1 Pedro 3:3

Ang Biblia 2011

Himoa nga ang inyong pagpaanyag dili pinaagi sa dayag nga pagpanindot sa buhok, sa pagsul-ob ug bulawan ug mga mahalon kaayong bisti,

Cross References

Genesis 24:22

Sa diha nga nakahuman na ug pag-inom ang mga kamilyo, ang sulugoon mikuha ug usa ka ariyos nga bulawan nga nagtimbang ug tunga sa siklo ug duha ka pulseras alang sa iyang mga bukton nga nagtimbang ug napulo ka siklo nga bulawan.

Genesis 24:47

Unya ako nangutana kaniya, ‘Kang kinsang anak ikaw?’ Ug siya miingon, ‘Anak ni Betuel nga anak ni Nahor nga gianak kaniya ni Milca.’ Busa gibutang nako ang ariyos diha sa iyang ilong ug ang mga pulseras diha sa iyang mga bukton.

Genesis 24:53

Ug ang sulogoon mipagawas sa mga alahas nga plata ug mga alahas nga bulawan ug mga bisti ug kini gihatag kang Rebecca. Mihatag usab siya ug mga mahalong butang ngadto sa igsoon nga lalaki ug sa inahan ni Rebecca.

2 Mga Hari 9:30

Sa pag-adto ni Jehu sa Jesreel, si Jesebel nakadungog niini, busa iyang gipintalan ang iyang mga mata ug gidayandayanan ang iyang ulo ug midungaw sa tamboanan.

Ester 5:1

Sa ikatulo nga adlaw, si Ester nagsul-ob sa iyang harianong bisti, ug mitindog sa sulod nga hawanan sa balay sa hari atbang sa hawanan sa hari. Ang hari naglingkod sa iyang harianang trono sulod sa balay atbang sa pultahan sa balay.

Salmo 45:9

ang mga anak nga babaye sa mga hari uban sa pinasidunggang kababayen-an; sa imong tuo nagtindog ang rayna nga gidayandayanan ug bulawan sa Ofir.

Exodo 3:22

Apan ang matag babaye mangayo ug mga alahas nga plata, mga alahas nga bulawan ug mga bisti gikan sa iyang silingan ug sa babaye nga nag-abot sa iyang balay, ug ipanul-ob ninyo kini sa inyong mga anak nga lalaki ug sa inyong mga anak nga babaye. Niining paagiha makuhaan ninyo ug bahandi ang mga Ehiptohanon.”

Exodo 32:2

Si Aaron miingon kanila, “Tangtanga ninyo ang mga ariyos nga bulawan nga anaa sa mga dalunggan sa inyong mga asawa, sa inyong mga anak nga lalaki ug sa inyong mga anak nga babaye ug dad-a kana ninyo ngari kanako.”

Exodo 33:4

Sa diha nga ang katawhan nakadungog niining daotan nga mga balita, nagsubo sila ug walay bisan usa nga nagsul-ob sa iyang mga alahas.

Exodo 35:22

Nangadto sila, ang mga lalaki ug mga babaye, ang tanan nga may mahinangpon nga mga kasingkasing nagdala ug mga dayandayan, mga ariyos, mga singsing ug mga pulseras, ug ang tanang matang sa butang nga bulawan, ang matag usa naghalad ug usa ka halad nga bulawan ngadto sa Ginoo.

Exodo 38:8

Gibuhat niya ang planggana gikan sa bronsi ug ang tungtonganan niini gikan sa bronsi, gikan sa mga salamin sa mga babaye nga nag-alagad diha sa pultahan sa tolda nga tagboanan.

Isaias 52:1

Pagmata, pagmata, paglig-on, O Zion; isul-ob ang imong matahom nga mga bisti, O Jerusalem, ang balaan nga siyudad; kay gikan karon wala nay moanha kanimo, nga dili tinuli ug dili hinlo.

Isaias 61:10

Ako maglipay pag-ayo diha sa Ginoo, ang akong kalag magmalipayon diha sa akong Dios; kay ako gibistihan niya sa mga bisti sa kaluwasan, ako gisul-oban niya sa kupo sa pagkamatarong, sama sa pamanhonon nga nagdayandayan sa iyang kaugalingon sa usa ka purongpurong nga bulak, ug sama sa pangasaw-onon nga nagdayandayan sa iyang kaugalingon sa iyang mga alahas.

Jeremias 2:32

Malimot ba ang usa ka ulay sa iyang mga dayandayan, o ang usa ka pangasaw-onon sa iyang bisti? Apan ang akong katawhan nalimot kanako sa mga adlaw nga dili maihap.

Jeremias 4:30

Ug ikaw nga biniyaan, unsa bay imong ipasabot nga ikaw nagbisti ug pula, nga ikaw nagdayandayan sa imong kaugalingon ug mga dayandayan nga bulawan, nga gipadako nimo ang imong mga mata sa pintal? Sa walay pulos nagpaanyag ikaw sa imong kaugalingon. Ang imong mga hinigugma nagtamay kanimo; sila nagtinguha sa imong kinabuhi.

Ezequiel 23:40

Nagpasugo pa gani sila aron ang mga tawo moanhi gikan sa layo, nga tungod niana nagpadala sila ug mga sinugo, ug sila nangabot. Alang kanila ikaw naligo, nagpintal sa imong mga mata ug nagdayandayan sa imong kaugalingon sa mga alahas.

Roma 12:2

Ayaw kamo pagpahiuyon niining kalibotana, hinuon tugoti nga mausab ang inyong kaugalingon pinaagi sa pagbag-o sa inyong hunahuna, aron inyong masuta unsa ang kabubut-on sa Dios, unsa ang maayo, ang kahimut-an ug ang hingpit.

1 Pedro 3:2

sa diha nga makita nila ang inyong matinahoron ug putli nga gawi.