Jeremias 32:44

Ang Biblia 2011

Ang kaumahan paliton ug salapi ug ang mga kalig-onan pirmahan ug silyohan ug saksihan didto sa yuta ni Benjamin, sa mga dapit nga naglibot sa Jerusalem, ug sa mga lungsod sa Juda, sa mga lungsod sa kabungtoran, sa mga lungsod sa Sefela, ug sa mga lungsod sa Negeb; kay ibalik nako ang ilang maayong kahimtang, nag-ingon ang Ginoo.”

Cross References

Isaias 44:26

nga nagpamatuod sa pulong sa iyang sulugoon, ug nagbuhat sa tambag sa iyang mga sinugo; nga nag-ingon mahitungod sa Jerusalem, ‘Siya puy-an,’ ug mahitungod sa mga siyudad sa Juda, ‘Sila tukoron ug patindogon nako ang ilang mga guba;’

Jeremias 13:19

Ang mga lungsod sa Negeb natakpan, ug walay usa nga makaabli kanila; ang tibuok Juda gidala ngadto sa pagkabihag, nahurot pagkabihag.

Jeremias 17:26

Ug ang katawhan mangabot gikan sa mga lungsod sa Juda ug sa mga dapit nga naglibot sa Jerusalem, gikan sa yuta ni Benjamin, gikan sa Sefela, gikan sa kabungtoran ug gikan sa Negeb, nga magdala ug mga halad nga sunogon, ug mga halad nga ihawon, ug mga halad nga pagkaon, ug insenso, ug magdala ug mga halad sa pagpasalamat ngadto sa balay sa Ginoo.

Jeremias 30:18

“Mao kini ang giingon sa Ginoo: Tan-awa, ibalik nako ang maayong kahimtang sa mga tolda ni Jacob, ug magbaton ug kaluoy sa iyang mga puluy-anan; ang siyudad tukoron ibabaw sa kaugalingon niyang bungtod, ug ang palasyo mobarog sa iyang dapit kaniadto.

Jeremias 30:3

Kay tan-awa, ang mga adlaw nagsingabot, nag-ingon ang Ginoo, nga ibalik na nako ang maayong kahimtang sa akong katawhan nga Israel ug Juda, nag-ingon ang Ginoo, ug dad-on nako sila pagbalik ngadto sa yuta nga akong gihatag sa ilang mga katigulangan, ug sila manag-iya niini.”

Jeremias 31:23

Mao kini ang giingon sa Ginoo sa mga panon, ang Dios sa Israel: “Sila maggamit pag-usab niining pulonga sa yuta sa Juda ug sa mga siyudad niini, sa diha nga ibalik nako ang ilang maayong kahimtang: ‘Ang Ginoo magpanalangin kanimo, O puluy-anan sa pagkamatarong, O bukid nga balaan!’

Jeremias 32:10

Gipirmahan nako ang kalig-onan sa pagpalit, gisilyohan kini, nagkuha ako ug mga saksi ug gitimbang ang salapi diha sa mga timbangan.

Jeremias 32:37

Tan-awa, tigomon nako sila gikan sa tanang dapit diin nako sila aboga tungod sa akong kasuko ug sa akong kapungot ug sa dakong kaligutgot. Dad-on nako sila pagbalik nganhi niining dapita, ug papuy-on nako sila nga layo sa kakuyaw.

Jeremias 33:11

ang tingog sa pagmaya ug ang tingog sa kalipay, ang tingog sa pamanhonon ug ang tingog sa pangasaw-onon, ang mga tingog niadtong nag-awit samtang nagdala sila ug mga halad sa pasalamat ngadto sa balay sa Ginoo: ‘Pagpasalamat ngadto sa Ginoo sa mga panon, kay ang Ginoo maayo, kay ang iyang gugmang walay paglubad molungtad hangtod sa kahangtoran!’ Kay ibalik nako ang maayong kahimtang sa yuta sama sa una, nag-ingon ang Ginoo.

Jeremias 33:13

Sa mga kalungsoran sa kabungtoran, sa kalungsoran sa Sefela ug sa kalungsoran sa Negeb, sa yuta ni Benjamin, sa mga dapit nga naglibot sa Jerusalem, ug sa kalungsoran sa Juda, moagi pag-usab ang mga panon ilalom sa mga kamot niadtong nag-ihap niini, nag-ingon ang Ginoo.

Jeremias 33:26

isalikway gayod nako ang kaliwat ni Jacob ug ni David nga akong alagad ug dili magpili ug usa sa iyang kaliwat aron sa pagmando sa kaliwat ni Abraham, ni Isaac ug ni Jacob. Kay ibalik nako ang ilang maayong kahimtang ug kaluy-an nako sila.”

Jeremias 33:7

Ibalik nako ang maayong kahimtang sa Juda ug ang maayong kahimtang sa Israel ug tukoron nako kini pag-usab sama sa una.

Abdias 1:19

Sila nga atua sa Negeb manag-iya sa Bukid ni Esau, ug kadtong atua sa Sefela manag-iya sa yuta sa mga Filistihanon; sila manag-iya sa yuta sa Efraim ug sa yuta sa Samaria, ug si Benjamin manag-iya sa Gilead.

Abdias 1:20

Ang mga binihag didto sa Hala nga mao ang katawhan sa Israel manag-iya sa Fenicia hangtod sa Zarefat; ug ang mga binihag sa Jerusalem nga atua sa Sefarad manag-iya sa mga siyudad sa Negeb.

Sofonias 2:7

Ang baybayon mahimong kabtangan alang sa mga salin sa balay sa Juda diin sila manibsib, ug diha sa mga balay sa Askelon sila manghigda sa kagabhion. Kay ang Ginoo nga ilang Dios maghunahuna kanila ug magpahiuli sa ilang kahimtang.

Zacarias 7:7

Dili ba kini man ang mga pulong nga gisulti sa Ginoo pinaagi sa unang mga propeta sa diha nga gipuy-an pa ang Jerusalem ug nagmauswagon pa, ug sa naglibot pa ang mga siyudad niini, sa gipuy-an pa ang Negeb ug ang kapatagan?”