2 Mga Hari 1:2

Ang Biblia 2011

Unya si Ahasias nahulog sa bintana sa iyang lawak sa itaas didto sa Samaria, ug nasakit siya. Busa nagpadala siya ug mga sinugo ug miingon kanila, “Lakaw ug pangutan-a si Baalsebub, ang dios sa Ekron, kon mamaayo ba ako niining sakita.”

Cross References

1 Mga Hari 11:33

tungod kay ila akong gitalikdan, ug nagsimba sila kang Astarot nga diosa sa mga Sidonhanon, kang Camos nga dios sa Moab ug kang Milcom nga dios sa mga Amonihanon, ug wala sila maglakaw sa akong mga dalan, sa pagbuhat sa matarong diha sa akong panan-aw ug sa pagtuman sa akong mga lagda ug sa akong mga tulumanon, sama sa gihimo ni David nga iyang amahan.

1 Mga Hari 14:3

Pagdala ug napulo ka buok pan ug pipila ka torta ug usa ka tibod nga dugos, ug lakaw ngadto kaniya. Siya mosugilon kanimo kon unsay mahitabo sa bata.”

1 Mga Hari 22:34

Apan may usa ka tawo nga nanaghap pagpana ug naigo ang hari sa Israel sa tinakdoan sa iyang taming sa dughan, busa siya miingon sa nagdala sa iyang karwahi, “Balik ug dad-a ako palayo gikan sa gubat kay ako samaran.”

1 Mga Hari 22:40

Busa si Ahab mipahulay uban sa iyang katigulangan ug si Ahasias nga iyang anak naghari puli kaniya.

2 Mga Hari 1:16

ug miingon kaniya, “Mao kini ang giingon sa Ginoo, ‘Tungod kay ikaw nagpadala ug mga sinugo aron sa pagpakisayod kang Baalsebub, ang dios sa Ekron,—tungod ba kay walay Dios sa Israel nga pakisayran sa iyang pulong?—busa ikaw dili makakanaog gikan sa higdaanan nga imong gihigdaan, kondili mamatay gayod ikaw.’ ”

2 Mga Hari 1:3

Apan ang anghel sa Ginoo miingon kang Elias nga Tisbihanon, “Tindog ug tungas aron sugaton nimo ang mga sinugo sa hari sa Samaria ug ingna sila, ‘Tungod ba kay walay Dios sa Israel, maoy hinungdan nga kamo moadto aron magpakisayod kang Baalsebub, ang dios sa Ekron?’

2 Mga Hari 1:6

Ug sila miingon kaniya, “May usa ka tawo nga misugat kanamo ug miingon kanamo, ‘Balik kamo ngadto sa hari nga nagpadala kaninyo ug ingna siya, ‘Kini mao ang giingon sa Ginoo: Tungod ba kay walay Dios sa Israel, maoy hinungdan nga ikaw nagpadala aron sa pagpakisayod kang Baalsebub, ang dios sa Ekron? Busa ikaw dili na makakanaog gikan sa higdaanan nga imong gihigdaan, kondili mamatay gayod ikaw.’ ”

2 Mga Hari 17:16

Ug ilang gisalikway ang tanang mga sugo sa Ginoo nga ilang Dios ug naghimo sila alang sa ilang kaugalingon ug duha ka tinunaw nga mga larawan sa nating baka ug naghimo sila ug usa ka Asera ug nagsimba sa tanang panon sa langit ug nag-alagad kang Baal.

Job 31:3

Dili ba katalagman ang modangat sa mga dili matarong, ug kadaotan alang sa mga tigbuhat ug kalapasan?

Awit sa mga Awit 2:9

Ang akong hinigugma sama sa usa ka lagsaw o batan-on nga laking osa. Tan-awa, nagtindog siya luyo sa atong kuta, naglili sa mga tamboanan, nagtan-aw diha sa mga rehas.

Isaias 19:3

ug ang espiritu sa mga Ehiptohanon sa sulod nila mawala, ug akong libogon ang ilang mga laraw; ug sila magpakisayod sa mga diosdios ug sa mga tigsalamangka, ug sa mga tigpakisayod ug mga espiritu, ug sa mga tigpanglamat;

Isaias 2:6

Kay ikaw nagsalikway sa imong katawhan, ang balay ni Jacob, kay napuno sila sa mga patuotuo gikan sa silangan ug pagtagnatagna sama sa mga Filistihanon ug nakig-abin sila uban sa mga langyaw.

Isaias 37:12

Nakaluwas ba kanila ang mga dios sa mga nasod nga gipanglaglag sa akong katigulangan: ang Gosan, ang Haran, ang Resef, ug ang katawhan sa Eden nga diha sa Telesar?

Isaias 37:19

ug nagsalibay sa ilang mga diosdios ngadto sa kalayo, kay sila dili man mga dios, kondili buhat sa mga kamot sa mga tawo, kahoy ug bato; busa gilaglag kini.

Mateo 10:25

Igo na alang sa tinun-an nga mahisama sa iyang magtutudlo ug sa ulipon nga mahisama sa iyang agalon. Kon ang pangulo sa panimalay ilang ginganlan ug Beelzebul, unsa pa kaha ka ngil-ad sa ilang ingalan sa mga sakop sa iyang panimalay!

Marcos 3:22

Unya ang mga eskriba nga nanglugsong gikan sa Jerusalem miingon, “Anaa kaniya si Beelzebul, ug siya nanghingilin ug mga demonyo pinaagi sa pangulo sa mga demonyo.”

Lucas 11:15

Apan ang uban kanila miingon, “Nagpagula siya sa mga demonyo pinaagi kang Beelzebul, ang pangulo sa mga demonyo.”

Mga Buhat 20:9

Ug diha sa bintana naglingkod ang usa ka batan-ong lalaki nga ginganlan ug Eutico nga nakatulog pag-ayo samtang si Pablo nagpadayon pa gihapon sa pagsulti. Ug sa gidaog na gayod siya sa katulogon, nahulog siya gikan sa ikatulong andana ug gikuha nga patay na.

Josue 15:11

Ang utlanan mipadayon ngadto sa bakilid sa bukid sa amihanang bahin sa Ekron ug ang utlanan miliko ngadto sa Sikeron ug misubay paingon sa Bukid sa Baala ug migula ngadto sa Jabneel, ug misangko sa dagat ang utlanan niini.

Mga Maghuhukom 11:24

Dili ba nimo panag-iyahon kadtong gihatag kanimo ni Camos nga imong dios aron imong panag-iyahon? Ug ang tanan nga giilogan sa Ginoo sa among atubangan, among panag-iyahon.

Mga Maghuhukom 5:28

“Gikan sa bintana, ang inahan ni Sisera mitambo, misinggit siya diha sa rehas, ‘Ngano nga ang iyang karwahi dugay mang miabot? Nganong nalangan man ang mga ligid sa iyang karwahi?’

1 Samuel 5:10

Busa ilang gipadala ang sudlanan sa kasabotan sa Dios ngadto sa Ekron. Ug sa diha nga ang sudlanan sa kasabotan sa Dios didto sa Ekron, ang mga tawo sa Ekron naninggit, “Gidala nila ang sudlanan sa kasabotan sa Dios sa Israel kanato aron sa pagpatay kanato ug sa atong katawhan.”