Jeremias 16:12

Ang Biblia 2011

ug tungod kay ngil-ad pa ang inyong nabuhat kay sa inyong mga katigulangan, kay kamong tanan nagsunod sa inyong gahi ug daotan nga kabubut-on, nagdumili sa pagpamati kanako;

Cross References

Genesis 6:5

Nakita sa Ginoo nga dako ang pagkadaotan sa tawo sa ibabaw sa yuta ug nga ang tanang anaa sa mga hunahuna sa iyang kasingkasing kanunay lamang nga daotan.

Genesis 8:21

Sa diha nga ang Ginoo nakapanimaho sa kahumot, ang Ginoo miingon diha sa iyang kasingkasing, “Dili na nako tunglohon pag-usab ang yuta tungod sa tawo, kay ang tuyo sa kasingkasing sa tawo daotan sukad sa iyang pagkabata, ug dili na nako laglagon pag-usab ang tanang butang nga buhi sama sa akong gihimo.

Ecclesiastes 8:12

Bisan pa ug ang makasasala nagbuhat ug daotan sa makagatos ug nagpalugway sa iyang kinabuhi, apan sa pagkatinuod ako nasayod nga may kaayohan alang niadtong may kahadlok sa Dios, kay sila nahadlok sa iyang atubangan;

Ecclesiastes 9:3

Daotan kini diha sa tanan nga nabuhat ilalom sa adlaw, nga usa ka sangpotanan moabot sa tanan; ang mga kasingkasing usab sa mga anak sa mga tawo puno sa kadaotan, ug ang kabuang anaa sa ilang kasingkasing samtang buhi pa sila, ug human niini mangadto sila sa mga patay.

Jeremias 13:10

Kining daotang katawhan, nga nagdumili sa pagpamati sa akong mga pulong, nga mapugsanon nga nagsunod sa ilang kasingkasing ug nagsunod sa laing mga dios aron sa pag-alagad kanila ug sa pagsimba kanila, mahisama niining bakos, nga dili na magpulos alang sa bisan unsa.

Jeremias 17:9

Ang kasingkasing malimbongon labaw sa tanang mga butang, ug hilabihan gayod ka daotan; kinsay makasabot niini?

Jeremias 18:12

“Apan sila miingon, ‘Kawang lamang kana! Sundon namo ang among kaugalingong mga plano, ug ang matag usa kanamo magbuhat sumala sa kagahi sa iyang kasingkasing nga daotan.’

Jeremias 22:28

Kining tawhana nga si Conias usa ba ka tinamay nga nabuak nga sudlanan, usa ba ka sudlanan nga walay nagtagad? Ngano man nga gihinginlan siya ug ang iyang mga anak, ug gisalibay ngadto sa yuta nga wala nila mailhi?

Jeremias 7:24

Apan sila wala mamati, o magkiling sa ilang mga dalunggan, kondili naglakaw sa ilang kaugalingong mga tambag ug sa kagahi sa daotan nilang kasingkasing, ug misibog ug wala mopadayon.

Jeremias 7:26

Bisan pa niana, wala sila mamati kanako o magkiling sa ilang mga dalunggan, hinuon nagpatikig sa ilang liog. Sila nagbuhat ug labaw pa ka daotan kay sa ilang mga katigulangan.

Jeremias 9:14

apan mapugsanon hinuon silang misunod sa ilang kasingkasing ug nagsunod sa mga Baal, ingon sa gitudlo kanila sa ilang mga katigulangan.

Mga Pagbangotan 5:7

Ang among mga amahan nakasala ug wala na, ug among giantos ang ilang kasal-anan

Ezequiel 20:30

Tungod niini sulti ngadto sa balay sa Israel, Mao kini ang giingon sa Ginoong Dios: Hugawan ba ninyo ang inyong kaugalingon sunod sa paagi sa inyong katigulangan ug mahisalaag ngadto sa ilang mga dulumtanan?

Amos 2:4

Mao kini ang giingon sa Ginoo, “Tungod sa tulo ka kalapasan sa Juda ug tungod sa upat, dili nako bakwion ang silot; tungod kay gisalikway nila ang balaod sa Ginoo, ug wala magtuman sa iyang mga lagda, apan ang ilang kabakakan nagpahisalaag kanila, nga mao ang gisubay sa ilang mga katigulangan.

Malaquias 3:7

Sukad sa mga adlaw sa inyong mga katigulangan kamo mitipas gikan sa akong mga lagda ug wala magtuman niini. Pamalik kamo kanako ug ako mobalik nganha kaninyo, nag-ingon ang Ginoo sa mga panon. Apan kamo miingon, ‘Unsaon man namo pagbalik?’

Marcos 7:21

Kay gikan sa sulod, gikan sa kasingkasing sa tawo, mogula ang mga daotang hunahuna, salawayong pakighilawas, pagpangawat, pagpatay, pagpanapaw,

Deuteronomio 29:19

ang tawo nga sa dihang makadungog siya sa mga pulong niini nga tunglo, nagpanalangin sa iyang kaugalingon sulod sa iyang kasingkasing nga nag-ingon, ‘Makabaton ako ug pakigdait, bisan pa ug naglakaw ako sa kagahi sa akong kasingkasing.’ Naghatod kini ngadto sa katalagman sa umog ug sa uga.

Deuteronomio 9:27

Hinumdomi ang imong mga ulipon, si Abraham, si Isaac ug si Jacob, ayaw tagda ang kagahi niining katawhan o ang ilang pagkadaotan o ang ilang sala

2 Timoteo 3:13

Apan ang mga tawong daotan ug ang mga tigpakaaron-ingnon mosamot pa sa pagkadaotan, manglimbong ug malimbongan.

Mga Hebreo 3:12

Pagmatngon, mga igsoon, basin unya nga diha kaninyo adunay daotan ug dili matinuohong kasingkasing nga mibiya gikan sa buhi nga Dios.

Mga Maghuhukom 2:19

Apan sa diha nga ang maghuhukom namatay, sila mibalik ug nagbuhat ug labi pang ngil-ad kay sa ilang katigulangan, sa pagsunod sa ilang mga dios, sa pag-alagad kanila ug sa pagyukbo kanila. Sila wala mohunong sa ilang mga buhat o sa ilang pagkagahi.

1 Samuel 15:23

Kay ang pagsupil sama sa sala sa pagpanag-an, ug ang pagkagahig ulo sama sa sala sa pagsimba sa mga diosdios. Tungod kay imong gisalikway ang pulong sa Ginoo, siya usab magsalikway kanimo sa imong pagkahari.”