Daniel 9:14

Ang Biblia 2011

Busa ang Ginoo nag-andam sa katalagman ug nagdala niini kanamo kay ang Ginoo nga among Dios matarong sa tanan niyang mga buhat nga iyang gibuhat ug kami wala motuman sa iyang tingog.

Cross References

2 Cronicas 12:6

Unya ang mga pangulo sa Israel ug ang hari nagpaubos sa ilang kaugalingon ug miingon, “Ang Ginoo matarong.”

Esdras 9:15

O Ginoo, ang Dios sa Israel, ikaw matarong kay kami nahibilin nga usa ka salin nga nakaikyas hangtod niining adlawa. Tan-awa, kami ania sa imong atubangan sa among pagkasad-an kay walay makatindog sa imong atubangan tungod niini.”

Nehemias 9:33

Apan ikaw matarong diha sa tanan nga midangat kanamo kay ikaw nagmaminatud-anon man apan kami nagbuhat ug daotan.

Salmo 111:7

Ang mga buhat sa iyang mga kamot matuod ug makiangayon; ang tanan niyang mga lagda kasaligan.

Salmo 116:5

Ang Ginoo puno sa grasya ug matarong; ang atong Dios maluluy-on!

Salmo 119:137

Matarong ikaw, O Ginoo, ug matarong ang imong mga paghukom.

Salmo 51:14

Luwasa ako gikan sa sala sa pagpatay, O Dios, ikaw nga Dios sa akong kaluwasan, ug ang akong dila mag-awit sa kusog mahitungod sa imong pagkamatarong.

Exodo 9:27

Unya ang Paraon misugo sa pagpatawag kang Moises ug kang Aaron ug miingon kanila, “Nakasala ako niining panahona. Ang Ginoo matarong ug ako ug ang akong katawhan daotan.

Jeremias 12:1

Matarong ikaw, O Ginoo, sa dihang nagmulo ako nganha kanimo; apan mangamuyo ako kanimo mahitungod sa akong kahimtang. Ngano nga mouswag man ang dalan sa daotan? Ngano nga molambo man ang tanan nga mabudhion?

Jeremias 31:28

Ug ingon nga ako nagbantay kanila sa pag-ibot ug sa paglumpag, sa pagpukan, sa paglaglag ug sa pagdala ug kadaot, bantayan usab nako kini sa pagtukod ug pagtanom, nag-ingon ang Ginoo.

Jeremias 4:17

Sama sa mga tigbantay sa usa ka uma sila makigbatok libot kaniya, tungod kay siya misupil kanako, nag-ingon ang Ginoo.

Jeremias 44:27

Tan-awa, ako magbantay kanila alang sa kadaotan ug dili alang sa kaayohan. Ang tanang mga tawo sa Juda nga ania sa yuta sa Ehipto mangahurot pinaagi sa espada ug sa gutom, hangtod nga adunay kataposan kanila.

Mga Pagbangotan 1:5

Ang iyang mga kaaway nangahimong mga pangulo, ang iyang mga kaaway miuswag, kay ang Ginoo nagpaantos kaniya tungod sa pagkadaghan sa iyang mga kalapasan; ang iyang kabataan gipamihag ngadto sa atubangan sa kaaway.

Ezequiel 16:43

Tungod kay ikaw wala mahinumdom sa mga adlaw sa imong pagkabatan-on, kondili naghagit hinuon ikaw kanako pinaagi niining tanang mga butang, busa silotan usab nako ang imong binuhatan ibabaw sa imong ulo, nag-ingon ang Ginoong Dios. “Dili ba nagbuhat man ikaw niini nga kalaw-ayan dugang sa tanan nimong mga dulumtanan?

Daniel 4:34

Sa kataposan sa mga adlaw, ako, si Nabucodonosor miyahat sa akong mga mata ngadto sa langit ug ang akong salabotan nahiuli kanako. Akong gihimaya ang Labing Halangdon ug gidayeg ug gipasidunggan siya nga buhi hangtod sa kahangtoran, kay ang iyang paghari walay kataposan nga paggahom, ug ang iyang gingharian naglungtad gikan sa kaliwatan ngadto sa laing kaliwatan.

Daniel 9:7

Kanimo, O Ginoo, ang pagkamatarong, apan kanamo kaulawan, ingon niining adlawa, sa mga tawo sa Juda, sa mga nagpuyo sa Jerusalem ug sa tibuok nga Israel, kadtong duol ug kadtong layo, sa tanang yuta nga imong giabogan kanila tungod sa pagbudhi nga ilang nahimo batok kanimo.