Genesis 2:8

Ang Biblia 2011

Ug ang Ginoong Dios nagbuhat ug usa ka tanaman sa silangan sa Eden ug gibutang niya didto ang tawo nga iyang giumol.

Cross References

Genesis 13:10

Giyahat ni Lot ang iyang mga mata, ug nakita niya nga ang kapatagan sa Jordan daghan ug tubig sama sa tanaman sa Ginoo, sama sa yuta sa Ehipto paingon sa Zoar. Kini sa wala pa laglaga sa Ginoo ang Sodoma ug ang Gomora.

Genesis 3:23

Tungod niini ang Ginoong Dios mihingilin kaniya gikan sa tanaman sa Eden aron sa pag-uma sa yuta diin siya gikuha.

Genesis 3:24

Busa gipapahawa niya ang tawo, ug didto sa silangang dapit sa tanaman sa Eden gibutang niya ang mga kerubin ug ang nagsiga nga espada nga nagtuyok aron pagbantay sa dalan ngadto sa kahoy sa kinabuhi.

Genesis 4:16

Ug mipahawa si Cain sa atubangan sa Ginoo, ug mipuyo sa yuta sa Nod, sa silangan sa Eden.

2 Mga Hari 19:12

Nakaluwas ba kanila ang mga dios sa mga nasod, ang mga nasod nga gilaglag sa akong katigulangan: ang Gozan, ang Haran, ang Rezef ug ang katawhan sa Eden nga diha sa Tel-asar?

Isaias 51:3

Kay ang Ginoo maghupay sa Zion; iyang hupayon ang tanan niyang mga dapit nga nangaguba, ug himoon niya ang iyang kamingawan nga sama sa Eden, ug ang iyang disyerto nga sama sa tanaman sa Ginoo; kalipay ug kasadya makaplagan diha kaniya, ang pagpasalamat ug ang tingog sa huni.

Ezequiel 27:23

Ang Haran, ang Cane, ang Eden, ang mga tigpatigayon sa Seba, ang Asur, ug ang Kilmad nakigpatigayon kanimo.

Ezequiel 28:13

Ikaw didto sa Eden, ang tanaman sa Dios; ang tanang mahalon nga bato maoy imong hapin, ang kornalina, ang topasyo, ug ang haspe, ang krisolito, ang berilo, ug ang onyx, ang sapiro, ug ang karbungko, ug ang esmeralda; ug hinimo sa bulawan ang imong kuwentas ug ang imong mga kinulit. Sa adlaw sa pagbuhat kanimo kini giandam.

Ezequiel 31:16

Akong gipakurog ang mga nasod sa dinahunog sa iyang pagkapukan, sa diha nga gitambog nako siya ngadto sa Sheol uban kanila nga nanganaog sa Gahong. Ug ang tanang mga kahoy sa Eden, ang pinili ug ang labing maayo sa Lebanon, ang tanan nga nag-inom ug tubig, gihupay didto sa kalibotan sa ilalom.

Ezequiel 31:18

“Kang kinsa man ikaw itandi sa himaya ug sa pagkabantogan taliwala sa mga kahoy sa Eden? Ikaw pukanon uban sa mga kahoy sa Eden ngadto sa kalibotan sa ilalom. Ikaw maghigda uban sa mga dili tinuli, uban kanila nga gipamatay pinaagi sa espada. Kini mao ang Paraon ug ang tanan niyang panon sa katawhan, nag-ingon ang Ginoong Dios.”

Joel 2:3

Ang kalayo maglamoy diha sa ilang atubangan, ug sa luyo nila magsiga ang kalayo. Ang yuta sama sa tanaman sa Eden sa ilang atubangan, apan iniglabay nila biniyaan nga kamingawan, ug walay makaikyas gikan kanila.