1 Samuel 27:10

Ang Biblia 2011

Sa dihang nangutana si Akis, “Batok kang kinsa nimo gihimo ang usa ka pagsulong niining adlawa?” Si David miingon, “Batok sa Negeb sa Juda,” o “Batok sa Negeb sa mga taga-Jerameel,” o “Batok sa Negeb sa Kenihanon.”

Cross References

Genesis 27:24

Siya miingon, “Ikaw ba gayod ang akong anak nga si Esau?” Ug siya miingon, “Ako mao.”

2 Samuel 17:20

Sa pag-abot sa mga sulugoon ni Absalom didto sa balay sa babaye, sila miingon, “Hain si Ahimaas ug si Jonatan?” Ug ang babaye miingon kanila, “Sila nanabok sa sapa nga tubigan.” Ug sa dihang sila nangita ug wala sila makakita kanila, namauli sila sa Jerusalem.

1 Cronicas 2:25

Ang mga anak nga lalaki ni Jerameel nga kamagulangan ni Hesron: si Ram ang iyang kamagulangan, si Buna, si Oren, si Osem ug si Ahias.

1 Cronicas 2:9

Ang mga anak nga lalaki ni Hesron nga natawo kaniya: si Jerameel, si Ram ug si Caleb.

Salmo 119:163

Akong gidumtan ug giayran ang kabakakan apan gihigugma nako ang imong Balaod.

Salmo 119:29

Ipalayo gikan kanako ang dalan sa kabakakan; ug tudloi ako sa imong Balaod uban sa grasya.

Mga Panultihon 29:25

Ang kahadlok sa tawo nagbutang ug usa ka lit-ag, apan siya nga nagsalig sa Ginoo layo sa kakuyaw.

Numeros 24:21

Ug siya mitan-aw sa Kenihanon ug mihimo sa iyang pakigpulong ug miingon, “Lig-on ang imong puluy-anan, ug ang imong salag nahimutang diha sa bato.

Mga Taga-Efeso 4:25

Tungod niini, sa mahukas na ninyo ang bakak, ang matag usa kaninyo kinahanglang magsulti sa kamatuoran ngadto sa iyang isigkatawo, kay kita mga bahin man sa usa ug usa.

Mga Maghuhukom 1:16

Ang mga kaliwat sa Kenihanon nga ugangan ni Moises mitungas gikan sa siyudad sa mga palmera uban sa mga kaliwat ni Juda ngadto sa kamingawan sa Juda nga atua sa Negeb sa Arad. Ug sila nangadto ug mipuyo uban sa katawhan.

Mga Maghuhukom 4:11

Unya si Heber nga Kenihanon mibulag gikan sa mga Kenihanon nga mga kaliwat ni Hobab, ang ugangan nga lalaki ni Moises, ug nagpatindog sa iyang tolda diha sa dagkong kahoy sa Zaananim nga duol sa Kedes.

Mga Maghuhukom 5:24

“Mahimong labing bulahan sa tanang mga babaye si Jael, ang asawa ni Heber nga Kenihanon, labing bulahan sa mga babaye nga nagpuyo sa mga tolda.

1 Samuel 15:6

Si Saul miingon sa mga Kenihanon, “Lakaw, pahawa kamo, palayo kamo gikan sa mga Amalekanhon kay tingali unya ug laglagon ko kamo uban kanila, kay kamo nagpakita ug kaluoy sa tibuok katawhan sa Israel sa diha nga sila migula gikan sa Ehipto.” Busa ang mga Kenihanon mibiya gikan sa mga Amalekanhon.

1 Samuel 21:2

Si David miingon kang Ahimelek nga pari, “Ang hari nagsugo kanako ug usa ka buluhaton ug miingon kanako, ‘Walay usa ka tawo nga mahibalo mahitungod sa butang nga niini ako nagpadala ug nagsugo kanimo.’ Naghimo ako ug kasabotan uban sa mga batan-ong lalaki mahitungod sa usa ka dapit.

1 Samuel 23:27

Apan may miabot nga usa ka sulugoon ni Saul nga nag-ingon, “Pagdali kamo ug ari kay ang mga Filistihanon misulong sa yuta.”

1 Samuel 27:11

Ug si David walay gibilin bisan lalaki o babaye nga buhi aron dad-on sa Gat kay naghunahuna siya, “Tingali unya ug manugilon sila bahin kanato ug moingon, ‘Mao kini ang gibuhat ni David’ ” Ug kini maoy iyang nabatasan sa tanang panahon nga siya nagpuyo sa yuta sa mga Filistihanon.

1 Samuel 29:8

Si David miingon kang Akis, “Apan unsay akong nabuhat? Ug unsay imong nakita sa imong sulugoon sukad niadtong adlaw nga misugod ako sa pag-alagad kanimo hangtod karon, aron dili ako moadto ug makig-away batok sa mga kaaway sa akong agalon nga hari?”

1 Samuel 30:29

sa Racal, sa mga siyudad sa mga kaliwat ni Jerameel ug sa mga siyudad sa mga Kenihanon,