Exodo 40:34

Ang Biblia 2011

Unya ang panganod mitabon sa tolda nga tagboanan ug ang himaya sa Ginoo milukop sa Tolda.

Cross References

2 Samuel 7:6

Wala ako makapuyo sa usa ka balay sukad sa adlaw nga gidala nako ang mga anak sa Israel gikan sa Ehipto hangtod niining adlawa apan nagbalhinbalhin ako pagpuyo diha sa mga tolda.

2 Cronicas 5:13

Katungdanan sa mga tigpatingog sa trumpeta ug sa mga mag-aawit ang pagpatugbaw sa ilang tingog nga maghiusa sa pagdayeg ug pagpasalamat sa Ginoo, ug sa diha nga napatugbaw na ang awit uban sa mga trumpeta ug sa mga piyangpiyang ug sa ubang mga tulunggon sa pagdayeg sa Ginoo, “Kay siya maayo, kay ang iyang gugmang walay paglubad nagpadayon hangtod sa kahangtoran,” ang balay, ang balay sa Ginoo nalukop sa panganod,

2 Cronicas 7:2

Ang mga pari wala makasulod sa balay sa Ginoo, tungod kay ang himaya sa Ginoo milukop sa balay sa Ginoo.

Salmo 26:8

O Ginoo, nahigugma ako sa balay nga imong puluy-anan, ug sa dapit diin magpuyo ang imong himaya.

Exodo 14:24

Sa pagkabuntag, gitan-aw sa Ginoo ang panon sa mga Ehiptohanon gikan sa haligi nga kalayo ug sa panganod, ug gigubot niya ang kasundalohan nga Ehiptohanon.

Exodo 16:10

Ug sa dihang misulti si Aaron sa tibuok katilingban sa katawhan sa Israel, mitan-aw sila ngadto sa kamingawan ug ilang nakita nga ang himaya sa Ginoo mipakita diha sa panganod.

Exodo 25:8

Pabuhata sila ug usa ka balaang puluy-anan alang kanako aron makapuyo ako sa ilang taliwala.

Exodo 29:43

Didto makigtagbo ako sa katawhan sa Israel ug ang Tolda balaanon pinaagi sa akong himaya.

Exodo 33:9

Sa diha nga makasulod na si Moises sa Tolda, ang haligi nga panganod mopaubos ug mopatungod diha sa pultahan sa Tolda, ug ang Ginoo makigsulti kang Moises.

Isaias 57:15

Kay kini mao ang giingon sa taas ug sa Usa nga halangdon nga nagpuyo sa walay kataposan, nga ang ngalan Balaan: “Ako nagpuyo sa habog ug balaan nga dapit, ug uban usab kaniya nga may mahinulsolon ug mapaubsanon nga espiritu, aron sa pagpabuhi sa espiritu sa mapaubsanon, ug aron sa pagpabuhi sa kasingkasing sa mahinulsolon.

Isaias 6:4

Ang mga bisagra sa mga pultahan nauyog sa iyang tingog nga nagtawag, ug ang balay napuno sa aso.

Ezequiel 10:4

Ug ang himaya sa Ginoo mikayab gikan sa mga kerubin ngadto sa tugkaran sa balay ug ang balay nalukop sa panganod ug ang hawanan napuno sa kasilaw sa himaya sa Ginoo.

Levitico 16:2

Ang Ginoo miingon kang Moises, “Sultihi si Aaron nga imong igsoon nga dili sa tanan nga panahon siya mosulod sa dapit nga balaan, sa sulod sa tabil sa atubangan sa tabon nga anaa ibabaw sa sudlanan sa kasabotan, aron dili siya mamatay kay ako motungha diha sa panganod sa ibabaw sa tabon.

Hageo 2:7

ug uyogon nako ang tanang mga nasod aron ang mga bahandi sa tanang mga nasod moabot ug pun-on nako sa himaya kining balaya, nag-ingon ang Ginoo sa mga panon.

Hageo 2:9

Ang ulahing himaya niining balaya molabaw pa kay sa una, nag-ingon ang Ginoo sa mga panon, ug niining dapita ihatag nako ang kauswagan, nag-ingon ang Ginoo sa mga panon.’ ”

Numeros 7:89

Ug sa pagsulod ni Moises sa tolda nga tagboanan aron sa pagpakigsulti sa Ginoo, iyang nadungog ang tingog nga nagsulti kaniya gikan sa ibabaw sa tabon nga diha sa ibabaw sa sudlanan sa pagpamatuod, gikan sa taliwala sa duha ka mga kerubin, ug kini nakigsulti kaniya.

Roma 9:4

nga mao ang mga Israelinhon. Ila ang pagkaanak, ang kadungganan, ang mga kasabotan, ang paghatag sa Balaod, ang pagsimba ug ang mga saad;

Gipadayag 15:8

Ug ang templo napuno sa aso gikan sa himaya sa Dios ug gikan sa iyang gahom, ug walay si bisan kinsa nga makahimo sa pagsulod sa templo hangtod matapos ang pito ka katalagman sa pito ka anghel.

Gipadayag 21:3

Ug nadungog nako gikan sa trono ang usa ka dakong tingog nga nag-ingon, “Tan-awa, ang puluy-anan sa Dios anaa uban sa mga tawo. Siya magpuyo uban kanila ug sila mahimo nga iyang mga katawhan, ug ang Dios gayod mao ang magkig-uban kanila ug mahimo nga ilang Dios.