Gipadayag 4:7

Ang Biblia 2011

Ang una nga buhing binuhat daw liyon, ang ikaduha nga buhing binuhat daw baka nga toro, ang ikatulo nga buhing binuhat may nawong sa tawo, ug ang ikaupat nga buhing binuhat daw agila nga naglupad.

Cross References

Genesis 49:9

Si Juda itoy sa liyon. Gikan sa mga tukbonon misaka ikaw, anak ko. Mikamang siya ug milayat sama sa liyon, sama siya sa liyon nga baye; kinsa ang mangahas sa pagpukaw kaniya?

2 Samuel 1:23

“Si Saul ug si Jonatan, mga pinalangga ug angayng higugmaon! Diha sa kinabuhi ug diha sa kamatayon wala sila magkabulag; sila tulin pa kay sa mga agila, sila kusgan pa kay sa mga liyon.

Mga Panultihon 28:2

Kon ang usa ka yuta makalapas, daghan kini ug mga pangulo; apan uban sa mga tawo nga may panabot ug kahibalo, ang kahimtang niini molungtad ug dugay.

Isaias 40:31

apan kadtong naghulat sa Ginoo magbag-o sa ilang kusog, sila manglupad pinaagi sa mga pako sama sa mga agila, sila managan ug dili kapoyon, sila manglakaw ug dili mangaluya.

Ezequiel 1:10

Mahitungod sa panagway sa ilang mga nawong, sila may nawong sa tawo, ug silang upat may nawong sa liyon sa tuong bahin, ug silang upat may nawong sa baka diha sa wala nga bahin, ug silang upat may nawong sa agila dapit sa luyo.

Ezequiel 1:8

Ilalom sa ilang mga pako diha sa upat nila ka kilid, sila adunay mga kamot sa tawo. Ang upat adunay mga nawong ug mga pako nga ingon niini:

Ezequiel 10:14

Ug ang matag usa may upat ka nawong; ang unang nawong, nawong sa usa ka kerubin, ug ang ikaduhang nawong, nawong sa tawo ug ang ikatulo, nawong sa leon, ug ang ikaupat, nawong sa usa ka agila.

Ezequiel 10:21

Ang matag usa may upat ka nawong, ug ang matag usa may upat ka pako, ug sa ilalom sa ilang mga pako ang daw mga kamot sa tawo.

Daniel 7:4

Ang una sama sa usa ka liyon, ug adunay mga pako sa agila. Unya samtang nagtan-aw ako, ang mga pako niini nangaibot ug kini gialsa gikan sa yuta ug gipatindog sa duha ka tiil sama sa usa ka tawo ug ang panghunahuna sa tawo gihatag niini.

Abdias 1:4

Bisan ug ikaw naglupad sa kahitas-an sama sa agila, bisan ug ang imong salag ipahimutang taliwala sa mga bituon, gikan diha ihulog ko ikaw, nag-ingon ang Ginoo.

Numeros 23:24

Tan-awa, usa ka katawhan! Sama sa usa ka liyon nga baye mitindog kini, ug sama sa usa ka liyon nga laki mibarog kini sa iyang kaugalingon, ug kini dili mohigda hangtod nga kini makakaon sa tukbonon, ug makainom sa dugo sa mga napatay.”

Numeros 24:9

Siya mipauraray, siya mihigda sama sa usa ka liyon, ug sama sa usa ka baye nga liyon; kinsa ang mopukaw kaniya? Bulahan ang tanan nga magpanalangin kanimo, ug tinunglo ang tanan nga magtunglo kanimo.”

1 Mga Taga-Corinto 14:20

Mga igsoon, ayaw kamo pagbinata sa inyong hunahuna, hinuon sa daotan pagpakabata kamo, apan sa hunahuna pagpakahamtong kamo.

Deuteronomio 28:49

Ang Ginoo magdala batok kaninyo ug usa ka nasod gikan sa layo, gikan sa kinatumyan sa kalibotan, sama ka tulin sa lupad sa agila, usa ka nasod nga ang sinultihan dili ninyo masabtan,

Gipadayag 4:6

ug sa atubangan sa trono dihay daw dagat nga bildo, daw kristal. Ug libot sa trono, sa matag kilid niini, dihay nag-alirong nga upat ka buhing binuhat nga ang atubangan ug likod niini nalukop sa mga mata.

Gipadayag 6:3

Ug sa pagbukas niya sa ikaduhang silyo, akong nadungog ang ikaduha nga buhing binuhat nga nag-ingon, “Duol ngari!”

Gipadayag 6:5

Ug sa pagbukas niya sa ikatulong silyo, akong nadungog ang ikatulo nga buhing binuhat nga nag-ingon “Duol ngari!” Ug akong nakita ang usa ka itom nga kabayo, ug ang nagkabayo niini may timbangan diha sa iyang kamot.

Gipadayag 6:7

Ug sa pagbukas niya sa ikaupat nga silyo, akong nadungog ang tingog sa ikaupat nga buhing binuhat nga nag-ingon, “Duol ngari!”