawo nga nalibog, sama sa usa ka tawong kusgan nga dili makaluwas? Apan ikaw, O Ginoo, ania sa among taliwala, ug kami gitawag sa imong ngalan; ayaw kami biyai.”

Jeremias 16:18

Ug baslan nako sa makaduha ang ilang kalapasan ug ang ilang sala tungod kay ilang gihugawhugawan ang akong yuta pinaagi sa mga walay kinabuhi nga lawas sa ilang mga diosdios nga luod, ug ilang gipuno ang akong panulundon sa ilang mga dulumtanan.”

Jeremias 19:4

Tungod kay ang katawhan mibiya kanako ug naghugawhugaw niining dapita pinaagi sa pagsunog ug insenso alang sa laing mga dios nga wala mailhi nila ug sa ilang mga katigulangan ug sa mga hari sa Juda, ug tungod kay kining dapita gipuno nila sa dugo sa mga walay sala,

Jeremias 23:15

Busa mao kini ang giingon sa Ginoo sa mga panon mahitungod sa mga propeta: “Tan-awa, pakan-on nako sila ug panyawan ug hatagan nako sila ug tubig nga may hilo aron imnon; kay gikan sa mga propeta sa Jerusalem ang pagkadili diosnon miabot sa tibuok nga yuta.”

Jeremias 31:37

Mao kini ang giingon sa Ginoo, “Kon ang langit sa kahitas-an masukod, ug ang mga patukoranan sa yuta sa kinahiladman masusi, isalikway nako ang tibuok kaliwatan sa Israel tungod sa tanan nilang nabuhat, nag-ingon ang Ginoo.”

Jeremias 46:28

Ayaw kahadlok, O Jacob nga akong alagad, nag-ingon ang Ginoo, kay ako uban kanimo. Akong taposon sa hingpit ang tanang mga nasod nga akong abogan kanimo apan mahitungod kanimo dili kamo nako taposon sa hingpit. Pantonon ko kamo sumala sa kaangayan, ug dili ko gayod kamo pasagdan nga dili masilotan.”

Jeremias 50:20

Nianang mga adlawa ug nianang panahona, nag-ingon ang Ginoo, ang kasal-anan pangitaon diha sa Israel ug walay makita, ug ang sala diha sa Juda ug walay makita; kay pasayloon nako kadtong akong gibilin ingon nga salin.

Jeremias 51:19

Dili sama niini siya nga mao ang bahin ni Jacob, kay siya mao ang nag-umol sa tanang mga butang, ug ang Israel mao ang banay sa iyang panulundon; si Yahweh sa mga panon mao ang iyang ngalan.

Ezequiel 8:17

Unya siya miingon kanako, “Nakita ba nimo kini, anak sa tawo? Gamay ba lamang nga butang alang sa balay sa Juda ang pagbuhat sa mga dulumtanan nga ilang gibuhat dinhi, nga gipuno man nila sa kabangis ang yuta ug naghagit pa gayod kanako sa pagkasuko? Tan-awa, ilang gibutang sa ilang ilong ang sanga.

Ezequiel 9:9

Unya siya miingon kanako, “Ang kasal-anan sa balay sa Israel ug sa Juda hilabihan ka dako, ug ang yuta napuno sa dugo, ug ang siyudad napuno sa pagtuis sa hustisya kay sila nag-ingon man, ‘Ang Ginoo mibiya sa yuta, ug ang Ginoo dili makakita.’

Oseas 1:10

Bisan pa niana ang gidaghanon sa katawhan sa Israel mahisama sa balas sa dagat, nga dili matakos o maihap, ug sa dapit diin kini gisulti kanila, “Kamo dili akong katawhan,” kini isulti kanila “Mga anak sa buhi nga Dios.”

Oseas 2:1

Ingna ninyo ang inyong igsoong lalaki, “Ammi” ug ang inyong igsoong babaye, Ruhama.

Oseas 2:3

aron dili nako siya huboan ug himoon siya nga sama sa adlaw sa iyang pagkatawo, ug himoon siya nga sama sa kamingawan, ug ibutang siya sama sa uga nga yuta, ug patyon siya sa kauhaw.

Oseas 4:1

Pamatia ang pulong sa Ginoo, katawhan sa Israel, kay ang Ginoo adunay pakigbangi sa mga nagpuyo sa yuta. Walay pagkamatinumanon o kaayo o pag-ila sa Dios diha sa yuta.

Oseas 4:2

Hinuon adunay pagpanumpa, pagpamakak, pagpamatay, pagpangawat, ug pagpanapaw, ilang gilapas ang tanan nga mga utlanan ug nagsunodsunod ang pagpamatay.

Miqueas 7:18

Kinsa ba ang Dios nga sama kanimo, nga nagpasaylo sa kasal-anan ug mopalabay lamang sa mga kalapasan sa salin sa iyang panulundon? Siya wala maghupot sa iyang kasuko hangtod sa kahangtoran, kay siya malipay diha sa gugmang walay paglubad.

Miqueas 7:20

Ikaw magpakita ug pagkamatinud-anon ngadto kang Jacob ug gugmang walay paglubad ngadto kang Abraham, sumala sa imong gipanumpa sa among katigulangan gikan pa sa karaang mga adlaw.

Zacarias 12:6

“Nianang adlawa ang mga banay sa Juda himoon nako nga sama sa kulon nga nagdilaab taliwala sa sugnod, sama sa sulo nga nagsiga taliwala sa usa ka bugkos nga dagami ug sila maglamoy sa tanang mga katawhan nga naglibot kanila, dapit sa tuo ug dapit sa wala, samtang ang Jerusalem puy-an gihapon diha sa dapit niini, sa Jerusalem.

Zacarias 12:8

Nianang adlawa ang Ginoo magbutang ug salipod libot sa mga nagpuyo sa Jerusalem aron kadtong labing luya kanila nianang adlawa mahisama kang David, ug ang balay ni David mahisama sa Dios, sama sa anghel sa Ginoo nga nangulo kanila.

Zacarias 2:12

Ug ang Ginoo makapanunod sa Juda ingon nga iyang bahin sa balaang yuta, ug magpili pag-usab sa Jerusalem.”

1 Samuel 12:22

Kay ang Ginoo dili motalikod sa iyang katawhan tungod sa iyang dakong ngalan kay nakapahimuot sa Ginoo ang paghimo kaninyo nga usa ka katawhan alang sa iyang kaugalingon.