Exodo 12:14

Ang Biblia 2011

“Kining adlawa mahimong usa ka handomanan alang kaninyo, ug himoon ninyo kini ingon nga kasaulogan alang sa Ginoo. Sa tanan ninyong kaliwatan saulogon ninyo kini ingon nga tulumanon hangtod sa kahangtoran.

Cross References

2 Mga Hari 23:21

Unya ang hari nagsugo sa tibuok katawhan, “Tumana ang Kasaulogan sa Pagsaylo alang sa Ginoo nga inyong Dios, sumala sa nasulat niining basahon sa kasabotan.”

Salmo 111:4

Iyang gihimo nga mahinumdoman ang iyang mga buhat nga katingalahan; ang Ginoo puno sa grasya ug maluluy-on.

Salmo 135:13

Ang imong ngalan, O Ginoo, molungtad hangtod sa kahangtoran, ang imong kabantog, O Ginoo, sa tanang mga kaliwatan.

Exodo 12:17

Ug himoa ninyo ang kasaulogan sa Pan nga Walay Patubo, kay niining adlawa gikuha nako ang inyong mga panon gikan sa yuta sa Ehipto. Busa sauloga ninyo kining adlawa sa tanan ninyong kaliwatan ingon nga usa ka tulumanon hangtod sa kahangtoran.

Exodo 12:24

Tumanon ninyo kini nga pahimangno ingon nga usa ka tulumanon alang kaninyo ug sa inyong mga kaliwat hangtod sa kahangtoran.

Exodo 12:43

Unya ang Ginoo miingon kang Moises ug kang Aaron, “Kini mao ang tulumanon sa Kasaulogan sa Pagsaylo. Kinahanglan nga walay langyaw nga mokaon niini.

Exodo 12:6

ug ilain ninyo kini hangtod sa ikanapulo ug upat nga adlaw sa maong bulan. Ang tibuok katigoman sa katilingban sa Israel mag-ihaw niini sa pagkahapon.

Exodo 23:15

Himoa ninyo ang Kasaulogan sa Pan nga Walay Patubo sumala sa akong gisugo kaninyo. Magkaon kamo ug pan nga walay patubo sulod sa pito ka adlaw sulod sa gitakda nga panahon sa bulan sa Abib, kay niini migula kamo gikan sa Ehipto ug walay si bisan kinsa nga magpakita sa akong atubangan nga walay dala.

Exodo 27:21

Sulod sa tolda nga tagboanan sa gawas sa tabil nga anaa sa atubangan sa pagpamatuod, si Aaron ug ang iyang mga anak nga lalaki mao ang mag-atiman gikan sa hapon hangtod sa buntag atubangan sa Ginoo. Kini mahimong tulumanon hangtod sa kahangtoran nga tumanon sa katawhan sa Israel ngadto sa ilang mga kaliwatan.

Exodo 5:1

Unya miadto si Moises ug si Aaron sa Paraon ug miingon kaniya, “Mao kini ang giingon ni Yahweh, ang Dios sa Israel, ‘Tugoti sa paglakaw ang akong katawhan aron sila makahimo ug kasaulogan alang kanako didto sa kamingawan.’ ”

Ezequiel 46:14

Ug siya mag-andam ug usa ka halad nga pagkaon uban niini matag buntag, ikaunom nga bahin sa usa ka epha ug, ikatulo nga bahin sa usa ka hin nga lana aron iahog sa harina ingon nga usa ka halad nga pagkaon ngadto sa Ginoo. Mao kini ang tulumanon sa magpadayon nga halad nga sunogon.

Levitico 23:6

Sa ikanapulo ug lima nga adlaw niining bulana mao ang Kasaulogan sa Pan nga Walay Patubo alang sa Ginoo. Pito ka adlaw kamong magkaon ug mga pan nga walay patubo.

Zacarias 6:14

Ug ang korona ipahiluna diha sa Templo sa Ginoo ingon nga usa ka handomanan kang Heldai, kang Tobias, kang Jedaias, ug kang Josias nga anak ni Zefanias.

Numeros 10:8

Ug ang mga anak ni Aaron, ang mga pari, maoy magpatingog sa mga trumpeta ug kini lagda nga walay kataposan alang sa inyong mga kaliwatan.

Numeros 15:15

Alang sa katilingban, adunay usa lamang ka lagda alang kaninyo ug alang sa langyaw nga nagpuyo uban kaninyo, usa ka lagda nga walay kataposan ngadto sa inyong mga kaliwatan; sama kaninyo, mao usab ang usa ka langyaw sa atubangan sa Ginoo.

Numeros 16:40

aron mahimong pahinumdom alang sa katawhan sa Israel, nga walay bisan kinsa nga dili pari, nga dili gikan sa kaliwatan ni Aaron, nga moduol sa paghalad ug insenso sa atubangan sa Ginoo aron siya dili mahisama kang Korah ug sa iyang kaubanan sumala sa gisulti sa Ginoo kang Eleasar pinaagi kang Moises.

Numeros 18:8

Unya ang Ginoo miingon kang Aaron, “Ug tan-awa, akong gitugyan kanimo ang unsay mahibilin sa mga halad nga gihimo alang kanako, ang tanang mga butang nga gibalaan sa katawhan sa Israel, gihatag nako kini kanimo ingon nga imong bahin ug ngadto sa imong mga anak ingon nga bahin hangtod sa kahangtoran.

Mateo 26:13

Sa pagkatinuod, sultihan ko kamo nga bisan diin sa tibuok kalibotan nga iwali kining Maayong Balita, ang gibuhat niining babayehana hisgotan usab ingon nga handomanan alang kaniya.”

Lucas 22:19

Ug siya mikuha ug pan, ug sa nakapasalamat na siya, kini iyang gipikaspikas ug gihatag kanila nga nag-ingon, “Kini mao ang akong lawas nga gihatag alang kaninyo. Buhata ninyo kini sa paghinumdom kanako.”

Deuteronomio 16:1

“Bantayi ninyo ang bulan sa Abib ug sauloga ang Pagsaylo alang sa Ginoo nga inyong Dios, kay sa bulan sa Abib gikuha kamo sa Ginoo nga inyong Dios gikan sa Ehipto niadtong usa ka gabii.

Deuteronomio 16:11

Ug paglipay kamo sa atubangan sa Ginoo nga inyong Dios, kamo ug ang inyong anak nga lalaki ug ang inyong anak nga babaye, ang inyong ulipon nga lalaki ug ang inyong ulipon nga babaye, ang Levihanon nga anaa sa inyong mga lungsod, ug ang langyaw, ug ang wala nay amahan ug ang biyuda nga anaa uban kaninyo, didto sa dapit nga pilion sa Ginoo nga inyong Dios aron papuy-an sa iyang ngalan.

Deuteronomio 6:8

Ihigot ninyo kini sa inyong kamot ingon nga ilhanan ug mahimo kini nga mga timaan sa agtang taliwala sa inyong mga mata.

Josue 4:7

Unya sultihan ninyo sila nga ang mga tubig sa Jordan nabahin sa duha sa atubangan sa sudlanan sa kasabotan sa Ginoo. Sa pag-agi niini sa Jordan, ang mga tubig sa Jordan nabahin busa kining mga batoha handomanan sa katawhan sa Israel hangtod sa kahangtoran.”

1 Samuel 30:25

Ug mao nga sukad niadtong adlawa, gihimo niya kini nga usa ka lagda ug usa ka tulumanon alang sa Israel hangtod karon.