2 Samuel 7:7

Ang Biblia 2011

Sa tanang dapit diin ako mibalhin uban sa tanang katawhan sa Israel, misulti ba ako ug usa ka pulong ngadto sa bisan kinsa sa mga maghuhukom sa Israel, nga akong gisugo sa pagbantay sa akong katawhan nga Israel, nga nag-ingon, “Nganong wala ako ninyo tukori ug usa ka balay nga cedro?” ’

Cross References

2 Samuel 5:2

Sa mga panahon nga nangagi sa diha nga si Saul mao pa ang hari sa ibabaw namo, ikaw mao ang nagmando sa paggula ug sa pagsulod sa Israel, ug ang Ginoo miingon kanimo, ‘Ikaw mahimong tigbantay sa akong katawhan nga Israel ug ikaw ang mahimong pangulo sa Israel.’ ”

1 Cronicas 11:2

Sa miaging mga panahon, bisan sa hari pa si Saul, ikaw mao ang nagmando ug nagdala sa Israel ug ang Ginoo nga imong Dios nag-ingon kanimo, ‘Ikaw mahimong tigbantay sa akong katawhan nga Israel ug ikaw mahimong pangulo sa akong katawhan nga Israel.’ ”

1 Cronicas 17:6

Sa tanang dapit diin ako miadto uban sa tibuok Israel, misulti ba ako ug usa ka pulong mahitungod ni bisan kinsa nga mga maghuhukom sa Israel, nga akong gisugo sa pag-atiman sa akong katawhan, nga nag-ingon, “Nganong wala man ninyo ako buhati ug usa ka balay nga hinimo sa kahoy nga cedro?” ’

Isaias 40:11

Siya magpasibsib sa iyang panon sama sa usa ka tigbantay sa karnero, siya nagtigom sa mga nating karnero diha sa iyang bukton, magkugos kanila diha sa iyang dughan, ug malumong maggiya niadtong adunay mga gagmay.

Isaias 66:1

Mao kini ang giingon sa Ginoo: “Ang langit mao ang akong trono, ug ang yuta mao ang akong tumbanan; unsang balaya ang inyong tukoron alang kanako, ug unsang dapita ang akong pahulayan?

Jeremias 23:4

Ug ako magbutang ug mga tigbantay kanila nga mag-atiman kanila ug dili na sila mahadlok pa o malisang o adunay mawala, nag-ingon ang Ginoo.

Jeremias 3:15

“ ‘Hatagan ko kamo ug mga magbalantay nga uyon sa akong kasingkasing, nga magpakaon kaninyo sa kaalam ug salabotan.

Ezequiel 34:15

Ako gayod mao ang mahimong tigbantay sa akong mga karnero, ug papahulayon nako sila, nag-ingon ang Ginoong Dios.

Ezequiel 34:2

“Anak sa tawo, pagpropesiya batok sa mga tigbantay sa mga karnero sa Israel, pagpropesiya ug sulti kanila, ngadto sa mga tigbantay sa mga karnero, Mao kini ang giingon sa Ginoong Dios: Alaot kamong mga tigbantay sa mga karnero nga nagpakaon hinuon sa inyong kaugalingon! Dili ba nga ang mga tigbantay sa mga karnero magpasibsib man sa mga karnero?

Ezequiel 34:23

Ug ibutang nako ang usa ka tigbantay ibabaw kanila, ang akong alagad nga si David, ug siya magpasibsib kanila. Siya magpasibsib kanila ug siya mahimong ilang tigbantay.

Miqueas 5:4

Ug siya motindog ug magpakaon sa iyang panon diha sa kusog sa Ginoo, diha sa pagkahalangdon sa ngalan sa Ginoo nga iyang Dios. Ug sila magpuyo nga layo sa kakuyaw kay karon siya mahimong bantogan hangtod sa mga kinatumyan sa kalibotan.

Mateo 2:6

‘Ug ikaw, O Betlehem, sa yuta sa Juda, sa pagkatinuod dili maoy labing ubos sa mga prinsipe sa Juda; kay anha kanimo maggikan ang usa ka pangulo nga mao ang magbantay sa akong katawhan, ang Israel.’ ”

Mga Buhat 20:28

Bantayi ninyo ang inyong kaugalingon ug ang tibuok pundok, nga niini ang Espiritu Santo naghimo kaninyong mga tinugyanan, sa pag-atiman sa iglesia sa Dios nga iyang nabatonan pinaagi sa dugo sa iyang kaugalingong Anak.

Mga Buhat 21:28

nga nagsinggit, “Mga tawo sa Israel, tabang kamo! Mao kining tawhana ang nagtudlo sa mga tawo bisan diin batok sa katawhan ug sa balaod ug niining dapita. Ug dugang pa, nagdala usab siya ug mga Grego ngadto sa sulod sa Templo ug iyang gihugawhugawan kining balaan nga dapit.”

Deuteronomio 23:14

Kay ang Ginoo nga inyong Dios mosuroy sa taliwala sa inyong kampo aron sa pagluwas kaninyo ug aron sa pagtugyan sa inyong mga kaaway nganha kaninyo busa kinahanglan nga ang inyong kampo balaan aron dili siya makakita ug hugaw nga butang diha kaninyo ug motalikod gikan kaninyo.

1 Pedro 5:1

Busa ako magtambag sa mga kadagkoan diha kaninyo, ingon nga kauban ug saksi sa mga pag-antos ni Cristo, ug mag-aambit usab sa himaya nga ipadayag unya.