1 Samuel 26:19

Ang Biblia 2011

Busa karon, papamatia ang akong agalon nga hari sa mga pulong sa iyang sulugoon. Kon ang Ginoo mao ang nag-aghat kanimo batok kanako, dawaton unta niya ang usa ka halad, apan kon ang mga tawo, tunglohon unta sila sa atubangan sa Ginoo, kay ako ilang gipapahawa niining adlawa aron nga ako dili mabahinan sa panulundon sa Ginoo, ug sila nag-ingon, ‘Lakaw, pag-alagad ug laing mga dios.’

Cross References

Genesis 44:18

Unya si Juda miduol kaniya ug miingon, “O akong agalon, naghangyo ako kanimo nga pasultihon nimo ako ug usa ka pulong sa mga igdulungog sa akong agalon, ug ayaw papasilaoba ang imong kasuko batok sa imong ulipon kay ikaw sama sa Paraon.

Genesis 8:21

Sa diha nga ang Ginoo nakapanimaho sa kahumot, ang Ginoo miingon diha sa iyang kasingkasing, “Dili na nako tunglohon pag-usab ang yuta tungod sa tawo, kay ang tuyo sa kasingkasing sa tawo daotan sukad sa iyang pagkabata, ug dili na nako laglagon pag-usab ang tanang butang nga buhi sama sa akong gihimo.

2 Samuel 14:16

Kay ang hari mamati, ug ilikay ang iyang sulugoon gikan sa kamot sa tawo nga buot molaglag kanako ug sa akong anak gikan sa panulundon sa Dios.’

2 Samuel 16:10

Apan ang hari miingon, “Unsay akong labot kaninyo, kamong mga anak ni Zeruia? Kon siya nanunglo tungod kay ang Ginoo miingon kaniya, ‘Tungloha si David,’ kinsa man unya ang moingon, ‘Nganong gibuhat man nimo kini?’ ”

2 Samuel 16:11

Ug si David miingon kang Abisai ug sa tanan niyang mga sulugoon, “Tan-awa, ang akong kaugalingong anak nangita sa akong kinabuhi, unsa pa kaha karon kining kaliwat ni Benjamin? Pasagdi siya ug pasagdi nga siya magtunglo kay ang Ginoo nagsugo kaniya.

2 Samuel 20:19

Ako usa niadtong mga makigdaiton ug matinumanon sa Israel. Ikaw nagtinguha sa paglaglag sa usa ka siyudad nga mao ang inahan sa Israel. Nganong lamyon man nimo ang kabilin sa Ginoo?”

2 Samuel 21:3

Ug si David miingon sa mga Gibeonhanon, “Unsay akong buhaton alang kaninyo? Ug asa nako himoa ang pagtabon sa sala aron inyong kapanalanginan ang kabilin sa Ginoo?”

2 Samuel 24:1

Misilaob na usab ang kasuko sa Ginoo batok sa Israel ug iyang gipalihok si David batok kanila nga nag-ingon, “Lakaw, ipha ang Israel ug ang Juda.”

1 Mga Hari 22:22

Ug ang Ginoo miingon kaniya, ‘Sa unsang paagi?’ Ug siya miingon, ‘Ako moadto ug magpakabakakon nga espiritu sa baba sa tanan niyang mga propeta.’ Ug siya miingon, ‘Ikaw mao ang modani kaniya ug magmalamposon. Lakaw ug buhata kini.’

1 Cronicas 21:1

Unya si Satanas mitindog batok sa Israel ug miaghat kang David sa pag-ihap sa Israel.

Salmo 120:5

Alaot ako, nga ako milangyaw sa Mesek, nga mipuyo ako sa mga tolda sa Kedar!

Salmo 20:4

Hatagan unta ikaw sa gitinguha sa imong kasingkasing, ug tumanon ang tanan nimong laraw!

Mga Panultihon 30:10

Ayaw butangbutangi ang usa ka sulugoon ngadto sa iyang agalon, kay tingali unya ug tunglohon ikaw niya ug ikaw ilhon nga sad-an.

Isaias 60:5

Unya ikaw makakita ug mosidlak, ang imong kasingkasing matingala ug malipay; tungod kay ang kadagaya sa dagat dad-on nganha kanimo, ang bahandi sa mga nasod modangat kanimo.

Levitico 26:31

Ang inyong mga lungsod himoon nako nga kamingawan ug gub-on nako ang inyong mga balaang dapit ug dili nako panimahoon ang kahumot sa inyong humot nga halad.

Numeros 36:7

Ang panulundon sa katawhan sa Israel dili balhinon gikan sa laing banay ngadto sa usa ka banay; kay ang matag usa sa katawhan sa Israel magpabilin diha sa iyang panulundon sa banay sa iyang katigulangan.

Numeros 36:9

Busa walay panulundon nga balhinon gikan sa usa ka banay ngadto sa laing banay kay ang matag banay sa katawhan sa Israel magpabilin diha sa iyang kaugalingong panulundon.’ ”

Roma 14:15

Kay kon tungod sa imong pagkaon nasubo ang imong igsoon, wala na ikaw magsubay sa gugma. Ayaw tugoti nga ang imong gikaon maoy makahimo ug kadaot sa tawo nga gipakamatyan ni Cristo.

Mga Taga-Galacia 5:12

Maayo pa unta hinuon nga kadtong nagpalibog kaninyo magkapon sa ilang kaugalingon!

Deuteronomio 13:3

ayaw kamo pamati sa mga pulong sa maong propeta o sa maong tighubad sa mga damgo kay ang Ginoo nga inyong Dios nagsulay kaninyo, aron sa pag-ila kon nahigugma ba kamo o wala sa Ginoo nga inyong Dios sa tibuok ninyong kasingkasing ug sa tibuok ninyong kalag.

2 Timoteo 4:14

Si Alejandro, ang tigsalsal ug bronsi, nakahimo kanako ug dakong kadaot. Ang Ginoo maghatag unya kaniya sumala sa iyang mga binuhatan.

1 Samuel 18:10

Sa pagkaugma, usa ka daotang espiritu gikan sa Dios miabot nga makusganon diha kang Saul ug siya nagsalimoang sulod sa balay samtang si David nagtugtog sa iyang alpa ingon sa iyang gibuhat matag adlaw. Ug dihay bangkaw sa kamot ni Saul.

1 Samuel 24:9

Si David miingon kang Saul, “Nganong namati ikaw sa mga pulong sa mga tawo, nga nag-ingon, ‘Si David daotan ug tuyo kanimo’?

1 Samuel 25:24

Siya mihapa sa iyang tiilan ug miingon, “Kanako lamang unta, agalon, mahan-ok ang kasal-anan; ako naghangyo kanimo, tugoti ang imong sulugoon nga babaye sa pagsulti diha sa imong mga igdulungog, ug pamatia ang mga pulong sa imong sulugoon.

1 Samuel 27:1

Si David miingon diha sa iyang kasingkasing, “May adlaw ra nga mahanaw ako pinaagi sa kamot ni Saul; wala nay maayo pa alang kanako gawas nga moikyas ako ngadto sa yuta sa mga Filistihanon. Unya si Saul mawad-an ug paglaom sa pagpangita kanako sa sulod sa mga utlanan sa Israel, ug makalingkawas ako gikan sa iyang kamot.”