Amos 1:2

Ang Biblia 2011

Ug siya miingon, “Ang Ginoo nagdahunog gikan sa Zion, ug mipalanog sa iyang tingog gikan sa Jerusalem; ang mga sibsibanan sa mga tigbantay sa karnero nagsubo ug ang kinatumyan sa Carmel nalaya.”

Cross References

Salmo 29:4

Ang tingog sa Ginoo gamhanan, ang tingog sa Ginoo puno sa pagkahalangdon.

Salmo 46:6

Ang mga nasod nagkaguliyang, ang mga gingharian nangatay-og; iyang gipalanog ang iyang tingog, ang yuta natunaw.

Mga Panultihon 20:2

Ang makalilisang nga kapungot sa usa ka hari sama sa pagngulob sa usa ka liyon; siya nga naghagit kaniya sa pagkasuko mawad-an sa iyang kinabuhi.

Isaias 33:9

Ang yuta nagsubo ug nagluya; ang Lebanon nalibog ug nalaya; ang Sharon sama sa usa ka kamingawan; ug ang Basan ug ang Carmel nagyabyab sa ilang mga dahon.

Isaias 35:2

kini mamulak pag-ayo, ug maglipay uban sa kasadya ug pag-awit. Ang himaya sa Lebanon ihatag ngadto niini, ang katahom sa Carmelo ug sa Sharon. Sila makakita sa himaya sa Ginoo, sa kahalangdon sa atong Dios.

Isaias 42:13

Ang Ginoo mogula sama sa usa ka gamhanan nga tawo, sama sa tawo sa gubat siya mangisog pag-ayo; siya mosinggit, siya mosinggit ug kusog; siya magpakita sa iyang kaugalingon nga kusgan batok sa iyang mga kaaway.

Jeremias 12:4

Hangtod kanus-a ba ang yuta magsubo, ug mangalaya ang mga sagbot sa tanang yuta? Kay tungod sa pagkadaotan sa mga nagpuyo didto, ang mga mananap ug ang mga langgam nangahanaw tungod kay ang mga tawo miingon, “Siya dili makakita sa atong binuhatan.”

Jeremias 14:2

“Ang Juda nagsubo, ug nagluya ang mga ganghaan niini; ang iyang katawhan nagbangutan diha sa yuta, ug ang pagtuaw sa Jerusalem midangat sa itaas.

Jeremias 25:30

“Busa ikaw, kinahanglang magpropesiya batok kanila niining tanan nga mga pulong, ug ingna sila: ‘Ang Ginoo mopadahunog gikan sa kahitas-an, ug mobungat sa iyang tingog gikan sa iyang balaang puluy-anan; siya mopadahunog sa iyang tingog batok sa iyang panon ug mosinggit, sama kanila nga naggiok sa mga paras, batok sa tanang nagpuyo sa yuta.

Jeremias 28:8

Ang mga propeta nga nag-una kanimo ug kanako sa karaang mga panahon nagpropesiya ug gubat, gutom ug kamatay batok sa daghang mga nasod ug batok sa dagkong mga gingharian.

Jeremias 50:19

Akong ibalik ang Israel ngadto sa iyang sibsibanan, ug siya magsibsib diha sa Carmel ug sa Basan, ug ang iyang tinguha matagbaw diha sa kabungtoran sa Efraim ug sa Gilead.

Oseas 11:10

Sila mosunod sa Ginoo, nga magngulob sama sa liyon. Oo, siya magngulob, ug ang iyang mga anak mangabot nga magkurog gikan sa kasadpan.

Oseas 13:8

Mohasmag ako kanila sama sa usa ka oso nga nawad-an sa iyang mga itoy, ug laksion nako ang ilang dughan, ug didto ako maglamoy kanila sama sa usa ka liyon nga baye, sama sa usa ka mananap nga ihalas nga magwataswatas kanila.

Joel 1:19

Kanimo, O Ginoo, ako nagtuaw. Kay ang kalayo milamoy sa mga sibsibanan sa kamingawan, ug ang siga sa kalayo misunog sa tanang mga kahoy sa kapatagan.

Joel 2:11

Ang Ginoo mipatugbaw sa iyang tingog sa atubangan sa iyang kasundalohan, kay ang iyang panon hilabihan ka dako, siya nga magtuman sa iyang pulong gamhanan. Kay ang adlaw sa Ginoo dako ug hilabihan ka makalilisang, kinsa ang makalahutay niini?

Joel 3:16

Ang Ginoo mipadahunog gikan sa Zion, ug mipatugbaw sa iyang tingog gikan sa Jerusalem, ug ang kalangitan ug ang yuta nangurog. Apan ang Ginoo dalangpanan sa iyang katawhan, usa ka salipdanan alang sa katawhan sa Israel.

Amos 9:3

Bisan pa ug magtago sila sa ilang kaugalingon didto sa kinatumyan sa Carmel, gikan didto pangitaon nako sila ug kuhaon; bisan pa ug motago sila gikan sa akong panan-aw sa ilalom sa dagat, didto sugoon nako ang bitin ug kini mopaak kanila.

Nahum 1:4

Siya magbadlong sa dagat ug magpahubas niini, siya magpahubas sa tanang mga suba; ang Basan ug ang Carmel nalaya, ang bulak sa Lebanon nagkalawos.

1 Samuel 25:2

Ug didtoy usa ka tawo sa Maon, nga ang kabtangan atua sa Carmel. Ang tawo dato kaayo ug siya adunay tulo ka libo ka karnero ug usa ka libo ka kanding, ug iyang gitupihan ang iyang mga karnero didto sa Carmel.