1 Samuel 14:18

Ang Biblia 2011

Ug si Saul miingon kang Ahias, “Dad-a dinhi ang sudlanan sa kasabotan sa Dios.” Kay ang sudlanan sa kasabotan sa Dios didto niadtong adlawa uban sa katawhan sa Israel.

Cross References

2 Samuel 11:11

Si Uria miingon kang David, “Ang sudlanan sa kasabotan ug ang Israel ug ang Juda nagpuyo sa balongbalong, ug ang akong agalon nga si Joab ug ang mga sulugoon sa akong agalon nagkampo sa hawan nga kapatagan, moadto ba diay ako sa akong balay aron mokaon ug moinom ug makigdulog sa akong asawa? Ingon nga ikaw buhi, ug ingon nga ang imong kalag buhi, dili nako buhaton kining butanga.”

Numeros 27:21

Ug siya mobarog sa atubangan ni Eleasar nga pari nga maoy magpakisayod alang kaniya sa paghukom sa Urim sa atubangan sa Ginoo. Sa iyang pulong manggula sila ug sa iyang pulong manulod sila, siya ug ang tanang katawhan sa Israel uban kaniya, ang tibuok nga katilingban.”

Mga Maghuhukom 20:18

Ang katawhan sa Israel nangandam ug nangadto sa Betel, ug nagpakisayod sa Dios, “Kinsa kanamo ang mouna pag-adto aron sa pagpakig-away batok sa mga kaliwat ni Benjamin?” Ug ang Ginoo miingon, “Ang Juda mao ang mouna pag-adto.”

Mga Maghuhukom 20:23

Ug ang katawhan sa Israel nangadto ug nanghilak sa atubangan sa Ginoo hangtod sa pagkagabii ug sila nangutana sa Ginoo, “Makig-away ba kami pag-usab batok sa among kaigsoonan nga mga kaliwat ni Benjamin?” Ug ang Ginoo miingon, “Pangadto kamo batok kanila.”

1 Samuel 14:17

Unya si Saul miingon sa katawhan nga didto uban kaniya, “Ipha ug tan-awa kon kinsa ang mibulag gikan kanato.” Ug sa diha nga naihap na sila, si Jonatan ug ang iyang tigdala sa hinagiban wala didto.

1 Samuel 14:36

Unya si Saul miingon, “Manglugsong kita sunod sa mga Filistihanon sa gabii ug kuhaon nato ang kabtangan nga anaa kanila hangtod sa paghayag sa kabuntagon ug dili nato sila binlan ug tawo.” Ug sila miingon, “Buhata kon unsay maayo alang kanimo.” Apan ang pari miingon, “Magpaduol kita sa Dios.”

1 Samuel 23:9

Si David nahibalo nga si Saul naglaraw ug daotan batok kaniya ug siya miingon kang Abiatar nga pari, “Dad-a nganhi ang ephod.”

1 Samuel 5:2

Unya gikuha sa mga Filistihanon ang sudlanan sa kasabotan sa Dios ug gidala kini ngadto sa balay ni Dagon ug gibutang kini tupad kang Dagon.

1 Samuel 7:1

Ug ang mga tawo sa Kiriat-jearim nangadto ug gikuha ang sudlanan sa kasabotan sa Ginoo, ug gidala kini ngadto sa balay ni Abinadab nga didto sa bungtod. Ilang gibalaan ang iyang anak nga lalaki nga si Eleasar aron sa pagbantay sa sudlanan sa kasabotan sa Ginoo.